काठमाडौं– नेकपा एमाले दशौँ राष्ट्रिय महाधिवेशनको संघारमा छ । गत भदौमा विधान महाधिवेशन सम्पन्न गरिसकेको एमालेले १०–१२ मंसिरमा नेतृत्व चयनका लागि चितवनमा महाधिवेशन आयोजना गर्दैछ । चितवन महाधिवेशनका लागि जिल्ला तथा जनवर्गीय संगठनहरूबाट समेत महाधिवेशन प्रतिनिधि चयन भइसकेका छन् । एकाध जिल्लाबाहेक अधिकांशमा सर्वसम्मत महाधिवेशन प्रतिनिधिहरू चयन गरिएका छन् ।
एमालेले यो महाधिवेशनबाट सर्वसम्मत नेतृत्व छनोट हुने बताइरहेको छ । तत्कालीन वरिष्ठ नेता माधवकुमार नेपालको नेतृत्वमा पार्टी विभाजन भएको हुनाले र नेकपा माओवादी केन्द्रसँगको एकता भंग भएको कार्यकर्तामा उत्साह भर्नका लागि एमालेले सर्वसम्मत नेतृत्व चयनमा जोड दिइरहेको छ । सोहीअनुसार अध्यक्ष केपी ओलीले महाधिवेशन प्रतिनिधि छान्दा अधिकतम सहमति गरेर सर्वसम्मत रूपमा छान्न आग्रह गरेका थिए । ओलीको सोही आग्रहका कारण पनि अधिकांश स्थानमा नेताहरूले सर्वसम्मतिले प्रतिनिधि चयन गरेका थिए ।
पार्टीको महाधिवेशनमा अन्य पदाधिकारीमा निर्वाचन हुनसक्ने भनिएता पनि कमसेकम अध्यक्ष पदमा ओली सर्वसम्मत निर्वाचित हुने अपेक्षा एमालेजनले गरिरहेका छन् । अधिकांश प्रभावशाली नेताहरूले समेत अध्यक्ष ओलीको विकल्प नभएको भन्दै उनी नै फेरि अध्यक्ष बन्ने बताइरहेका बेला उपाध्यक्ष डा. भीमबहादुर रावलले आइतबार आफूले अध्यक्ष पदमा उम्मेद्वारी दिने घोषणा गरेका छन् । उनको घोषणासँगै एमालेको अध्यक्षमा ओली निर्विरोध निर्वाचित हुने संभावना सकिएको छ । यद्यपि, रावलले यसबीचमा उम्मेद्वारी नदिने मनस्थिति बनाएमा ओली फेरि पनि सर्वसम्मत अध्यक्ष बन्न सक्नेछन् ।
हुन त अध्यक्ष ओली आफैँले फेरि पार्टी र सरकारको नेतृत्वमा नदोहोरिने प्रतिवद्धता व्यक्त गर्ने गरेका थिए । उनले ‘आफूले कुनै पनि कक्षा दोहो¥याएर नपढ्ने’ भन्दै अब फेरि पार्टी र सरकारको नेतृत्व नलिने बताइरहेका बेला दुईपटक सरकारको नेतृत्व गरिसकेका छन् भने दोस्रोपटक पार्टीको नेतृत्वमा पुग्ने तयारीमा छन् । उनको उक्त प्रतिबद्धताका विषयमा भने ‘कक्षा नै सकिएकाले दोहोरिने परेको’ जवाफ दिने गरेका छन् । उनीनिकट नेताहरूले पार्टी विभाजनको असर कम गर्न ओलीले रहरले भन्दा पनि बाध्यताले फेरि पार्टी र देशको नेतृत्व गर्नुपर्ने अवस्था सिर्जना भएको बताउने गरेका छन् । अधिकांशले ओलीविरुद्ध दशौँ महाधिवेशनमा कसैले उम्मेद्वारी नदिने अनुमान गरेका थिए । नेता लालबाबु पण्डितले त ‘ओलीविरुद्ध उम्मेद्वारी दिनेको जमानत नै जफत हुने’ दाबी गरिसकेका छन् । यस्तो अवस्थामा पार्टी विभाजनपूर्व वरिष्ठ नेता माधवकुमार नेपालनिकट रहेको डा. रावलले ओलीविरुद्ध अध्यक्ष पदमा उम्मेद्वारी दिने घोषणा गरेका हुन् ।
