ककनी (नुवाकोट)– नेपाली कांग्रेसका नेता तथा पूर्वअर्थमन्त्री डा.रामशरण महतले पार्टीभित्रको आन्तरिक कलहको फाइदा विपक्षीले लिने भएकाले कांग्रेर मिलेर अगाडि बढ्नु पर्ने बताएका छन् । नेपाली कांग्रेस ककनी गाउँपालीका ४ नम्बर वडा समितिले मंगलबार आयोजना गरेको दीपावली, छठलगायत चाडबाडको शुभकामना आदानप्रदान कार्यक्रममा बोल्दै नेता डा.महतले पार्टीभित्रको शक्ति संघर्ष धेरै हुँदा पार्टी बाहिरकाले फाइदा लिने बताएका हुन् ।
लोकतान्त्रिक पार्टी भएकाले प्रतिपर्धा हुनु राम्रो भए पनि पार्टीलाई हानी हुने गरी हुने शक्ति संघर्षले विपक्षीलाई फाइदा पुग्ने उनले बताए । कम्युनिस्ट पार्टीको उदाहरण दिँदै नेता डा.महतले कांग्रेसमा त्यस्तो अवस्था आउन नहुने बताएका छन् । नेपाली कांग्रेस अगुवा पार्टी भएकाले सबै परिवर्तनमा ठूलो योगदान रहेको भन्दै अब पनि देशलाई निकास दिनका लागि कांग्रेसको विकल्प नरहेको उनको दाबी छ । ‘कांग्रेस राजनितीक परिवर्तनको सम्वाहक हो, राजनीतिक स्थायित्व कायम गर्ने पार्टी हो र आर्थिक समन्तवको नीति लिएको पार्टी भएकाले देशको विकास र निकासका लागि कांग्रेसको विकल्प छैन,’ नेता डा.महतले भने । देशलाई निकास दिनका लागि जुझारु र मजबुत संगठन निर्माणमा लाग्नु पर्ने आजको आवश्यकता रहेको उनले बताएका छन् । बलियो संगठन विना देशको नेतृत्व गर्न नसकिने र नेतृत्व गर्न नसक्दा भनेजस्तो विकास गर्न नसकिने उनको भनाइ थियो ।
कार्यक्रममा बोल्दै नेपाली कांग्रेसका केन्द्रीय सदस्य तथा प्रतिनिधि सभा सदस्य बहादुरसिंह लामाले अब आउने महाधिवेशनबाट स्वच्छ छवि र विचार भएको व्यक्ति नेतृत्वमा आउनु पर्ने बताएका छन् । सबै प्रतिनिधिले विवेक प्रयोग गरेर क्षमतावान् नेतृत्व चयन गर्न पनि उनले आग्रह गरे । पार्टीभित्र स्वच्छ प्रतिस्पर्धा आवश्यक रहेको भन्दै यसलाई मर्यादित बनाउनु पर्ने उनको तर्क थियो । साथै अहिलेसम्म कांग्रेसको महाधिवेशन कहिलै पनि निर्धारित समयमा नभएको भन्दै यो पटक कोभिड–१९ का कारण केही ढिलाइ हुन पुगेको उनको भनाइ थियो ।
त्यस्तै नेपाली कांग्रेस नुवाकोटका सभापनि जगदीश्वरनरसिंह केसीले पछिल्लोपटक तोकिएको महाधिवेशनको कार्यतालिका परिवर्तन नहुने भन्दै नवीन विचारका साथ अगाडि बढ्दा पार्टी चलायमान हुने धारणा व्यक्त गरे । अहिलेसम्म कसरी चल्यो भन्दा पनि अब कसरी चलाउने भन्नेमा सोच्नु पर्ने बेला आएको उनले बताएका छन् । सर्वसम्मत नेतृत्व चयन गर्नका लागि सबै नेताहरू एक ठाउँमा बसेर छलफल गर्नु पर्ने उनले बताए । सबै मिलेर आगामी चुनावमा कांग्रेसलाई पहिलो पार्टी बनाउनका लागि लाग्न पनि उनले सबै कार्यकर्तालाई निर्देशन दिए । साथै अब आफू जिल्ला सभापति नहुने भन्दै अब आउने नेतृत्वले सबैलाई समेट्न सक्नु पर्ने उनले बताए ।
त्यस्तै नुवाकोट कांग्रेसका पूर्वसभापति धुव्र अधिकारीले सकेसम्म सर्वसम्मत रूपमा नसके लोकतान्त्रिक पद्धतिबाट नेतृत्व चयन गर्नु पर्ने बताएका छन् । तर पछिल्लो समय देखिएको समस्या समाधान गर्नका लागि सर्वसम्मत नेतृत्व चयन गरेर गुटबन्दीको अन्त्य गर्नु पर्ने आजको आवश्यकता रहेको उनले बताए । पार्टीलाई जिल्लामा पहिलो बनाउन अब आउने नेतृत्वको पहिलो प्राथमिकता हुनु पर्नेमा उनले जोड दिए । कार्यक्रममा महासमिति सदस्य रमेश महत, महाधिवेशन प्रतिनिधि कृष्णबहादुर लामा, जिल्ला कार्यसमिति सदस्य बिष्णु गुरुङ, क्षेत्र नम्बर १ का क्षेत्रीय सभापति एवं लिखु गाउँपालिका अध्यक्ष ध्रुब श्रेष्ठ , प्रदेश ख का सभापति अर्जुनप्रसाद न्यौपाने, जिल्ला समन्वय समितिका प्रमुख सन्तमान तामाङ, सदस्य सम्झना सेढाईँ, शिवपुरी गाउँपालिका उपाध्यक्ष मञ्जु केसी, नेपाल तरुण दल क्षेत्र नम्बर १ का सभापति यदुमान लामालगायतले शुभकामना मन्तव्य व्यक्त गरेका थिए ।
कार्यक्रममा गायिका सुनिता दुलाल, मोडल अन्जली अधिकारी, गायक सरोज लामिछाने र आलीफ खानलगायत विभिन्न कलाकारहरूले सांगीतिक प्रस्तुतसमेत दिएका थिए । कार्यक्रममा पार्टीका वडा समिति सभापति नवीन थिङ तामाङको अध्यक्षतामा सम्पन्न भएको थियो ।
