काठमाडौं– प्रमुख राजनीतिक दलहरू नेकपा एमाले र नेपाली कांग्रेससँगै नेकपा माओवादी केन्द्र पनि महाधिवेशनमा होमिएको छ । एमाले महाधिवेशनको संघारमा छ । विधान महाधिवेशन सम्पन्न गरिसकेको एमालेले नेतृत्व चयनका लागि १० देखि १२ मंसिरसम्म चितवनमा महाधिवेशन गर्दै छ । त्यस्तै कांग्रेसको पनि अधिकांश जिल्लामा वडा, पालिकार प्रदेशसभा अधिवेशन सम्पन्न भइसकेको छ भने केही जिल्लामा जिल्ला सम्मेलनसमेत भइसकेको छ । काग्रेसले २४–२६ मंसिरमा काठमाडौंमा महाधिवेशन गर्दै छ ।
आगामी ११–१३ पुसमा काठमाडौंमा महाधिवेशन गर्ने कार्यतालिका बनाएको माओवादी केन्द्रले शनिबार देशभर एकसाथ वडा अधिवेशन सम्पन्न गरेको छ । माओवादी केन्द्रले शनिबार देशभरका ६ हजार ७४३ वटै वडामा अधिवेशन सम्पन्न गर्न निर्देशन दिएको थियो । पार्टीको निर्देशनअनुसार अधिकांश वडामा शनिबार वडा अधिवेशन सम्पन्न भएको सो पार्टीले जनाएको छ । सबै वडाका जानकारी प्राप्त हुन नसके पनि सबैजसो वडामा अधिवेशन भएको बताइएको छ ।
पार्टीका प्रवक्ता कृष्णबहादुर महराका अनुसार काठमाडौं उपत्यकाकाको काठमाडौं, ललितपुर र भक्तपुरका सबै वडामा सम्मेलन सम्पन्न गरिएको छ । ललितपुरको ललितपुर महानगरपालिका, गोदावरी र महालक्ष्मी नगरपालिकासहित वाग्मती, महाकाँल र कोञ्ज्योसोम गाउँपालिकाका सबै वडामा अभिवेशन सम्पन्न भएको छ । ललितपुर जिल्लामा ७१ वडा छन् । सबै वडामा पार्टीको अधिवेशन सम्पन्न भएको ललितपुर इन्चार्ज हरि दाहालले जानकारी दिए ।
स्थायी समिति सदस्य पम्फा भुसालले आज ललितपुर महानगरपालिका र गोदावरी नगरपालिकाका विभिन्न वडामा पुगी सम्मेलनको उद्घाटन गरेकी थिइन् । उनले महानगरपालिकाका वडा नं २, १४, १५, २३ र २९ तथा गोदावरीको वडा नं १४ र वडा नं ३ को सम्मेलन उद्घाटन गरिन् । त्यस्तै, काठमाडौं र भक्तपुरका वडा अधिवेशनमा पनि केन्द्रीय नेताहरू सहभागी भएको बताइएको छ । उपत्यकासहित अन्य जिल्लाका पनि सबैजसो वडामा अधिवेशन सफलतापूर्वक सम्पन्न भएको सो पार्टीले जनाएको छ । पार्टीले अधिकतम सहमति गरेर वडादेखि नै सर्वसम्मत नेतृत्व चयन गर्न सर्कुलर गरेअनुसार अधिकांश स्थानमा सर्वसम्मत नेतृत्व चयन गरिएको बताइएको छ । माओवादीले वडा समितिको चयन गर्दा सकेसम्म सर्वसहमतिमा गर्न भनेको थियो ।
