भक्तपुर– भूमि व्यवस्था, सहकारी तथा गरिबी निवारणमन्त्री शशी श्रेष्ठले उपत्यकामा रहेका स्ववासीहरूले लालपूर्जा नपाएर खेपिरहनु परेको समस्या तथा हलिया र कमलरीको समस्या समाधान गर्न आफू लागिपरेको बताएकी छन् ।
प्रेस सेन्टर नेपाल भक्तपुरको दोस्रो अधिवेशनको उद्घाटन गर्दै उनले उपत्यकाका लालपूर्जाको समस्या तथा हलिया र कमलरीको समस्या समाधान गर्न आफूले छिटो र छोटो प्रक्रिया अगाडि बढाएर लागेको बताइन् । उनले राष्ट्रहित र जनहितमा काम गर्ने अभियानकोे थालनी गरेको बताउँदै संघीयताको मर्म बाहिर गएर काम गर्नेलाई आफूले रोक्ने प्रयास पनि गरिरहेको बताईन् ।
उनले प्रतिगामी तत्वले अहिले पनि संविधान मास्न खोजिरहेको भन्दै मुलुकमा अग्रगमन र प्रतिगमनको द्वन्द्व चलिरहेको बताइन् । उनले भनिन्, ‘ठाउँ पाउदा फेरि पनि संविधानविरोधी तत्व अगाडि आउन सक्छन्, सचेत हुनु जरुरी रहेको छ’ उनले जनतालाई सही सूचना सम्प्रेषण गर्ने गरी अग्रगमनको पक्षमा कलम चलाउन पत्रकारलाई आग्रह गर्दै संघीय लोकतान्त्रिक गणतन्त्र प्राप्तिमा पत्रकारको महत्वपूर्ण भूमिका रहेको जानकारी गराईन् ।
उनले कानुनले छोरीको नाममा पनि अंशको व्यवस्था गरे पनि त्यसलाई अझै कार्यान्वयनमा नल्याएको भन्दै मन्त्री श्रेष्ठले छोरीको नाममा पनि सम्पत्ति भन्ने कानुनलाई कार्यान्वयनमा ल्याउने प्रतिवद्धता जनाईन् । अहिले पनि अंशवण्डा हुँदा मालपोत कार्यालयले छोरी छ कि नखोजिएको भन्दै अबको एक दुई दिनभित्रै मालपोतले अंशबन्डा गर्दा छोरी खोज्नेगरी व्यवस्था मिलाउने जानकारी गराइन् ।
