काठमाडौं– नेकपा एकीकृत समाजवादीका अध्यक्ष माधवकुमार नेपालले पछिल्लो समय निर्वाचनको खर्च डरलाग्दो गरी बढेको भन्दै चिन्ता व्यक्त गरेका छन् । शनिबारबाट सुरु भएको एकीकृत समाजवादीको दोस्रो पूर्ण बैठकमा अध्यक्ष नेपालले निर्वाचन खर्च डरलाग्दो गरी बढ्दा इमानदार एवं प्रतिबद्ध कार्यकर्ता बाहिरिने भन्दै चिन्ता व्यक्त गरेका हुन् । अध्यक्ष नेपालले बैठकमा राजनीतिक वक्तव्य पेस गर्दै अहिलेको निर्वाचन खर्च प्रणाली नसच्चाउने हो भने नेपालको राजनीति गलत मानिसको कब्जामा पुग्ने बताएका छन् । उनले भने, ‘यसलाई सच्याउन सकिएन भने राजनीति गलत मानिसको हातमा जाने सम्भावना छ ।’
उनले खर्चिलो निर्वाचन प्रणाली सुधार्न तथा कम खर्चमा हरेक तहका निर्वाचन सञ्चालन गर्ने प्रणाली विकसित गर्न कटिबद्ध रहेको पनि बताएका छन् । पार्टीले देशको निर्वाचन कानुनमा आवश्यक सुधार गरेर निर्वाचनलाई कम खर्चिलो, स्वस्थ र पारदर्शी बनाउन चाहेकाले कानुन सुधार्न नसकेको अवस्थामा पनि आफ्नो तर्फबाट नमुना प्रस्तुत गर्ने बताए ।
उनले एकीकृत समाजवादीका हरेक तहका उम्मेदवारले कमभन्दा कम खर्चमा निर्वाचन परिचालन गरेर नमुना प्रदर्शन गर्ने बताएका छन् । यो सन्देशलाई गाउँ गाउँमा पु¥याउनका लागि कार्यकर्ताहरूलाई आह्वान पनि गरे ।
अध्यक्ष नेपालले राष्ट्रिय राजनीतिमा ५ दलीय गठबन्धन अझ प्रभावशाली बन्दै गएको दाबीसमेत गरेका छन् । उनले आगामी निर्वाचनसम्म कायम राखेर अघि बढ्ने गठबन्धनमा संलग्न राजनीतिक दलहरू बीचमा आपसी समझदारी बनेको खुलासासमेत गरेका छन् । गठबन्धनमा ४ महत्वपूर्ण मन्त्रालयहरूको जिम्मेवारीका साथ ५ जना मन्त्रीमण्डलमा सहभागी भएको भन्दै यसले राष्ट्रिय राजनीतिमा महत्वपूर्ण भूमिकामा रहने बताए ।
वागमती प्रदेश र प्रदेश नं. १ मा मुख्यमन्त्रीको जिम्मेवारीका साथ प्रदेश सरकार सञ्चालनमा एकीकृत समाजवादीले नेतृत्व गरिरहेको भन्दै यसरी नै स्थानीय सरकार सञ्चालनमा पनि पार्टीको भूमिका महत्वपूर्ण र प्रभावकारी बन्दै गएको उनले बताएका छन् । एमालेको ओली नेतृत्व आफ्नै गलत नीति, विचार र प्रवृत्तिका कारण संघीय सरकार सञ्चालनमा रहेको नेतृत्वकारी भूमिका गुमाउन पुगेको भन्दै त्यसरी नै लुम्बिनी प्रदेश सरकार सञ्चालनमा मुख्यमन्त्रीसहित नेतृत्व गरिरहेकोमा त्यहाँबाट विस्थापित हुन पुगेको जनाएका छन् ।
