काठमाडौं– सर्वोच्च अदालतका प्रधानन्यायाधीश चोलेन्द्रशम्शेर जबराविरुद्ध संसदमा प्रस्तुत गरिने महाअभियोगको प्रस्तावको पक्षमा उभिन नेपाल बार एसोसिएसनले प्रमुख प्रतिपक्षी दल नेकपा एमालेसँग पनि गुहार मागेको छ । २८ मंसिरमा संसदको हिउँदे अधिवेशन सुरु हुन लागेको बेला एमालेलाई गुहार्न बारको टोली मंगलबार एमाले अध्यक्ष केपी ओलीको निवास बालकोट नै पुगेको हो । एमालेको समर्थनबिना महाअभियोगको प्रस्ताव पारित नहुने भन्दै बारका पदाधिकारीले न्यायलयको सुधारका लागि महाभियोगको पक्षमा उभिन ओलीलाई आग्रह गरेका थिए ।
प्रधानन्यायाधीश जबराविरुद्ध आन्दोलनमा उत्रिएका वरिष्ठ अधिवक्ताहरूसहित बालकोट पुगेका बार अध्यक्ष चण्डेश्वर श्रेष्ठले एमालेको सहयोगबिना महाअभियोग पारित नहुने बताए । सत्ता गठबन्धनले महाअभियोग लगाउन सहमति जनाएको संकेत गर्दै उनले एमालेको सहयोग भए मात्र पारित हुने भएकाले ओलीको सहयोग माग गरिएको बताए । उनले अदालतभित्रबाट अहिलेको समस्या समाधान नहुने र चोलेन्द्रशम्शेर भ्रष्टाचारीको नाइके भएकाले अदालतमा राख्न नहुने दाबी गरे ।
श्रेष्ठले भने, ‘सबै दल नमिल्दा महाअभियोग पास हुँदैन । दलहरूले आन्तरिक गृहकार्य गरिरहेको होलान् तर बाहिरबाट हेर्दा बेवास्ता भइरहेको देखिन्छ । जिम्मेवार प्रतिपक्षको नेता र हिजोको दिनमा पनि न्यायपालिकाभित्र विसंगतिका कुरा हुँदा बेठिक भइरहेको छ भनेर आवाज उठाएको नेतालाई भौतिक रूपमै भेटेर कुरा राख्न आएका हौँ ।’
जवाफमा अध्यक्ष ओलीले सत्तारुढ दलहरू प्रधानन्यायाधीश जबरालाई महाअभियोग लगाउने पक्षमा नरहेको बताएका छन् । बारका अध्यक्ष श्रेष्ठले सत्ता गठबन्धनले महाअभियोग लगाउने संकेतप्रति असहमति प्रकट गर्दै उनले प्रधानमन्त्री शेरबहादुर देउवा र सत्तारुढ माओवादी केन्द्रका अध्यक्ष पुष्पकमल दाहालको नामै लिएर सत्तापक्ष प्रधानन्यायाधीश जबरालाई संसदमा महाअभियोग लगाउन तयार नरहेको दाबी गरेका हुन् । उनले देउवा र दाहाल ‘प्रधानन्यायाधीश जबराले मन्त्री पद लेनदेन नगरेको’ भन्दै बचाउमा उभिएको तर्कसमेत गरे । ‘कसरी उहाँहरूबाट महाअभियोग प्रस्ताव दर्ता हुन्छ ?’ उनको प्रश्न थियो । उनले सैद्धान्तिक हिसाबले बारको प्रस्तावमा आफ्नो असहमति नभए पनि न्यायालय स्वच्छ र निष्पक्ष रहन नसकेको बताए । उनले बारले स्वच्छ न्यायालयको कुरा बारले उठाए पनि निष्पक्षताको कुरा नउठाएकामा असन्तुष्टि जनाए ।
अध्यक्ष ओलीले बारका पदाधिकारीलाई महाभियोग पास गर्न सहयोग गर्न नसक्ने जनाउ दिएका छन् । उनले जबरालाई हटाएपछिको सेटिङ प्रष्ट भएको भन्दै बारका पदाधिकारीप्रति उल्टै शंकाको नजर तेस्र्याए ।
