चितवन– जनता समाजवादी पार्टी नेपालका अध्यक्ष उपेन्द्र यादवले कार्यपालिकाले न्यायपालिकामा हस्तक्षेप गर्नाले नै समस्या सिर्जना भएको बताएका छन् । शनिबार आफ्नो धारणा व्यक्त गर्न पत्रकार सम्मेलनको आयोजना गर्दै उनले कार्यपालिकाले न्यायपालिकामाथि हस्तक्षेप गरे त्यो स्वतन्त्र न्यायपालिका रहन नसक्ने बताए । उनले भने, ‘न्यायपालिकाले स्वतन्त्र रूपमा काम गर्न सक्नुपर्छ, कसैको पनि हस्तक्षेप हुनुहुँदैन ।’
अध्यक्ष यादवले सरकारले न्यायपालिकाको विवाद मिलाउने विषयमा चासो राखेको भए पनि त्यसलाई हस्तक्षेप गरेको भन्न नमिल्ने पनि बताए । उनले कार्यपालिकाले हस्तक्षेप गर्यो भने अन्तर्राष्ट्रिय जगतमा पनि लोकतन्त्रका लागि राम्रो नमानिने बताउँदै कार्यपालिकाले न्यायपालिकामा हस्तक्षेप गर्न नहुने सुझाव दिए ।
उनले प्रधानन्यायाधीशका विषयमा दलले भन्नुभन्दा पनि न्यायाधीश र अधिवक्ता बसेर यसको समाधान खोज्नुपर्ने भन्दै न्यायलयको आफ्नै पद्धति हुन्छ, न्यायलयमा अहिले देखिएको समस्या छिट्टै हल होस् र न्याय निरूपणको काम होस् भन्ने हाम्रो आफूहरूको चाहना रहेको बताए । न्यायपालिका आफँै एउटा संवैधानिक व्यवस्था भएको संस्था रहेको उल्लेख गर्दै उनले राजनीतिक सत्ता र शक्तिको प्रभावबाट यो संस्था स्वतन्त्र र अलग रहनुपर्ने बताए । उनले अब चाँडै नै संसद बोलाउनु पर्ने विचार राखे । हाल संसद समक्ष धेरै विधेयक रहेकाले त्यसलाई पारित गरेर अघि बढ्न सुझाव दिँदै संसद बोलाउने अधिकार मन्त्रिपरिषद्को कार्यक्षेत्रभित्र पर्ने भएकाले अनुकूलता मिलाएर बोलाउन उनले आग्रह गरे ।
