डोटी– संस्कृति, पर्यटन तथा नागरिक उड्डययनमन्त्री पे्रमबहादुर आलेले सुदूरपश्चिम क्षेत्रमा विकास निर्माणका कामको नागरिकस्तरबाट अनुगमन गर्नुपर्ने आवश्यकता औँल्याएका छन् । नेपाल कम्युनिस्ट पार्टी (एकीकृत समाजवादी) ले जोरायल गाउँपालिका–३ मा सोमबार आयोजना गरेको गाउँपालिकास्तरीय भेलामा मन्त्री आलेले सुदूरपश्चिम क्षेत्रमा संघीय सरकार तथा प्रदेश सरकारले विकास निर्माणका लागी थुप्रै बजेट खर्च गरेकोले त्यो बजेट कति कार्यान्वयन भएको छ यसको नागरिकस्तरबाट अनुगमन गर्नुपर्ने सुझाव दिए । उनले भने, ‘सुदूरपश्चिम क्षेत्रमा विकास निर्माणका काम भइरहेकाले ती कामहरू नियमसंगत तरीकाले भए नभएकाबारे नागरिकस्तरबाट अनुगमन हुनुपर्यो ।
उनले सुदूरपश्चिममा पिछडिएर रहेको कला, संस्कृति तथा पर्यटन क्षेत्रमा उल्लेख्य विकास गर्नुपर्ने बताउँदै यहाँको कला, संस्कृति र पर्यटनको क्षेत्रलाई ओझेलमा पर्न दिन नहुने सुझाव दिए । उनले भने, ‘यहाँको कला, संस्कृति र पर्यटनको लागी प्रदेश सरकार र संघीय सरकारले बजेट खर्च गरेको छ । सुदूरपश्चिम प्रदेश सरकारका आन्तरिक मामिला तथा कानूनमन्त्री पूर्णा जोशीले सुदूरपश्चिम क्षेत्रका सबै नागरिक तथा सामान्य परिवारका व्यक्तिले महसुस गर्ने गरी विकास निर्माणका काम भईरहेको बताए । उनले गाउँमा बस्ने विपन्न वर्गका नागरिकले महसुस गर्ने गरी सुदूरपश्चिम प्रदेश सरकारले विकास गर्न थालेको छ । उनले नागरिकले सोचेअनुसारको विकास गर्ने आफुहरूको लक्ष्य रहेको बताए ।
नेपाल कम्युनिस्ट पार्टी (एकीकृत समाजवादी) का जिल्ला अध्यक्ष दीर्घराज बोगटीले सुदूरपश्चिमका अधिकांश नागरिक कामका लागि भारत जाने परिपाटी अहिले पनि कायमै रहेको बताए । उनले गाउँमा काम नहुदाँ युवाहरू प्लायन हुने परिपाटी भएकोले गाउँमै विकासका योजना ल्याउन सुझाव दिए । तत्कालीन संविधानसभा सदस्य हर्कबहादुर सिंहले भने जनताले प्रत्यक्ष अनुभूति पाउने गरी विकास हुनुपर्ने बताए । उनले जनताले विकास चाहेको बताउँदै त्यसकै लागी उनीहरूले प्रत्यक्ष अनुभूति हुने खालका विकासका काममा जोड दिनुपर्ने सुझाव दिए ।
