वाग्मती– नेकपा (एमाले)का सचिव योगेश भट्टराईले विभाजनले एमालेलाई खासै असर नगरेको बताएका छन् । विहिबार मकवानपुरको मनहरीमा आयोजित एमाले गाउँकमिटीको शपथग्रहण कार्यक्रममा नेता भट्टराईले सो कुरा बताएका हुन् । कार्यक्रममा भट्टराईले नवीन सुवेदीको अध्यक्षतामा गठित नेकपा एमाले मनहरी गाउँपालिका कमिटीको शपथ गराएका थिए ।
उनले एमालेबाट केही समूह चोइटिएर गए पनि त्यसले एमालेलाई खासै असर नगरेको बताए । पार्टी नफुटाउन गरेको अनुनय नेता माधव नेपालले नसुनेको आरोप लगाउँदै उनले विभाजनलाई रोक्न प्रयास गर्दा पनि नसक्ने भए आज यो अवस्थामा आएको बताए ।
उनले अहिलेको परिस्थितीमा विभाजनले एमालेलाई एक्लाएक्लै चुनाव लड्ने हो भने आगामी निर्वाचनमा पनि नेकपा एमाले पहिलो शक्ति बन्ने दाबी गरे । भट्टराईले मंसिर १० गतेदेखि चितवनमा हुने १०औँ राष्ट्रिय महाधिवेशनले सर्वसम्मत नेतृत्व चयन गर्ने बताउँदै देशको सबै जिल्ला र संघ संगठनबाट सर्वसम्मत प्रतिनिधि चयन भएको बताए । उनले अहिले नेतृत्व पनि सर्वसम्मत चयन गर्न दबाब आएकोले एमालेको अध्यक्ष चिन्तित भएको भट्टराईले बताए ।
