काठमाडौं– राष्ट्रिय प्रजातन्त्र पार्टीको भृकुटीमण्डपमा जारी एकता महाधिवेशनमा महाधिवेशन प्रतिनिधिहरूको नाममा विवाद उत्पन्न भएपछि निर्वाचन कार्यक्रम प्रभावित भएको छ । बुधबारदेखि सुरु भएको महाधिवेशनअन्तर्गत बिहीबार उम्मेदवारी दर्ताको कार्यतालिका थियो । तर, प्रतिनिधिको नामावलीका सम्बन्धमा विवाद भएपछि निर्वाचन कार्यतालिका प्रभावित भएको हो । यो समाचार तयार पार्दासम्म राप्रपा महाधिवेशनमा उम्मेदवारी मनोनयन हुन सकेको छैन ।
विवादित पाँच जिल्लाको नामावली अध्यक्ष कमल थापापक्षले केरमेट गरेको आरोप राजेन्द्र लिङ्देनपक्षले लगाएपछि विवाद भएको हो । यसअघि सहमतिमा अन्तिम रूप दिइएको नामावलीमा थापा पक्षले टिपेक्स लगाएको आरोप लिङ्देन पक्षले लगाएको छ । लिङ्देनले थापाविरुद्ध अध्यक्षमा उम्मेदवारी दिने घोषणा गरिसकेका छन् । दुवै समूह प्यानल बनाएर निर्वाचनमा होमिने तयारीमा छन् । बिहीबार बिहान १० बजे उम्मेदवारहरूको अन्तिम नामावली प्रकाशन गर्ने भनिए पनि साँझ अबेरसम्म प्रकाशन हुन सकेको छैन । सर्लाही, कपिलवस्तु, ललितपुर, रोल्पालगायतका जिल्लाका प्रतिनिधिको नामावली हेरफेर भएको आरोप लिङ्देनपक्षको छ । थापापक्षले भने यसअघि नै विवादित जिल्लामा दुवैपक्षका बीचमा एक प्रकारको सहमति भएको र त्यही अनुरूपको अन्तिम सूची प्रकाशन गर्ने तयारी भइरहँदा अनावश्यक विवाद झिकिएको बताएको छ ।
यी हुन् दुवै पक्षका उम्मेदवार
राप्रपाको नयाँ नेतृत्व चयनका लागि हुन लागेको निर्वाचनमा कमल थापा र राजेन्द्र लिङ्देनले पदाधिकारीमा लड्ने उम्मेदवारको टुंगो लगाएका छन् । राप्रपा नेता भुवन पाठकका अनुसार थापा प्यानलबाट बुद्धिमान तामाङ, विक्रम पाण्डे, ध्रुवबहादुर प्रधानको नाम उपाध्यक्षको उम्मेदवारको रूपमा टुंगो लागेको लागेको छ । यस्तै महिला उपाध्यक्षमा रोशन कार्की उम्मेदवार रहेकी छन् । यसैगरी महामन्त्रीमा भुवन पाठक, भास्कर भद्रा र कुन्ती शाहीको नाम टुंगो लागेको छ । यसैगरी लिङ्देन प्यानलबाट उपाध्यक्षमा विक्रम पाण्डे, दिलविकास राजभण्डारी, रामचन्द्र राय र लीला श्रेष्ठको नाम टुंगो लागेको छ भने महामन्त्रीमा डा.धवल शम्शेर राणा, श्याम तिमिल्सिना र रेखा थापाको नाम टुंगो लागेको छ । विक्रम पाण्डेको नाम भने दुवै पक्षले प्यानलमा राखेका छन् । यस विषयमा पाठकले आफूहरूले टुंगो लगाएको सूची यही भएको र अर्को प्यानलमा राखे नराखेको बारे थाहा नभएको बताए । राप्रपाको नयाँ नेतृत्व चयनका लागि शुक्रबार मतदान हुँदै छ भने अध्यक्षमा थापा र लिङ्देन भिड्ँदै छन् ।
राप्रपामा उपाध्यक्ष र महामन्त्रीपछि सहमहामन्त्री, सहायक महामन्त्री, प्रवक्ताहरू रहने व्यवस्था छ । यद्यपि, तिनीहरू प्रतिनिधिको भोटबाट नभइै अध्यक्षबाट मनोनित हुन्छन् । विधानअनुसार ७ जना सहमहामन्त्री र ७ जना सहायक महामन्त्री मनोनीत हुनेछन् । राप्रपाको १९९ सदस्यीय केन्द्रीय समिति रहने छ । जसमध्ये १४९ जना महाधिवेशनबाट निर्वाचित भएर आउनेछन् भने बाँकी मनोनित हुने व्यवस्था छ ।
