काठमाडौं– नेपालको न्यायालयको इतिहासमा पहिलोपटक बुधबारदेखि सर्वोच्च अदालतमा गोलाप्रक्रियाबाट मुद्दाको पेसी तोकिएको छ । न्यायलयको सुधारसम्बन्धी न्यायाधीश हरिकृष्ण कार्की नेतृत्वको अध्ययन समितिको सुझावअनुसार बुधबार पहिलोपटक गोलाप्रक्रियाबाट सर्वोच्चमा मुद्दाको पेसी तोएिको हो । यसअघि प्रधानन्यायाधीशले आफूखुसी मुद्दाको पेसी तोक्ने गरेका थिए । प्रधानमन्त्रीको तजबिजी अधिकार कटौती गर्दै सर्वोच्चको ८ मंसिरमा बसेको पूर्ण बैठकले गोलाप्रक्रियाबाट पेसी तोक्ने निर्णय गरेको थियो ।
प्रधानन्यायाधीशले आफूखुसी पेसी तोक्दा न्यायालयमा भ्रष्टाचार बढेको, अदालतमा सेटिङका नाममा बिचौलियाहरू हाबी हुने गरेको भन्दै गोलाप्रक्रियाबाट पेसी तोक्नुपर्ने आवाज उठ्दै आएको थियो । तर, बुधबार पहिलोपटक गोलाप्रक्रियाबाट पेसी तोकेर सुनुवाई गरिए पनि पहिलो दिनको सुनुवाई उत्साहप्रद हुन सकेन । उक्त प्रक्रियाबाट सर्वोच्च अदालतमा ११ वटा इजलास गठन भएका थिए । तीमध्ये संयुक्त नौवटा र एकल दुईवटा इजलास थिए ।
न्यायाधीश हरिकृष्ण कार्की र बमकुमार श्रेष्ठको संयुक्त इजलासमा सबैभन्दा कम एक थान मुद्दा तोकिएको थियो । त्यसमा बेन्च नबसेको जनाइएको छ । न्यायाधीश अनिलकुमार सिन्हा र कुमार रेग्मीको संयुक्त इजलासमा सबैभन्दा बढी ४३ थान मुद्दामा पेसी तोकिएको छ । एउटा मुद्दामा अन्य आदेश भएको छ । अरु कुनै पनि मुद्दामा सुनुवाइ भएको छैन । न्यायाधीश दीपककुमार कार्की र टंकबहादुर मोक्तानको संयुक्त इजलासमा १६ थान मुद्दामा पेसी तोकिएको थियो । एउटा मात्र मुद्दामा सुनुवाइ गरिएको छ ।
न्यायाधीश हरिकृष्ण कार्की र सुष्मालता माथेमाको संयुक्त इजलासमा २८ थान मुद्दामा पेसी तोकिएको थियो, तर उक्त बेच्न नबसेकोे जनाइएको छ । न्यायाधीश विश्वभरप्रसाद श्रेष्ठ र बमकुमार श्रेष्ठको संयुक्त इजलासमा १५ थान मुद्दामा पेसी तोकिएकोमा एक थान मात्र हेरिएको छ । न्यायाधीश डा आनन्दमोहन भट्टराई र डा मनोजकुमार शर्माको संयुक्त इजलासमा १५ थान मुद्दा थियो, तर सुरुबाटै हेर्न नभ्याइनेमा छ ।
न्यायाधीश प्रकाशमान सिंह राउत र हरिप्रसाद फुयालको संयुक्त इजलासमा १७ थान मुद्दामा पेसी तोकिएकोमा कुनै पनि मुद्दामा सुनुवाइ भएन । न्यायाधीश सपना प्रधान मल्ल र प्रकाशकुमार ढुंगानाको संयुक्त इजलासमा १९ थान मुद्दा तोकिएकोमा एउटामा फाइल झिकाउने निर्णय गरेको छ । न्यायाधीश तेजबहादुर केसी र नहकुल सुवेदीको इजलासमा २० थान मुद्दामा पेसी तोकिएको थियो । तीन थान मुद्दामा सुनुवाइ भएको छ ।
त्यस्तै, एकल इजलासमा न्यायाधीश मीरा खड्काको एकल इजलासमा १६ थान मुद्दामा पेसी थियो । उक्त इजलासमा बेन्च नबसेको जनाइएको छ । न्यायाधीश कुमार चुडालको एकल इजलासमा १५ थान मुद्दामा पेसी तोकिएको थियो ।
