सौराहा– नेकपा एमालेको चितवनको सौराहामा जारी १०औँ महाधिवेशनमा नेतृत्व चयनका लागि अन्ततः निर्वाचनको साहारा लिइएको छ । सर्वसम्मतिका लागि भएको सबै प्रयत्न काम नलागे पनि नेतृत्व चयनका लागि अन्नतः निर्वाचन गर्नु परेको हो । अध्यक्ष केपी ओलीले सर्वसम्मत नेतृत्व चयनका लागि बन्दसत्रको कार्यक्रम नै रोकेर शनिबार र आइतबार कसरत गरेका थिए । सोहीअनुसार उनले केही नेताहरूलाई व्यवस्थापन गरेर बन्दसत्रमा केन्द्रीय समिति र विभिन्न आयोगका सदस्यहरूको नामावली प्रस्ताव गरेका थिए ।
तर, ओलीको सूचीमा नपरेका नेताहरूले मनोनयन गराएपछि अन्नतः महाधिवेशन निर्वाचनतर्फ धकेलिएको हो । सर्वसम्मतिको प्रयास गरेको ओली आफैँ सर्वसम्मत हुन सकेनन् । उनलाई उपाध्यक्ष भीम रावलले चुनौती प्रस्तुत गरेका छन् । अन्य वरिष्ठ उपाध्यक्षमा ईश्वर पोखरेल, महासचिवमा शंकर पोखरेल, उपमहासचिवहरू प्रदीप ज्ञवाली, पृथ्वी सुब्बा गुरुङ र विष्णु रिमाल निर्विरोध भएका छन् । अन्य केही क्लष्टरहरूमा पनि ओलीको सूचीअनुसार निर्विरोध भएको छ । केन्द्रीय सदस्यमा प्रस्तावित लालबाबु पण्डितले भने सो पद अस्विकार गरेका छन् ।
सोमबार उम्मेदवारी दर्ता गराएपछि दिनभर नेताहरू प्रतिनिधिहरूसँग मत माग्न व्यस्त बनेका थिए । अध्यक्षका प्रत्यासी रावलले आफूले जिते पार्टीलाई एकतावद्ध बनाउँदै आगामी निर्वाचनमा बहुमत दिलाउने प्रतिवद्धतासहित मत मागेका थिए । पार्टीको निर्वाचन आयोगले सोमबार राति ९ बजेदेखि राति १ बजेसम्म मतदानको समावधि तोके पनि यो समाचार पार्दासम्म मतदान सुरु हुन सकेको छैन । एमालेले यसपटक विद्युतीय मेसिनमार्फत भोटिङ गर्दै छ ।
यो हो ओलीको सूची
एमालेको १०औँ महाधिवेशनअन्तर्गत दोस्रो दिनको बन्दसत्रमा अध्यक्ष ओलीले ३०१ सदस्यीय केन्द्रीय कमिटीको सूची पेस गरेका थिए । ओलीले पेस गरेको ३०१ जना केन्द्रीय कमिटी सदस्यको सूची एमाले महाधिवेशनको बन्दसत्रले अनुमोदन गरेको थियो । आइतबार राति पौने १ बजे प्रस्तुत नामहरू अनुमोदनका लागि ओलीले ताली बजाउन भनेका थिए । लगत्तै बन्दसत्रले ताली बजाएको थियो । एमाले केन्द्रीय कमिटीमा विभिन्न समूहबाट प्रतिनिधित्व हुने व्यवस्था छ । खुला प्रतिस्पर्धाअन्तर्गत महिला ५३ र खुला ८४ गरी १३७ जनाको प्रतिनिधित्व हुनेछ । भौगोलिक क्षेत्रअन्तर्गत ४४ खुला २३ महिला गरी ६७ जना हुनेछन् । ७ प्रदेश (प्रत्येक प्रदेशबाट ६ खुला र ३ महिला गरी) ६३ जना तथा उपत्यका विशेष २ जना (१ खुला र १ महिला) र सम्पर्क समन्वय (१ खुला र १ महिला)को प्रतिनिधित्व हुनेछ ।
