काठमाडौं– नेपाली कांग्रेसको १४औँ महाधिवेशन सुरु हुन जम्मा दुई दिन बाँकी छ । संस्थापन पक्षबाट सभापतिमा पुनः शेरबहादुर देउवाले नै उम्मेदवारी दिने निश्चित भइसहेको छ । तर, सभापति देउवाविरुद्ध सहमतिमा उम्मेदवारी दिने प्रतिबद्धता जनाएको सस्थापन इतर समूहका नेताहरूले भने हालसम्म उम्मेदवार तय गर्नै सकेका छैनन् । संस्थापन इतर समूहबाट वरिष्ठ नेता रामचन्द्र पौडेल, महामन्त्री शशांक कोइराला, नेताहरू प्रकाशमान सिंह, डा. शेखर कोइराला मुख्य रूपमा आकांक्षी छन् ।
उनीहरूले वडा सम्मेलन सुरु हुने भएपछि हताहतार १७ भदौमा पत्रकार सम्मेलन गर्दै आफू पक्षका कार्यकर्तालाई सहमतिमा साझा उम्मेदवार बनाउने प्रतिबद्धता जनाएका थिए । तर, उनीहरू सो प्रतिबद्धतापछि सबै सभापति पदका आकांक्षीहरू आफैँ उम्मेदवार बन्न लिगलिगे दौडमा लागे । जसका कारण उनीहरूको पकड भएको जिल्ला तथा प्रदेश समितिमा नेतृत्व चयनका क्रममा ठूलो क्षति भोग्नु परेको छ । प्रदेश १ मा फराकिलो अन्तरले जित्ने आँकलन गरिएका संस्थापन इतर समूहका प्रदेश सभापतिका उम्मदेवार गुरुराज घिमिरे २ मतले पराजित भइसकेका छन् ।
यसबीचमा उनीहरूले साझा उम्मेदवार बनाउने पहल नगरेका होइनन् । पटक–पटक उनीहरू द्विपक्षीय, त्रिपक्षीयदेखि सामूहिक छलफलसमेत गरे । तर, उनीहरूले साझा उम्मेदवार तय गर्न सकेका छैनन् । मंगलबार पनि संस्थापन इतर पक्षका सभापतिका आकांक्षीहरूबीच छलफल भयो । तर, सहमति जुट्न सकेन । पटकपटकको छलफल अनिर्णित हुँदा सो समूहको छलफललाई ‘भ्यागुताको धार्नी पु¥याउने प्रयास’का रूपमा अर्थ लगाउन थालिएको छ । मंगलबारको छलफलमा नेताहरूबीच बुधबार साँझसम्ममा सहमतिको उम्मेदवार तय गर्ने सहमति भएको छ । यद्यपि कसरी, कसको नाममा सहमति हुन्छ भन्ने बारेमा भने ठोस सहमति हुन सकेन ।
पौडेल पक्षले बुधबार साँझसम्म पार्टीको १४औँ महाधिवेशनका लागि साझा उम्मेदवार तय गर्ने निर्णय गरेको छ । मंगलबार चाक्सीबारीस्थित नेता सिंहको निवासमा बसेको पौडेल पक्षका नेताहरूको बैठकले महाधिवेशनको नेतृत्वका लागि साझा उम्मेदवार बुधबारसम्ममा तय गरी सार्वजनिक गर्ने निर्णय गरेको हो । महाधिवेशनबाट कांग्रेसलाई सफल बनाउने गरी नयाँ नेतृत्व चयन गर्नका लागि बुधबार साँझसम्म आफूहरू पक्षले सहमतिमै उम्मेदवार चयन गर्ने निर्णय गरेको वरिष्ठ नेता पौडेलले जानकारी दिए ।
त्यसका लागि मंगलबारको बैठकमा सहमतिको नजिक पुगिएको पनि उनले दाबी गरेका छन् । वरिष्ठ नेता पौडेलले भने, ‘नेपाली कांग्रेसको रूपान्तरण चाहने विचार समूहको बीचमा हामी साथीहरूले आज विभिन्न कोणबाट छलफल ग¥यौँ । हामी सहमतिको निकै नजिक पुगेका छौँ । हाम्रो निर्णय भोलिसम्ममा केही प्रक्रिया पूरा गरेर बाहिर आउँछ । हामीले विभिन्न कोणबाट छलफल ग¥यौँ र अबको चुनौतीको सामना कसरी हामी गर्छौँ । महाधिवेशनमा हामी कसरी पार्टी जोगाउन सफल हुन्छौँ । सबै पक्षमा छलफल गरेर हामी एउटा निष्कर्ष नजिक नजिक पुगेका छौँ । केही प्रक्रिया पूरा गर्न बाँकी छ । त्यो प्रक्रिया पूरा गरेर हामी भोलि साँझसम्म साझा उम्मेदवारको निर्णय सार्वजनिक गर्छौँ ।’
वरिष्ठ नेता पौडेलले सहमति नजिक पुगेको र बुधबार उम्मेदवारको तय हुने बताइरहँदा सभापति पदका आकांक्षी डा.शेखर कोइराला भने बुधबारको छलफलमा सहभागी नहुने बताएका छन् । मंगलबारको बैठकपछि औपचारिक प्रतिक्रिया दिन भने नमानेका डा.कोइरालाले अनौपचारिक रूपमा आफू बुधबारको भेलामा सहभागी नहुने बताए । वरिष्ठ नेता पौडेलले भेलाबाट निर्णय हुने बताएको बैठकमा नगए पनि निर्णय मान्य हुने वा नहुने भन्ने विषयमा भने उनले केही भनेनन् । उनले भने, ‘भोलिको बैठकमा म जान्न, उहाँहरूले छलफल गर्नुहुन्छ ।’ उनको प्रतिक्रियाले मंगलबारको छलफलका क्रममा भएको छलफलप्रति उनी असन्तुष्ट रहेको प्रष्ट हुन्छ ।
शशांक ब्याक, पौडेललाई समर्थन
कांग्रेसको आसन्न महाधिवेशनमा सभापति देउवालाई परास्त गर्न शशांक कोइरालाले सभापतिको दाबी छाडेका छन् । गणेशमान भवन चाक्सीबारीमा संस्थापनइतर पक्षबाट साझा उम्मेदवार तय गर्न बसेको बैठकमा महामन्त्री सशांक कोइरालाले पौडेललाई समर्थन जनाउँदै उम्मेदवार नबन्ने घोषणा गरेका हुन् । यसअघि कोइराला परिवारभित्र शंशाक, शेखर र सुजाताबीच शेखरलाई उम्मेदवार बनाउने सहमति भएको समाचार सार्वजनिक भएका थिए । तर, मंगलबारको छलफलमा शशांकले पौडेललाई समर्थन गर्दै सभापतिको उम्मेदवार नबन्ने बताएका हुन् ।
बैठकमा कोइरालाले भने, ‘रामचन्द्रजी सिनियर पनि हो । मलाई उहाँले एकपटक सहयोग गर्नुस् भन्नुभएको छ । उहाँकै नेतृत्वमा चुनावमा जानु उपयुक्त हुन्छ ।’ कांग्रेसको १४औँ महाधिवेशन २४ मंसिरबाट काठमाडौंमा सुरु हुँदै छ ।
