खोटाङ– प्रदेश नम्बर १ का प्रमुख परशुराम खापुङले जैविक कृषि र व्यवहारिक शिक्षाका माध्यमबाट अरब जाने युवालाई स्वदेशमै रोक्न सकिने बताएका छन् । दिक्तेल रूपाकोट मझुवागढी नगरपालिका–२ सोल्मास्थित शुभद्रा मदन फाउण्डेसनले निर्माण गरेको शुभम् ट्रेडिङ सेन्टर तथा जैविक क्याफे भवन, कस्टम हायरिङ सेन्टर र होमस्टेको उद्घाटन समारोहमा उनले यस्तो बताएका हुन् ।
उनले हाम्रो समाजमा यथेष्ट प्राकृतिक सम्पदाहरू भएको र त्यसको उचित व्यवस्थापन गर्न सके स्वेशमै रोजगारी सिर्जना गर्न सकिने बताए । उनले यसका लागि व्यवहारिक शिक्षा पनि उक्तिकै आवश्यक रहेको बताए । उनले भने, ‘जैविक कृषि र व्यवहारिक शिक्षाको माध्यमबाट रोजगारी सिर्जना गर्नसके देशका नौजवान रोजगारीका लागि अरब जान नपर्ने स्थिति आउँछ ।
उक्त फाउण्डेसनले यसैलाई दृष्टिगत गरी वैकल्पिक शिक्षा अभियान सञ्चालन गरेको छ । यसले देशको भविष्यका साथै जनताको सुख, शान्ति र समृद्धि र रोजगारीमा पनि सघाउने प्रदेश प्रमुख खापुङको विश्वास छ । उनले अहिले रोजगारीका लागि युवा विदेशिन बाध्य भइरहेको भन्दै भने, ‘हामीले प्रयास ग¥यौँ भने अहिलेकोजस्तो बाध्यात्मक अवस्था अन्त्य हुन्छ ।’
शुभम् ट्रेडिङ सेन्टर तथा अर्गानिक क्याफे भवन निर्माणका लागि प्रदेश सरकारको २० लाखका साथै फाउण्डेनको लगानी तथा श्रमदान गरी करिब ८० लाख खर्च भएको जनाइएको छ । फाउण्डेशनले विभिन्न जिल्लाका असहाय तथा गरिब बालबालिकालाई जम्मा गरेर व्यवहारिक शिक्षा दिँदै आएको छ । कुटोकोदालोदेखि कम्प्युटरसम्मको शिक्षा दिँदै आएको फाउण्डेशनमा विभिन्न ५२ जिल्लाका २०० जना विद्यार्थी अध्ययनरत छन् ।
उक्त भवन आन्तरिक तथा बाह्य पर्यटकलाई लक्षित गरेर मध्यपहाडी लोकमार्गमा निर्माण गरिएको छ । व्यवहारिक शिक्षा लागू गरिएको शुभम् फाउण्डेशन घुम्न आउने पर्यटकका लागि नजिकै रहेको पुरानो घरलाई मर्मत गरेर घरबास सञ्चालनमा ल्याइएको हो ।
