महोत्तरी– नेकपा माओवादी केन्द्रका अध्यक्ष पुष्पकमल दाहाल प्रचण्डले प्रदेश २ मा आफ्नो दल पहिलो हुने दाबी गरेका छन् । बुधबार महोत्तरीको रामगोपालपुरमा आयोजित कार्यक्रमलाई सम्बोधन गर्दै अध्यक्ष प्रचण्डले मधेशको मुटु प्रदेश नं २ मा आफ्नो पार्टी नै पहिलो हुने दाबी गर्दै एमाले र लोकतान्त्रिक समाजवादी पार्टी मधेसको पक्षमा नभएको पनि जनाए ।
आफूले मधेसको हक अधिकार सुनिश्चित हुने गरी संविधान संशोधन गर्न खोज्दा एमाले र अध्यक्ष केपी शर्मा ओलीले नदिएको बताए । उनले भने, ‘केपी ओली र एमाले मधेस विरोधी पार्टी हो ।’ उनले भने, ‘ मधेश र मधेशी जनताको मुक्तिको शफ्नाद हामीले गरेका हौँ, मधेशी जनताले आगामी निर्वाचनमा पहिलो मत दिएर हामीलाई नम्वर एक बनाउनेछन् ।’ यसअघिका मधेशका भ्रमणमा मधेशसँग आफ्नो गहिरो ‘प्रेम’ परेको उनको भनाइ छ ।
आफैँले दुई पटक मधेशी जनताको हक अधिकारका निम्ति संविधान संशोधनको प्रस्ताव लगेको भन्दै त्यतिखेर आफुहरू सफल हुन नसकेको बताए । तर अब पहिलो पार्टी बनेर संविधान संशोधन गर्ने बताए । ‘हामीले संविधान संशोधन गरेर मधेश मुद्दा सम्वोधनको जमर्को ग¥यौँ’ प्रचण्डले भने, ‘तर संविधान संशोधनका लागि आवश्यक बहुमत नभएको हुँदा सम्भव भएन ।’ त्यतिखेर संविधान संशोधन प्रस्ताव एमालेको असहयोगले असफल भएको प्रचण्डले उल्लेख गरे तिनै ओली नेतृत्वको सरकारमा महन्थ ठाकुर र राजेन्द्र महतोहरू सामेल भएको भन्दै प्रचण्डले भने, ‘अब मधेसका जनताको मित्रको हो भन्ने तपाईंहरूले चिन्नु भयो होला ।’ माओवादी नै मधेसको मित्र भएको भन्दै उनले अब प्रदेश २ मा पहिलो पार्टी हुने दाबी गरे । अध्यक्ष प्रचण्डले रागोपालपुर नगरपालिकाका वडा नम्बर २, ३, ४, ६, ७, ८ र ९ मा नवनिर्मित आधारभूत स्वास्थ्य केन्द्रको पनि जनसभाबाटै सेवा प्रारम्भ भएको घोषणा गरेका थिए ।
