काठमाडौं– नेपाली कांग्रेसका वागमती प्रदेशका संसदीय दलका नेता तथा पूर्वमन्त्री इन्द्रबहादुर बानियाँले पार्टीको वागमती प्रदेशको सभापतिमा उम्मेदवारी घोषणा गरेका छन् । बुधबार पत्रकार सम्मेलन गर्दै बानियाँले आफ्नो उम्मेदवारी घोषणा गरेका हुन् । उनको उम्मेदवारीको प्रस्तावकमा नेपाली कांग्रेस काभ्रेका सभापति तीर्थ लामा र समर्थकमा नेपाली कांग्रेस भक्तपुरका सभापति दुर्लभ थापा रहेका छन् ।
बानियाँले वागमती प्रदेशको उन्नति र प्रगतिका लागि आफूले सशक्त र प्रभावकारी भूमिका निर्वाह गर्ने विश्वास दिलाए । उनले भने, ‘हामी १४औँ महाधिवेशनमा जुटिरहेका छौँ । १६ गते प्रदेश अधिवेशन प्रारम्भ हुँदै छ । कांग्रेसलाई जनमुखी बनाउन र सबैलाई आफ्नो पार्टी भन्ने विश्वास दिलाउनका लागि पनि हामीले भोलिका दिनमा अझै सशक्त भूमिका खेल्नु पर्नेछ । परिवर्तनको आन्दोलनदेखि संविधान जारी र यसको कार्यान्वयनसम्म आउँदा यो अवधिसम्म कांग्रेसले लोकतान्त्रिक मूल्य र मान्यतामा देशलाई डोर्याएको छ ।’
उनले कांग्रेसले लिएको विचार र नीतिका कारण पार्टीमा ठूलो उभार र लहर आएको पनि विश्वास दिलाए । उनले भने, ‘शिक्षा र स्वास्थ्यलाई निःशुल्क बनाउने हाम्रो उद्देश्य छ । अब आन्दोलन र परिवर्तनको गाथा धेरै लामो भइसक्यो ।’ बानियाँले वागमती प्रदेशमा कांग्रेसलाई जनताको भरोसायोग्य पार्टी भएको र अझै आगामी दिनमा झनै जनताको पक्षमा खरो उत्रिने पनि विश्वास दिलाए । उनले भने, ‘ नेपाली कांग्रेसले गरेको राजनीति जात, धर्म र कुनै संस्थाको नाममा होइन, हामीले जनताको सेवाका लागि राजनीति गरेको हो । कांग्रेस वास्तवमा जनताकै जगमा उठेको पार्टी हो । हामी विगतदेखि वर्तमानसम्म यही बाटोमा छौँ । सबैको आकर्षणको केन्द्रको रूपमा कांग्रेस रहँदै आएको छ ।’
उनले वागमती प्रदेशमा रहेका ५५ लाख जनताको सुख, सुमृद्धिका लागि आफूले दत्तचित्त भएर काम गर्ने पनि बताए । उनले आफ्नो उम्मेदवारी घोषणासभामा उपस्थित सबै नेता तथा कार्यकर्ताहरूप्रति हार्दिक कृतज्ञता व्यक्त गरेका थिए । बानियाँका समर्थक काभ्रेका सभापति लामाले नेपालको स्थायी शक्ति नै नेपाली कांग्रेस भएको बताएका छन् । उनले भने, ‘कांग्रेस नै नेपालको स्थायी शक्ति हो । नेपाली जनताले चाहेको समाज यो पार्टीले बनाउन सक्छ भनेर आज तमाम बुद्धिजीवी, फरक–फरक क्षेत्रका चर्चित व्यक्तित्वहरू यसमा लामबद्ध भएर लागेका छन् । यो पार्टीले मात्रै बेरोजगारी अन्त्य गर्न सक्छ भन्ने विश्वास छ ।’
उनले बानियाँलाई जुझारु नेताको रूपमा चित्रण गरे । उनले बानियाँलाई जिताउनका लागि सबैले आ–आफ्नो ठाउँबाट सक्रिय भूमिका खेल्नु पर्ने भन्दै सोहीअनुसार गृहकार्यमा जुट्न पनि आग्रह गरे । त्यस्तै, बानियाँको उम्मेदवारीको समर्थक भक्तपुरका सभापति थापाले पनि बानियाँ योग्य र सक्षम उम्मेदवार भएको भन्दै जिताउनका लागि सबैले भूमिका खेल्नुपर्ने बताए ।
उनले आफूहरूले धेरै लामो छलफलपछि आफूहरूको समूहबाट उक्त प्रदेशका पार्टीको तर्फबाट पनि प्रदेश संसदीय दलका नेता रहेका बानियाँलाई प्रदेशको सभापतिमा उम्मेदवारको रूपमा अघि बढाएको सुनाए । उक्त घोषणा कार्यक्रममा नेताहरू बहादुरसिंह लामा, अर्थराज्यमन्त्री उदयशमशेर राणा, वागमती प्रदेशका सांसद कल्पना नेपाली, नीलकण्ठ नगरपालिकाका मेयर भीमप्रसाद ढुंगाना, ललितपुर जिल्लाका निवर्तमान सभापति मदन अमात्य र रामेछापका सभापति कान्छाराम तामाङलगायत नेताहरूको बाक्लो उपस्थिति थियो ।
