काठमाडौं– भारतीय योगगुरु बाबा रामदेव बिहीबारदेखि नेपाल भ्रमणमा छन् । नेपालबाट प्रशारण सुरु गरेको दुईवटा टेलिभिजन च्यानलको उद्घाटन गर्न आएका रामदेवलाई सरकारकै तर्फबाट अस्वभाविक महत्व दिइएको हो । शुक्रबार उनले मण्डिखाटारस्थित पताञ्जलीको कार्यालयमा एक कार्यक्रमका बीच दुईवटा टेलिभिजनको प्रशारण आरम्भ गरेका थिए । ‘पताञ्जली नेपाल’ र ‘आस्था नेपाल’ नामको दुईवटा टेलिभिजनको उद्घाटन कार्यक्रममा प्रधानमन्त्री शेरबहादुर देउवाका अतिरिक्त परराष्ट्रमन्त्री नारायण खड्का, पर्यटनमन्त्री पे्रमबहादुर आलेलगायत मन्त्रीहरू समेत पुगेको थिए ।
सरकारमा मन्त्रीहरू मात्र होइनन्, सबैजसो दलका शीर्ष नेताहरू पनि कार्यक्रममा पुगेका थिए । नेकपा माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जनता समाजवादीका अध्यक्ष उपेन्द्र यादवलगायत शीर्ष नेता कार्यक्रममा पुगेका थिए । नेकपा एमालेका अध्यक्ष केपी ओलीलाई पनि निमन्त्रणा गरिए पनि आफू अस्वस्थ्य रहेको भन्दै उनी अनुपस्थित रहेका थिए । उक्त अवसरमा माओवादी केन्द्रका अध्यक्ष दाहालले बाबा रामदेव आफूजस्तै क्रान्तिकारी भएको बताएका थिए ।
उनले प्रशारण सुरु गरेको टेलिभिजनले नेपालमा प्रशारण अनुमति नलिएको भन्दै आलोचना भइरहेको छ । यस विषयमा सरकारले आधिकारिक जानकारी दिएको छैन । उल्टै सरकारले नै रामदेवलाई विशेष महत्व दिँदै विभिन्न कार्यक्रम आयोजना गरिरहेका छन् । आइतबार संस्कृति, पर्यटन तथा नागरिक उड्डयनमन्त्री प्रेमबहादुर आलेको सक्रियता तथा मन्त्रालयको आयोजनामा पशुपतिनाथ क्षेत्रस्थित हंशमण्डपमा एकदिने योग शिविरको आयोजना गरिने भएको छ । भारतीय योगगुरु रामदेव तथा आचार्य बालकृष्णको उपस्थितिमा उक्त विशाल योग शिविरको आयोजना हुन लागेको मन्त्रालयले जनाएको छ ।
योग शिविरकै दिन मन्त्री आलेले योगगुरु रामदेव तथा आचार्य बालकृष्णलाई पशुपतिनाथको दर्शन गराउने र मन्त्रालयका तर्फबाट सम्मान गर्ने कार्यक्रम रहेको सहसचिव डा.टोकराज पाण्डेयले जानकारी दिएका छन् । उनले भने, ‘स्वामी रामदेव तथा आचार्य बालकृष्णको समुपस्थितिमा हामीले आइतबार योग शिविरको आयोजना गरेका छौँ, योग गर्ने बानीको विकास गर्नु हाम्रो प्रमुख लक्ष्य हो ।’ मन्त्रालयले आयोजना गर्न लागेको उक्त योग शिविरबाट नेपालीको योग गर्ने र स्वस्थ रहने बानीको विकास हुने र नेपालको पर्यटन प्रवद्र्धन हुने अपेक्षा लिइएको छ । उक्त योग शिविरमा सर्वसाधारणका लागि निःशुल्करूपमा प्रवेशको व्यवस्था मिलाइएको जनाइएको छ । शिविरमा दशौँ हजार सर्वसाधारणको सहभागिता हुने मन्त्रालयको अपेक्षा छ ।
