काठमाडौं– राष्ट्रिय प्रजातन्त्र पार्टी (राप्रपा)को काठमाडौंमा सम्पन्न हुने एकता महाधिवेशनको सरगर्मी बढेसँगै उम्मेदवार बन्नेहरू पनि मैदानमा खुल्न थालेका छन् । मंसिर १५–१६ र १७ गते हुने महाधिवेशनमा राप्रपाका संस्थापक सदस्य, हालका केन्द्रीय सदस्य महामायाप्रसाद सिंहले मधेसी कोटाबाट केन्द्रीय सदस्यमा उम्मेदवारी दिने भएका हुन् ।
शान्तिप्रिय नेपाली परम्परालाई संरक्षण गर्न, चार वर्ण, छत्तीस जातबीचको एकता जोगाइराख्न, संवैधानिक राजसंस्था र हिन्दू अधिराज्य पुनर्बहालीका निम्ति आफ्नो उम्मेदवारी भएको उनले बताएका छन् । सप्तरी जिल्लाका खारिएका नेता सिंहले सप्तरी सुरुदेखि नै राष्ट्रवादी जिल्ला भए पनि केन्द्रले कदर नगरेर साथीहरूको मनोबल गिरेको बताए । तर भोलिका दिनमा सम्पूर्ण राष्ट्रवादीहरू मिलेर सप्तरीको राष्ट्रवादी पहिचान जोगाउने प्रष्ट्याए । ‘सप्तरीबाट पार्टीले मन्त्री र उपसभामुख बनाएका व्यक्तिहरूको विगत राष्ट्रवादी थिएनन् । विभिन्न पार्टीबाट आएका थिए, पुनः विभिन्न पार्टीमै फर्किए । तर, पनि हाम्रो उहाँहरूप्रति सम्मान छ,’ सिंहले भने, ‘केन्द्रले राष्ट्रवादीहरूसँग काम लियो, असल राष्ट्रवादीलाई चिन्न सकेन ।’
मुलुकको बिग्रिएको अवस्थालाई सम्हाल्न सक्ने राष्ट्रवादी पार्टी राप्रपा भएकाले नेपाल र नेपालीको पहिचान स्थापित गर्न राप्रपा आजको आवश्यकता भएको सिंहको निष्कर्ष छ । विश्वको एक मात्र हिन्दू अधिराज्य, विश्वका सवा अर्ब हिन्दूहरूको सहानुभूति भएको देश नेपाललाई राप्रपाले हिन्दू अधिराज्य बनाएरै छाड्ने उनको ठोकुवा छ । २ नम्बर प्रदेशमा राप्रपाका विभिन्न तहका पदाधिकारी निर्विरोध निर्वाचित गराउन भूमिका खेलेका सिंहले आप्mनो केन्द्रीय सदस्यमा उम्मेदवारीतर्फ इंगित गर्दै थपे, ‘मैले सबै जात, सबै साथी, सबै राष्ट्रवादीहरूलाई समेटेर अघि बढेको छु, मैले देश, जनता, पार्टी र राष्ट्रियताको हितमा काम गरेको छु भन्ने मलाई आसा छ, मेरो जीत सुनिश्चित छ । मलाई विश्वास छ, नेपाली दाजुभाइ, दिदीबहिनीहरूले मलाई सम्मान गर्नुहुनेछ ।’
राष्ट्रिय प्रजातन्त्र पार्टी (राप्रपा)मा सबैलाई समेट्ने र सबैलाई सम्मान गर्ने नेताको छवि बनाएका महामायाप्रसाद सिंहले आशन्न अधिवेशनमा अध्यक्ष पदमा आकांक्षी थुप्रै देखिएको प्रति लक्षित गर्दै ‘पार्टीहरूले परम्परा छाड्दा आज देशको हालत के भयो ?’ प्रश्न गरे । राप्रपा सम्बद्र्धनवाद परम्परावादी पार्टी भएकाले परम्परा बिर्सनु नहुने उनको तर्क छ ।