समावेशीतर्फत खुला ५४ र महिला २४ जना गरी ७८ जनाको प्रतिनिधित्व हुने व्यवस्था एमालेको विधानमा छ । जसअन्तर्गत आदिवासी जनजाति १७ खुला र महिला गरी २५ जना, मधेसी १३ खुला र ६ महिला गरी १९ जना, दलित ८ खुला र ४ महिला गरी १२ जनाको प्रतिनिधित्व हुने व्यवस्था छ । यस्तै, थारु ५ खुला र २ महिला गरी ७ जना, मुस्लिम ४ खुला र १ महिला गरी ५ जना, श्रमिक ४ खुला र २ महिला गरी ६ जना तथा पिछडिएको क्षेत्र ३ खुला र १ महिला गरी ४ जनाको प्रतिनिधित्व हुनेछ ।
ओलीले बन्दसत्रमा पेस गरेको सूचीको अध्यक्षमा केपी ओली, वरिष्ठ उपाध्यक्षमा ईश्वर पोखरेल, उपाध्यक्षमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा, विष्णु पौडेल र सुवासचन्द्र नेम्वाङ, महासचिवमा शंकर पोखरेल, उपमहासचिवमा प्रदीप ज्ञवाली, पृथ्वी सुब्बा गुरुङ, विष्णु रिमाल, सचिवमा टोपबहादुर रायमाझी, रघुवीर महासेठ, छविलाल विश्वकर्मा, लेखराज भट्ट, योगेश भट्टराई, गोकर्ण विष्ट र पद्मा अर्याल छन् ।
जसका कारण निर्वाचन भयो
एमालेका अध्यक्ष ओलीले केन्द्रीय कमिटी र विभिन्न केन्द्रीय आयोगका पदाधिकारी र सदस्यको सूची दोस्रो दिनको बन्दसत्रमा प्रस्ताव गरेका थिए । सर्वसम्मतिसहित ती नामहरू पारित हुने अपेक्षा थियो । तर, निर्वाचन प्रक्रियामा जाँदा ओली आफैँले अध्यक्षमा रावलको चुनौती सामना गर्नु परिरहेको छ भने अन्य पदमा पनि उनले प्रस्ताव गरेभन्दा बढीको उम्मेदवारी परेको छ । उपाध्यक्षमा घनश्याम भूसालले ओलीले प्रस्ताव गरेका ७ जनाविरुद्ध उम्मेदवारी दिएका छन् । सचिवमा टंक कार्की र भीम आचार्यले उम्मेदवारी दिएपछि निर्वाचन भएको छ ।
आदिवासी जनजातितर्फ १७ जनाको कोटा रहेको थियो । ओलीले १७ जनाकै नाम सार्वजनिक गरेका थिए, तर निर्माण बुढा र सुवास कर्माचार्यले समेत उम्मेदवारी दिँदा चुनाव हुने भएको छ । सम्पर्क समन्वयको महिला कोटामा ओलीले कल्पना थापाको नाम प्रस्ताव गरे, तर जानुका रोकाले उनका विरुद्ध उम्मेदवारी दिएकी छन् । मधेसीतर्फ १३ जनाको कोटा थियो । ओलीले १३ जनाकै नाम हलमा पढेर सुनाइए पनि बिल्टु यादव र शम्भुप्रसाद गुप्ताले ती नामलाई स्वीकार्न नसकिने भन्दै उम्मेदवारी दिएका छन् ।
८ जना निर्वाचित हुने दलित कोटामा १० जनाको उम्मेदवारी परेको छ । नरबहादुर विक र अनुभूति वम नेपालीले ओलीको प्रस्ताव बाहिरबाट दाबी गरेका हुन् । थारु खुलामा पाँचजनाको कोटा छ, तर जयप्रकाश थारुले ओलीको सूची बाहिरबाट उम्मेदवारी दिएर निर्वाचनमा जान बाध्य पारेका छन् । समावेशीतर्फत मुस्लिममा ४ जनाको कोटा छ । ओलीले प्रस्ताव गरेका ४ जनाबाहेक इसलाम हवारी र नजिर मियाले पनि उम्मेदवारी दिएका छन् ।