प्रधानमन्त्रीसहितका मन्त्री र प्रमुख राजनीतिक दलका शीर्ष नेताहरूले मात्रै होइन मन्त्रालयकै तर्फबाट बाबा रामदेवलाई अस्वाभाविक महत्व दिइएको टिप्पणी भएको छ । उनी भारतको राजनीतिक विषयमा टिप्पणी गरेको विषयमा विवादमा पर्दै आएका छन् । उनले योग अभ्यास गराउनुको साथै ‘पताञ्जली’ ब्रान्डमा विभिन्न खानेकुरा र शृंगारका सामानसमेत उत्पादन गर्दै आएका छन् । उनको व्यक्तिगतले सम्पत्ति भारतको प्रदेश सरकारको भन्दा बढी भएको भन्दै उनी व्यापारी भएको भन्दै आलोचना गर्नेको समूह पनि ठूलै छ । भारतमा समेत विवादित उनलाई नेपालमा बढी महत्व दिएको हो ।
योगगुरु रामदेवले शनिबार बिहान पनि चन्द्रागिरिमा योग ध्यान तथा प्रशिक्षण गराएका थिए । बिहीबार नेपाल आएका भारतीय योगगुरु रामदेव बाबा शुक्रबार राति चन्द्रागिरि रिसोर्टमा बसेका थिए । शुक्रबार साँझ त्यहाँ पुगेका उनलाई चन्द्रागिरि हिल्स लिमिटेडका अध्यक्ष चन्द्रप्रसाद ढकाललगायतले स्वागत गरेका थिए । रामदेव बाबा र पतञ्जलि योगपीठका आचार्य बालकृष्णले शनिबार बिहान चन्द्रागिरिमा योग ध्यान तथा योग प्रशिक्षण गराएका हुन् । शनिबार बिहान चन्द्रागिरि डाँडाको स्वच्छ हावामा योग ध्यान तथा योग प्रशिक्षण हुने भएपछि चन्द्रागिरि हिल्स लिमिटेडले बिहान पाँच बजेदेखि नै केबलकार सञ्चालन गरेको थियो । शनिबार बिहान ५ देखि ७ बजेसम्म सो रिसोर्टको हलमा र त्यसपछि बिहान ९ बजेसम्म खुला हावामा सञ्चालन गरिएको योग तथा ध्यान प्रशिक्षण शिविरमा सहभागी हुन योगप्रेमीहरू त्यहाँ पुगेका थिए ।
धार्मिक पर्यटनको निःशुल्क प्रचार गर्छु : रामदेव
भारतीय योगगुरु रामदेव बाबाले नेपाल वैदिक सनातन एव धार्मिक संस्कृतिले धनी अद्वितीय देश हो भन्दै आफूले यहाँको धार्मिक तथा आध्यात्मिक पर्यटनको भारतमा निःशुल्क प्रचार गर्ने बताएका छन् । चन्द्रागिरि डाँडामा योग ध्यान तथा प्रशिक्षण गरेपछि प्रतिक्रिया दिँदै उनले भने, ‘नेपाल पशुपतिनाथ, मुक्तिनाथको देश भएको, यो सीता माता र भगवान गौतमबुद्ध जन्मिएको धर्ती हो भन्दै आफूले नेपालको यो धार्मिक तथा आध्यात्मिक पर्यटनको व्यापक प्रचार गर्ने बताएका हुन् । उनले भने, ‘म निःशुल्क प्रचार गर्छु ।’
उनले नेपालमा आएर यस्ता पक्षको अध्ययन गर्न तथा धार्मिक पर्यटनका साथै यहाँको हिमालय क्षेत्र र स्वच्छ हावापानीबाट लाभान्वित हुन भारतीय पर्यटकलाई आग्रह पनि गरेका छन् । नेपाल कैयौँ ऋषिमुनिको जन्मभूमि र तपोभूमि भएको स्मरण गर्दै उनले नेपालको धर्ती योग तथा ध्यानका लागि संसारकै उत्कृष्ट धर्ती भएको दाबी गरेका छन् ।