नेपालनिकट उपाध्यक्ष डा. रावल अध्यक्ष ओलीसँग १० बुँदे सहमति गर्दै विभाजनको पक्षमा नलागी पार्टीमै रहेका थिए । ओलीको कटु आलोचकमध्येका एक उनले विभाजनका बेला नेपाललाई साथ नदिएपछि उनको चर्को आलोचना भएको थियो । नेपालपक्षमा लाग्ने नेताहरूले सबैभन्दा धेरै डा.रावलको आलोचना गर्ने गरेका थिए । उनले यसबीचमा अध्यक्ष ओलीले सहमतिअनुसार १० बुँदे कार्यान्वयन नगरेको भन्दै पार्टीभित्रै पनि पटक–पटक असन्तुष्टि जाहेर गरिसकेका छन् । १० बँुदे सहमति कार्यान्वयनका लागि बनाएको कार्यदलको संयोजक रहेका उनले सो पदबाट समेत राजीनामा गरिसकेका छन् । मुख्यतः सुदूरपश्चिममा माओवादी केन्द्र पृष्ठभूमिका लेखराज भट्ट र उनीबीच प्रतिष्पर्धा बढेको छ । दुईजनामध्ये को इन्चार्ज भन्ने विवाद जारी छ । १० बुँदे सहमतिअनुसार पार्टी २ जेठ ०७५ अघिको अवस्थामा फर्किदा डा.रावल नै इन्चार्ज हुने छन् । तर, अध्यक्ष ओलीले भट्टलाई सुदूरपश्चिमको इन्चार्ज बनाएर सोहीअनुसार जिम्मेवारी पनि तोकेपछि उनी असन्तुष्ट रहँदै आएका हुन् । उनीसँगै १० बुँदे सहमतिपछि पार्टीमा फर्किएका अन्य ‘९ भाइ’ले अध्यक्षमा ओली नै निर्वाचित हुने बताइरहँदा डा.रावलले अध्यक्ष पदमा उम्मेद्वारी घोषणा गरेका हुन् ।
आइबार रिपोर्टस् क्लबमा पत्रकार सम्मेलनको आयोजना गरेर डा.रावलले अध्यक्षमा उठ्ने बताएका छन् । ‘मैले राजनीतिक जीवनको आरम्भदेखि नै नै उठाउँदै आएको पार्टीको विधि, पद्धति, उद्देश्य, लक्ष्य, देशभक्ति र सिद्धान्तको झण्डालाई निष्ठा र दृढताका साथ फहराई रहन अघि बढ्ने संकल्प गरेको छु’, उनले भने, ‘यही दृढ संकल्पका साथ पार्टीको विधान महाधिवेशनबाट पारित दस्तावेजमा उल्लेखित र अनुल्लेखति वा स्पष्ट गर्नुपर्ने उद्देश्य, लक्ष्य र मान्यताको आधारमा २०७८ साल मंसिर १० देखि १२ गतेसम्म चितवन जिल्लामा हुने नेकपा (एमाले) को दशौँ राष्ट्रिय महाधिवेशनमा केन्द्रीय कमिटीको अध्यक्ष पदमा उम्मेद्वारी दिने घोषणा गर्दछु ।’
उनले ओलीलाई फेरि अध्यक्षमा दाबी नगर्न आग्रह गरेका छन् । पार्टी अध्यक्ष र देशको प्रधानमन्त्री भएर गर्न सक्ने काम गरेको भन्दै डा. रावलले भने, ‘उहाँ स्वयंले केही पहिले नेतृत्व हस्तान्तरण गर्ने र पुनः अध्यक्ष पदमा नदोहोरिने घोषणा गर्नु भएको हो । त्यसको सम्मानका लागि पनि उमेर र सबै दृष्टिकोणले परिपक्क भएकाले मैले अध्यक्षका लागि उग्रसर हुनु उचित सम्झिएको छु ।’ पार्टीमा फुट भएको बेला अरुबाट परिस्थितिको सामना गर्न कठिनाई हुन्छ कि भन्ने लागेको भए ढुक्क भएर आफूमाथि भरोसा गर्न समेत उनले ओलीलाई आग्रह गरे । उनले अघि भने, ‘मैले अध्यक्ष पदको जिम्मेवारी पाए भने उहाँको अनुभव, ज्ञान र दक्षतालाई पार्टीको विकास, विस्तारका लागि सदुपयोग गर्न तत्पर छु ।’ अध्यक्ष पदमा आफ्नो उम्मेद्वारीलाई सहज रूपमा लिन र आफूप्रति सद्भाव प्रकट गर्न समेत उनले अध्यक्ष ओली र अरु नेताहरूलाई आग्रह गरेका छन् ।
डा.रावलले थापाथलीस्थित पार्टी कार्यालयबाटै उम्मेद्वारी घोषणा गर्न चाहेको ठाउँ नपाएको गुनासो गरे । पार्टी महासचिवले महाधिवेशनका कारण कुनै पनि कक्ष खाली नभएको जानकारी पाएपछि बाहिर पत्रकार सम्मेलन गर्नु परेको उनले बताए । यसअघि नवौँ महाधिवेशनमा रावल सर्वाधिक मत ल्याएर उपाध्यक्ष पदमा विजयी भएका थिए । एमालेको नवौँ महाधिवेशनमा २ हजार १५२ जनाले मतदान गर्दा रावलले १ हजार १४३ मत ल्याएर उपाध्यक्षमा विजयी भएका थिए ।