गण्डकी, वागमती प्रदेश, प्रदेश नं. १ को सरकार सञ्चालनमा मुख्यमन्त्रीसहित प्रदेश सरकारको नेतृत्वदायी भूमिकाबाट क्रमशः गर्दै जानुको कारण एमालेको ओली नेतृत्व गुटको गलत नीति, विचार र प्रवृत्ति तथा स्वेच्छाचारी, सर्वसत्तावादी अहं र दम्भ नै मुख्य कारण बन्न पुगेको उनले वक्तव्यमा भनेका छन् । त्यस्तै, अध्यक्ष नेपालले सत्तारूढ गठबन्धन टुट्ने हो कि भन्ने आशंका नपाल्न पार्टीका नेता, कार्यकर्तालाई आग्रह गरेका छन् । उनले आसन्न राष्ट्रियसभाको निर्वाचन र रिक्त रहेको प्रतिनिधिसभा र प्रदेशसभाको उपनिर्वाचनमा मिलेर उम्मेदवारी दिने र विजयी बनाउने सत्तारूढ दलबीच सहमति भएको र त्यसले गठबन्धनलाई टुटाउने खोज्नेहरूको सपनालाई चकनाचुर पारेको दाबीसमेत गरे ।
उनले सत्तारूढ गठबन्धनको आयु लामो छैन भन्नेहरूलाई जवाफ दिनेगरी आफूहरूले राष्ट्रिय सभाको निर्वाचन तथा उपनिर्वाचनमा मिलेर उम्मेदवारी दिने र विजयी गराउने सहमति गरिसकेको पनि स्पष्ट पारेका छन् । पाँच दलीय राजनीतिक गठबन्धनले आउने चुनावलाई फोकसमा राखेर मिलेर नै उम्मेदवारी दिने र जिताउने अभियानमा जुट्ने सहमति गरेको अध्यक्ष नेपालले बताए । आगामी माघमा हुने राष्ट्रिय सभाको चुनाव, प्रतिनिधि सभा र प्रदेश सभामा रिक्त रहेको उपनिर्वाचनमा पनि मिलेर उम्मेदवारी तय गर्ने र मिलेर नै जिताउने सहमति भइसकेको उनले बताएका छन् । यो सहमतिले गठबन्धनको आयु लामो छैन र यिनीहरूबीचको एकतालाई तोड्न सकिन्छ कि भन्ने सोच र चाहना सबै चकनाचुर भएको उनले बताए ।
अध्यक्ष नेपालले दुइ निर्वाचनको परिणाम सकारात्मक आउने र गठबन्धनबीचको सहकार्य झनै कसिलो भएर जाने तर्कसमेत गरेका छन् । कार्यक्रममा बोल्दै पार्टीका वरिष्ठ नेता झलनाथ खनालले सत्तारूढ गठबन्धनबीचको सहकार्यलाई पार्टीको तल्लो कमिटीसम्म लैजानुपर्नेमा जोड दिए । उनले एमालेको ठूलो पंक्ति अलमलमा रहेको उल्लेख गर्दै त्यसलाई पार्टीमा ल्याउने गरी उत्साहका साथ काम गर्न पनि पार्टीको सिंगो पंक्तिलाई आह्वान गरेका छन् । बैठकमा बागमती प्रदेशका मुख्यमन्त्री एवं पार्टीका उपाध्यक्ष राजेन्द्रप्रसाद पाण्डे र प्रदेश १ का मुख्यमन्त्री एवं पार्टीका सचिव राजेन्द्र राईले आ–आफ्नो प्रदेश सरकारको योजनाबारे बिफ्रिङ गरेका थिए ।
शनिबारको बैठकमा केन्द्रीय अनुशासन आयोग, लेखा आयोग र निर्वाचन आयोगका पदाधिकारीलाई शपथ गराइएको छ । बैठकमा सम्मानित नेता झलनाथ खनालले वैचारिक राजनीतिक प्रतिवेदन पेस गरे । सो क्रममा नेता खनालले जनताको बहुदलीय जनवाद (जबज) अब पार्टीको मार्गदर्शन सिद्धान्त बन्न नसक्ने बताए । उनले नेकपा (एमाले)बाट समाजवादी क्रान्ति पूरा हुन नसक्ने भएपछि आफूहरूले नयाँ पार्टी खोलेको तर्क गरे ।
आफूहरू फुटेको नभई व्यक्तिवादी प्रवृत्तिविरुद्ध विद्रोह गरेको दाबी गर्दै खनालले समाजवादी क्रान्तिको नेतृत्व एकीकृत समाजवादीले मात्रै गर्न सक्ने धारणा राखे । उनले एमालेका एक पंक्ति अझै पनि अन्योलमा रहेकाले आफ्नो पार्टीमा आउने सम्भावना देखेको बताए ।
