काठमाडौं– नेकपा (एमाले) का नवनिर्वाचित उपाध्यक्ष युवराज ज्ञवालीले आफ्नो पार्टीप्रति जनताको आकर्षण निरन्तर बढ्दो रहेको दाबी गरेका छन् । उनले १०औँ राष्ट्रिय महाधिवेशन भव्य रूपमा सम्पन्न भएको पनि बताए । बिहीबार राजधानीमा आयोजना गरेको साक्षात्कारमा बोल्दै उनले एमाले नै आगामी निर्वाचनपछि पनि पहिलो दल बन्ने र बहुमत ल्याउने दाबी गरे । उनले भने, ‘नेपालको इतिहासमा यति धेरै जनसहभागिता कुनै पनि पार्टीको कार्यक्रममा भएको थिएन ।
मैले सबै दलका महाधिवेशन, अधिवेशन, आमसभा हेरेको छु, यसपटकको हाम्रो महाधिवेशनमा पाँच लाख जनता उतार्ने योजना थियो । तर, त्योभन्दा पनि धेरै जनसमूदायको उपस्थितिमा हाम्रो उद्घान सम्पन्न भयो । एमालेप्रति जनताको आकर्षण निरन्तर बढ्दो अवस्थामा छ । जनहसहभागिताको हिसाबले १०औँ महाधिवेशन ऐतिहासिक भयो । इतिहासमै कुनै एउटा पार्टीले यत्रो जनसमुदायको उपस्थितिमा कार्यक्रम गरेको थिएन । अहिले पनि एमाले संसदमा सबैभन्दा ठूलो पार्टी छ । आउने दिनमा पनि यो पार्टीले बुहमत ल्याउने कुरा स्थापित भइसकेको छ । यो कुरा चितवनको जनसभाले पुष्टि भयो ।’
उपाध्यक्ष ज्ञवालीले फेरि पनि वामपन्थीहरूबीच एकताको आवश्यकत्ता रहेको औँल्याए । उनले भने, ‘एमालेसामु चुनौति छन्, एउटा पार्टी फुटेर तीन टुक्रा भयो । एमाले पनि फुटेको छ । हामीले सरकार ५ वर्ष चलाउन सकेनौँ । अहिले कांग्रेसको नेतृत्वमा सरकार बनेको छ । हामीले कमिकमजोरी कहाँ रह्यो भनेर समीक्षा गर्नुपर्छ ।’ उनले एमाले अब सशक्त भएर अघि बढ्ने पनि दाबी गरेका छन् । उनले भने, ‘हामी कमीकमजोरी सच्याएर र फराकिलो छाती लिएर अघि बढ्नेछौँ ।’ ज्ञवालीले महाधिवेशन भव्य र सफल रूपमा सम्पन्न भएको दाबी गरे ।
यद्यपि महाधिवेशनमा केही कमीकमजोरी भने रहेको उनले स्विकारे । उनले आफूले पार्टीको चौँथोदेखि १०औँ महाधिवेशनसम्म सक्रियताका साथ भाग लिएको पनि स्मरण गराए । उनले भने, ‘चौँथोदेखि अहिले चितवनमा सम्पन्न भएको १०औँ महाधिवेशनसम्म म आफैँ सहभागी छु । यी सबै महाधिवेशनमा म निर्वाचित भएको छु । म सक्रिय छु । ती सबै महाधिवेशन कुनै सहमति र कुनै प्रतिस्पर्धामा गरेका छौँ । अहिलेको महाधिवेशनको नयाँ विशेषता भनेको धेरै संख्या सहमतिमा छनोट भएको छ ।
केही प्रतिस्पर्धाको माध्यमबाट छनोट भए । दुवै तरिकाबाट हामीले नेतृत्व छनोट गरेका छौँ । यो महाधिवेशनमा उन्नत किसिमको अभ्यास ग¥यौँ । हार्दिकताका साथ महाधिवेशन सम्पन्न भयो । असाध्यै शान्तिपूर्ण वातावरणमा व्यवस्थित ढंगले सम्पन्न भएको छ । यसर्थ प्रतिस्पर्धा र सहमतिको आधारमा नेतृत्व छनोट भएकाले यो महाधिवेशनको नयाँ विशेषता हो । नयाँ अभ्यास हो । लोकतान्त्रिक अभ्यासको कारणले पनि यो महत्वपूर्ण रह्यो । प्रतिनिधिहरू खुसीसाथ फर्किनुभएको छ । कतिपयमा असन्तुष्टि होला । आउनै पर्ने साथीहरू छुट्नुभएको छ ।’
उनले नेपालको राजनीतिमा एमालेले मूख्य भूमिका निर्वाह गर्नुपर्ने भएकाले आफूहरू सोहीअनुसार तयारीका साथ अघि बढेको पनि सुनाए । उनले भने, ‘अहिले पनि जनमत एमालेको पक्षमा रहेको छ । एमालेसँग दुई तिहाईको बहुमतको सरकार सञ्चालन गरेको अनुभव छ । विगतको सकारात्मक र नकारात्मक अनुभवबाट शिक्षा लिएर एमालेले सिंगै मुलुकलाई हाँक्ने गरी आफ्नो योजना, नीति र कार्यक्रम प्रस्तुत गरिसकेको छ ।’
