काठमाडौं– नेपाली कांग्रेसको १४औँ महाधिवेशनले नेतृत्व मात्र चयन गर्ने भएको छ । आइतबार बसेको कांग्रेसको पदाधिकारी तथा पूर्वपदाधिकारी बैठकले नेतृत्व चयन र नीति निर्माणका लागि छुट्टाछुट्टै अधिवेशन गर्ने निर्णय गरेपछि मंसिर २४ देखि २६ गतेसम्म काठमाडौंमा हुने महाधिवेशनले नेतृत्व चयन मात्र गर्ने भएको हो । कांग्रेसले पार्टीको नीति तथा कार्यक्रम तय गर्न छुट्टै विधान महाधिवेशन गर्ने निर्णय गरेको छ । कांग्रेसमा महाधिवेशन नेतृत्व चयनमा मात्रै केन्द्रित भएको र विचारमा छलफल ओझेलमा परेको आरोप लाग्ने गरेको छ । कांग्रेस प्रवक्ता विश्वप्रकाश शर्माका अनुसार मंसिर २४ देखि २६ गतेसम्म हुने महाधिवेशनले नेतृत्व चयन गर्ने र नयाँ कार्यसमितिले विधान अधिवेशन बोलाउने प्रस्ताव केन्द्रीय समिति बैठकमा पेस भएको छ ।
महाधिवेशनले नेतृत्व मात्रै चयन ग¥यो, नीति तथा कार्यक्रममाथि बहस नै भएन भनेर आलोचना हुन थालेपछि त्यसलाई मध्यनजर गरेर अब यो महाधिवेशनले नेतृत्व चयन गर्ने र महाधिवेशनबाट आउने नयाँ कार्यसमितिले विधान अधिवेशन तय गर्ने समझदारी पदाधिकारी र पूर्वपदाधिकारी बैठकमा भएको प्रवक्ता शर्माले बताए । यस महाधिवेशनले नेतृत्व मात्र चयन गर्ने भएपछि उद्घाटनअघि नै उम्मदेवारी दर्ता प्रक्रिया सुरु हुने भएको छ । १४औँ महाधिवेशन अन्तर्गत केन्द्रीय कार्यसमितिको निर्वाचन प्रक्रिया २१ मंसिरदेखि प्रारम्भ हुने भएको छ ।
पार्टीको महाधिवेशन उद्घाटन मंसिर २४ गते हुने भए पनि उम्मेदवारी दर्ता २१ गतेदेखि नै सुरु हुने केन्द्रीय निर्वाचन समितिले जनाएको छ । निर्वाचन समिति सदस्य वरिष्ठ अधिवक्ता गोपालकृष्ण घिमिरेले समय कम भएकाले महाधिवेशन उद्घाटन हुनुअघि नै निर्वाचन प्रक्रियाका कार्यक्रम सुरु हुने जानकारी दिए । करिव ४५ सय महाधिवेशन प्रतिनिधिले कांग्रेसको नयाँ कार्यसमिति चयन गर्नेछन् । कांग्रेस विधानमा केन्द्रीय कार्यसमिति १६७ सदस्यीय हुने उल्लेख छ । १३४ केन्द्रीय सदस्य महाधिवेशनबाट निर्वाचित हुनेछन् भने ३३ जना सभापतिले मनोनित गर्ने व्यवस्था छ ।
सातै प्रदेशमा संयोजक
कांग्रेसले महाधिवेशनअन्तर्गत प्रदेश समितिको अधिवेशनका लागि सातवटै प्रदेशमा संयोजक तोकेको छ । आइतबार बसेको केन्द्रीय समितिको बैठकले प्रदेश १ मा कृष्णप्रसाद सिटौला, प्रदेश २ मा रमेश रिजाल, बागमतीमा प्रकाशमान सिंह, गण्डकीमा गोपालमान श्रेष्ठ, लुम्बिनीमा बालकृष्ण खाँण, कर्णालीमा जीवनबहादुर शाही र सुदूरपश्चिममा दिलेन्द्रप्रसाद बडुलाई संयोजक तोकेको हो । हाल पार्टीको प्रदेश समिति नभएका कारण अधिवेशनका लागि संयोजक तोकिएको केन्द्रीय सदस्य मीन विश्वकर्माले जानकारी दिए । प्रदेश अधिवेशन मंसिर १६ र १७ गते तोकिएको छ ।
