भक्तपुर– नेकपा समाजवादीका अध्यक्ष माधवकुमार नेपालले आफ्ना मन्त्रीलाई भ्रष्टाचारबाट मुक्त भएर काम गर्न निर्देशन दिएका छन् । राष्ट्रिय स्वास्थ्यकर्मी संघ नेपालद्वारा मध्यपुरथिमिको बोडेमा आयोजित दुईदिने राष्ट्रिय भेलामा उनले सरकारमा रहेका आफ्ना मन्त्रीले कुनै पनि गलत काम गरेमा कारबाही गरेर फिर्ता बोलाइने जानकारी गराउँदै मन्त्रीहरूलाई भ्रष्टाचार नगर्न उर्दी नै जारी गरेका छन् । उनले भने, ‘गलतका गरे कारबाही गर्नेछौँ, त्यसैले इमान्दार भएर राष्ट्रको सेवा गर्नुहोस् ।’
उनले शिक्षा र स्वास्थ्यमा ज्यादै मुनाफा हुनेगरी निजीकरण गरिएकाले सरकारले त्यसलाई निरुत्साहित गरी जनताको सेवामुखी भएर काम गर्नुपर्ने सुझाव दिए । उनले भने, ‘जनताको अति आवश्यक शिक्षा र स्वास्थ्यमा निजीकरण गर्नु हुदैँन, सरकारले नै शिक्षा र स्वास्थ्यमा सकेसम्मको सुविधा दिर्नुपर्छ ।’ उनले स्वास्थ्य क्षेत्रमा भएका गलत कामलाई सुधार्न र विगतदेखि समस्या झेल्दै आएका कर्मचारीको समस्या समाधान गर्न स्वास्थ्यमन्त्री प्रतिवद्ध भएर काममा लागेको लागेको जनाउँदै स्वास्थ्य क्षेत्र भएका गलत कामकारवाहीहरू अब रोकिने बताए । उनले भने, ‘स्वास्थ्य क्षेत्रमा विगतदेखि समस्या झेल्दै आएका कर्मचारीको समस्या समाधान गर्न स्वास्थ्यमन्त्री प्रतिवद्ध भएर आएका छन् ।’
अध्यक्ष नेपालले आफूहरूलाई एमालेमा बस्न ढोका बन्द गरेपछि सन्यास लिने कि आत्मसमर्पण गर्ने दुइ वटा बाटो मात्र भएकोले बाध्य भएर नयाँ पार्टी गठन गरेको बताए । उनले पुष्पलालले अगाडि बढेकै बाटो नेकपा समाजवादीले हिडेकाले नेकपा समाजवादीमा आउनेको देशव्यापी लहर चलेको बताए । उनले भने, ‘नेकपा समाजवादी सिद्धान्तमा हिड्ने पार्टी हो ।’
