विराटनगर– प्रदेश १ का मुख्यमन्त्री राजेन्द्र राईले प्रदेशसभाबाट विश्वासको मत पाएपछि अब सरकारलाई पूर्णता दिने बताएका छन् । बुधबार प्रदेशसभामा हाल कायम रहेका ९२ मध्ये ५० सांसदले विश्वासको मत दिएपछि मुख्यमन्त्री राई अब गठबन्धनमा रहेका दलहरूसँगको छलफलपछि मन्त्रिपरिषदलाई पूर्णता दिने तयारीमा लागेका हुन् ।
उनको विश्वासको मतसम्बन्धी प्रस्तावमा मतदान हुँदा बुधबार पक्षमा ५० र विपक्षमा २९ मत खसेको थियो । गठबन्धनमा नेपाली कांग्रेसको २१, नेकपा (माओवादी केन्द्र)का १५, नेकपा (एकीकृत समाजवादी)का १०, जनता समाजवादी पार्टी नेपालका तीन र संघीय लोकतान्त्रिक राष्ट्रिय मञ्च नेपालका एक सदस्यले मुख्यमन्त्री राईको पक्षमा मतदान गरेका थिए ।
नेपालको संविधानको धारा १६८ को उपधारा (४) तथा प्रदेश नं १ को प्रदेशसभा नियमावली, २०७४ को नियम १२८ को उपनियम(४) बमोजिम मुख्यमन्त्री राईले सभामा विश्वासको मतका लागि सदनमा प्रस्ताव पेस गर्दै सभामा सहभागी सबै राजनीतिक दलका सदस्यसँग पक्षमा मत मागेका थिए ।
कात्तिक १६ गते मुख्यमन्त्री नियुक्त भएका उनले सोही दिन नेपाली कांग्रेस, नेकपा माओवादी केन्द्र, जनता समाजवादी पार्टी र संघीय लोकतान्त्रिक राष्ट्रिय मञ्चका सांसद समावेश गरेर पाँच सदस्यीय मन्त्रिपरिषद बनाएका थिए ।
