काठमाडौं– नेकपा माओवादी केन्द्रले शनिबार देशैभर एकसाथ पालिका अधिवेशन सम्पन्न गरेको छ । आगामी पुसमा महाधिवेशन गर्ने तयारीमा रहेको माओवादी केन्द्रले शनिबार सबै पालिकामा एकसाथ अधिवेशन सम्पन्न गरेको हो । अधिकांश स्थानमा उद्घाटनसत्र सम्पन्न गरेर नेतृत्व चयनको प्रक्रिया चलिरहेको माओवादीका केन्द्रीय कार्यालय सचिव श्रीराम ढकालले जानकारी दिए ।
उनका अनुसार धेरैजसो जिल्लाका पालिकामा सर्वसम्मत तरिकाले नेतृत्व चयन भएको छ भने केहीमा स्वस्थ प्रतिस्पर्धाबाट पनि निर्वाचित भएका छन् । आइतबारसम्ममा सबै पालिकाको नेतृत्व चयन भइसक्ने उनले जानकारी दिए । पालिका अधिवेशन माओवादी केन्द्रका अध्यक्ष पुष्पकमल दाहालले भर्चुअल माध्यमबाट एकसाथ उद्घाटन गरेका थिए । पालिका अधिवेशन उद्घाटनका क्रममा अध्यक्ष दाहालले माओवादी केन्द्रलाई विचार, सिद्धान्त र व्यवहारमा क्रान्तिकारी बनाउने दृढता व्यक्त गरेका छन् ।
पछिल्ला दिनमा माओवादीप्रति जनताको आकर्षण थप बढेको उल्लेख गर्दै उनले विगतमा रहेको अलमलसमेत सकिएको र आगामी दिनमा नयाँ आधारमा जनतामा स्थापित भएरै छाड्ने विश्वास व्यक्त गरे । उनले पार्टीलाई आफ्नै खुट्टामा उभिने क्रान्तिकारी पार्टी बनाउने क्रम सुरु भइसकेको जानकारी दिँदै हालसम्म केन्द्रीय कार्यालयमा झण्डै आठ लाख सक्रिय पार्टी सदस्यको नामावली प्राप्त भइरहेको र प्रक्रियामा रहेका झण्डै दुई लाख गरी १० लाख बराबरको सक्रिय सदस्य पुग्ने अवस्था देखिएको जानकारी दिए ।
माओवादी पार्टी पुनः मुलुकको पहिलो पार्टी बन्ने उल्लेख गर्दै उनले विचार, राजनीति र संगठनमा रहेको अलमलसमेत अब सकिएको स्पष्ट पारेका छन् । संगठनात्मक अभियानलाई क्रियाशीलताका साथ अगाडि बढाएपछि तराई–मधेसदेखि हिमाली जिल्लामा समेत पार्टीप्रतिको आकर्षणमा थप वृद्धि भएको उनको भनाइ छ । डोल्पा, भोजपुर, रौतटह र सर्लाहीलगायत जिल्लामा भएका जनसभालगायतबाट पनि पार्टीप्रति जनताको विश्वासमा वृद्धि भएको आफूले पाएको अध्यक्ष दाहालले उल्लेख गरेका छन् ।
पार्टीमा महिलाको सहभागिता बढाएर ३५ प्रतिशत पु¥याइएको, युवाको प्रतिनिधित्व २० प्रतिशत रहने गरी सुनिश्चितता गरिएको तथा समावेशी तथा समानुपातिक प्रतिनिधित्वलाई विशेष प्राथमिकतामा राखिएका कारण जनताले माओवादी नै भरोसायोग्य पार्टी भएको विश्वास गरेको उनको भनाइ छ । अध्यक्ष दाहालले पार्टीलाई नयाँ शिराबाट उठाउने विश्वास दिलाएका कारण माओवादीमा बुद्धिजीवी, युवा, मजदुर, किसान र विभिन्न पार्टीका नेता तथा कार्यकर्ताको आकर्षण बढेको दाबी गरे । नेकपा एमाले महाधिवेशनतर्फ संकेत गर्दै विचार र राजनीतिक कार्यदिशाको अभावमा आयोजना गरिने सम्मेलन र महाधिवेशन कुम्भ मेलाजस्तो देखिने तर्क गरे । उनले भने, ‘जहाँ विचार र छलफलका लागि ठाउँ छैन । तर, जनतालाई भ्रम दिने कोसिस भइरहेको छ । त्यस्ता सम्मेलनको कुनै अर्थ हुँदैन ।’
संविधान, संघीय लोकतान्त्रिक गणतन्त्र उल्ट्याउने षड्यन्त्रका साथ प्रतिनिसिभाको विघटन गरिएको र परिवर्तनका सबै एजेन्डालाई ध्वस्त पार्न खोजिएका कारण जनताले बाध्य भएर त्यसको प्रतिवाद गरेको उनको भनाइ छ । उनले भने, ‘प्रतिगमनप्रति गरिएको प्रतिवादका कारण आजको अवस्थामा हामी छौँ, यो हामी सबैका लागि खुसी र गर्वको कुरा हो ।’ समाजवादी क्रान्ति गर्न लायक पार्टी बनाउने संकल्प गरेको जानकारी दिँदै उनले समाजवादी क्रान्तिको मोडेल, आर्थिक, राजनीतिक र सांस्कृतिक नीति निर्माण गर्ने नीति र योजनाको संकल्प गरिएको बताएका छन् । पछिल्लोपटक प्रतिगमन विरोधी वर्गसंघर्षमा प्राप्त गरेको सफलताका आधारमा र विचार निर्माणका लागि लिइएको दिशा निर्देशन र प्रतिवद्धतालाई कार्यान्वयन गर्न पनि सोहीअनुसारको नेतृत्व आवश्यक रहेकाले सोही दिशामा केन्द्रित हुन पार्टीका नेता तथा कार्यकर्तालाई आग्रह गरे ।
