फुङ्लिङ– नेपाली कांग्रेसका नेता प्रकाशरण महतले सर्वोच्चमा अदालतमा देखिएको समस्याको समाधान सर्वोच्चमै खोज्नुपर्ने पनि बताएका छन् । नेपाली कांग्रेसका नेता महतले बुधबार ताप्लेजुङ सदरमुकाम फुङ्लिङमा नेपाली कांग्रेसका पार्टी कार्यकर्तासँग भेटघाट गर्दै अहिले सर्वोच्चमा अदालतमा देखिएको समस्याको समाधान सर्वोच्चमै खोज्नुपर्ने बताए ।
प्रधानन्यायाधीशले आफैँ गम्भीर बनेर समस्याको निकास निकाल्नुपर्ने महतको धारणा थियो । स्वतन्त्र न्यायपालिकामा देखिएको समस्या तत्काल अन्त्य हुनुपर्ने पनि बताए प्रधानन्यायाधीशले संविधानविपरीत कार्य गरेको भन्ने कुनै प्रमाण नभएकाले अहिलेसम्म सरकारले कुनै हस्तक्षेप नगरेको प्रष्ट्याउँदै न्याय क्षेत्रमा देखिएको समस्या त्यहीँबाट समाधान होस् भन्ने चाहेको उनले बताए । सर्वोच्चमा देखिएको समस्याप्रति विभिन्न टीकाटिप्पणी भए पनि संवैधानिक व्यवस्थाप्रति सबै जिम्मेवार हुनुपर्ने र समस्यालाई निकास दिँदै चाँडै न्याय सम्पादनमा सहजता ल्याउनुपर्नेमा उनको जोड थियो ।
नेपाली कांग्रेस नेतृत्वको गठबन्धन सरकारले चारवटा महत्वपूर्ण काम गर्न सफल भएको उनले बताए । ताप्लेजुङमा पार्टीका कार्यकर्तासँग भेटघाट गर्दै गठबन्धन सरकारले गरेको कामको बारेमा उनले बताएका थिए । नेता महतले पार्टीको महाधिवेशन निर्धारित समयमै हुने बताउँदै कोरोना महामारीका कारण पार्टी महाधिवेशनको समय पटकपटक परिवर्तन गर्नु परेको बताए । अब भने पछिल्लोपटक निर्धारण गरिएकै कार्यतालिकाअनुसार महाधिवेशन हुने उनले जानकारी दिए । महाधिवेशनमा आफूले महामन्त्रीको उम्मेदवारी दिने तयारी गरिरहेको उनको भनाई थियो ।
उनले पार्टी सभापति शेरबहादुर देउवा नेतृत्वको सरकारले मन्त्रिपरिषद् विस्तार गर्न केही ढिलाइ गरको स्वीकारे । उनले कोभिड–१९ महामारी नियन्त्रणका लागि खोप व्यवस्थापन सुनिश्चित गरेको र असंवैधानिक ढङ्गबाट गरिँदै आएको नियुक्तिलगायतका क्रियाकलाप नियन्त्रण गर्न सरकार लागिपरेको बताउँदै परराष्ट्र सम्बन्ध सुधार र बाढी पहिरोजस्ता दैवी प्रकोपजन्य विपत्तिमा परेका पीडितलाई राहत दिने र उनीहरूको उचित व्यवस्थापन गर्ने कार्यमा सरकारले पहिलो प्राथमिकता दिएको बताए ।
यसैबीच, अर्थमन्त्री जनार्दन शर्माले संखुवासभाको किमाथांका नाका व्यवस्थित गरेर सञ्चालन गरिने बताएका छन् । संखुवासभाको खाँदबारीमा प्रेस सेन्टरले आयोजना गरेको पत्रकार सम्मेलनमा उनले अरुण करिडोरको निर्माणसँगै चीनसँगको नाका किमाथांकालाई व्यवस्थित गरिने बताए । अरुण करिडोरको निर्माणले संखुवासभामा विकासको ढोका खुल्ने विश्वास व्यक्त गर्दै संखुवासभामा अथाह प्राकृतिक स्रोत साधन रहेको बताए । मन्त्री शर्माले त्यसको उपयोगबाट जिल्लालाई धनी बनाउन मद्दत पुग्ने बताए ।
