बुटवल– नेकपा माओवादी केन्द्रका अध्यक्ष पुष्पकमल दाहालले पार्टी आगामी आमनिर्वाचनको तयारीमा लागेको बताएका छन् । पार्टीका रूपन्देही इन्चार्ज रामप्रसाद बन्जाडेको श्रद्धाञ्जली सभालाई सम्बोधन गर्दै दाहालले मुलुक चुनावतिर जान लागेको र आफ्नो पार्टीले पनि त्यसको तयारी गरेको बताए । उनले सबै राजनीतिक दलहरू नयाँ नेतृत्व चयनमा लागिरहेको र यसले निर्वाचनको माहोल पनि बनिरहेको बताए ।
‘अहिले सबै राजनितिक दलहरूका महाधिवेशन र अधिवेशन भइरहेकोले निर्वाचनको माहोल बनिरहेको छ, लोकतन्त्रका लागि चुनाव महत्वपूर्ण छ, तर निर्वाचन स्वस्थ, धाँधलीरहित, जनताको पहुँचमा हुनुपर्छ भन्नेतर्फ सबैको ध्यान जानुपर्छ,’ उनले भने । उनले चुनाव धाँधलीरहित, विश्वसनीय र सबैको पहुँचमा हुनुपर्ने धारणा राखेका छन् । ‘चुनावलाई निष्पक्ष र धाँधलीरहित बनाउन दलहरूबीच आपसी समझदारी र सहकार्य जरूरी छ,’ दाहालले भने । उनले मुलुक अहिले अप्ठ्यारो परिस्थितिबाट गुज्रिएको र आफूहरू राजनीतिक स्थायित्व र विकासमार्फत् मुलुकलाई अप्ठ्यारो अवस्थाबाट निकास दिन केन्द्रित भएर लागेको पनि बताए । उनले मुलुकमा राजनीतिक स्थायित्व, विकास र समृद्धिले मात्रै हजारौँ सहिदहरूको सम्मान हुने बताए ।
‘अहिले मुलुक निकै अप्ठ्यारो परिस्थितिबाट गुज्रिरहेको छ, हामी देशलाई नयाँ राजनीतिक स्थायित्व र विकासतिर लैजाने जमर्काेमा छौँ,’ उनले भने । अध्यक्ष दाहालले समाजवादतर्फको यात्राले मात्र मुलुकको समृद्धि र स्थायित्व हुने बताए । उनले मुलुक समाजवाद उन्मुख भइसकेको मुलुकलाई समृद्ध बनाउनका लागि पनि दलहरूबीच सहकार्य जरूरी रहेको बताए । उनले स्वर्गीय बञ्जाडेको कार्यसम्पादन क्षमता अब्बल रहेको स्मरण गर्दै २÷३ महिना अगाडिमात्रै बञ्जाडेले आफूले केन्द्रमा जिम्मेवारी नपाउनुको कारण सोधेपछि मात्र आफू गम्भीर भएको र जिल्लाको इन्चार्जको जिम्मेवारी दिएको बताए ।
आफूले पार्टिभित्र र परिवारमा पनि यस्ता घटना धेरै बेहोरेकै स्मरण गर्दै स्वर्गीय बञ्जाडेको निधनले पार्टिभित्र अपूरणीय क्षति भएको बताए ।
त्यसैगरी, पार्टीका लुम्बिनी प्रदेश इन्चार्ज चक्रपाणि खनाल बलदेवले बञ्जाडेलाई धेरै युद्धमा बचाए पनि दुर्घटनाबाट बचाउन नसकिएको बताए । कार्यक्रममा बोल्ने विभिन्न राजनितिक दलका प्रतिनिधिहरूले माओवादी आन्दोलनका जीवित इतिहासको रूपमा बञ्जाडेको निधनले एउटा कुशल राजनीतिज्ञको अभाव खड्किरहने बताएका थिए ।
