काठमाडौं– आगामी १० देखि १२ मंसिरसम्म चितवनमा हुने दसौँ राष्ट्रिय महाधिवेशनका लागि नेकपा एमालेले प्रतिनिधिको संख्या र छनोट विधि टुंगो लगाएको छ । केन्द्रीय समिति निर्वाचित गर्ने महाधिवेशनमा १ हजार ९९९ जना प्रतिनिधि सहभागी हुँदै छन् । एमालेको सात लाख संगठित सदस्यबाट उक्त संख्यामा प्रतिनिधि सहभागी हुने तय गरिएको हो ।
प्र्रतिनिधिको संख्या एमालेको १३औँ केन्द्रीय कमिटी बैठकले अन्तिम टुंगो लगाएको हो । महाधिवेशनले अध्यक्ष, वरिष्ठ उपाध्यक्ष, उपाध्यक्ष, महासचिव र सचिवसहित १५ पदाधिकारीका साथै २२५ केन्द्रीय सदस्य चयन गर्नेछ । देशभर ७ लाख २८ हजार सक्रिय सदस्य रहेको एमालेले महाधिवेशनका प्रतिनिधि तीन प्रकारबाट छान्ने छ । जसमा पदेन, निर्वाचित र मनोनित गरी तीन प्रकारबाट छानिएका प्रतिनिधिले मात्रै महाधिवेशनमा मतदान गर्न पाउने एमाले दसौँ राष्ट्रिय महाधिवेशन मुल व्यवस्थापन समितिका सदस्य शेरबहादुर तामाङले जनकारी दिए । पार्टीको भूगोल कमिटीबाट १ हजार १ सय ९६ प्रतिनिधि निर्वाचित भएर आउनेछन् भने पदेन प्रतिनिधि २६२ र यसको ५ प्रतिशत मनोनित हुनेछन् । केन्द्रीय कार्यालय र विभागसहित ३, पार्टीका जनसंगठनहरूबाट ५–५, समग्र प्रवास कमिटीबाट २०, प्रत्येक प्रदेश कमिटीबाट मजदुर प्रतिनिधि १ र प्रत्येक जिल्लाबाट १ दलित प्रतिनिधि हुनेछन् ।
पदेन प्रतिनिधिमा केन्द्रीय कमिटीका पदाधिकारी र सदस्यहरू, केन्द्रीय अनुशासन आयोगका पदाधिकारी र सदस्यहरू, केन्द्रीय लेखा आयोगका पदाधिकारी र सदस्यहरू तथा केन्द्रीय निर्वाचन आयोगका पदाधिकारी र सदस्यहरू रहनेछन् । पार्टीको केन्द्रीय सल्लाहकार परिषद्का अध्यक्ष स्थायी कमिटीको पदेन सदस्य रहने र आयोजकसमेत हुने हुँदा सल्लाहकार परिषद्का अन्य पदाधिकारी सदस्यहरू मध्येबाट १५ जना महाधिवेशन प्रतिनिधि बन्ने छन् । सल्लाहकार परिषद्का अन्य सदस्यहरू राष्ट्रिय महाधिवेशनमा सहभागी हुने भए पनि उनीहरूलाई मताधिकार भने नहुने भएको छ ।
प्रदेश र सो सरहका कमिटीका पदाधिकारी र सदस्यहरू मध्येबाट कम्तीमा २ महिलासहित ५ जना दरले महाधिवेशन प्रतिनिधि निर्वाचित हुनेछन् । त्यस्तै प्रतिनिधिसभा निर्वाचन क्षेत्रअन्तर्गतका १२०० सम्म पार्टी सदस्यमध्येबाट कम्तीमा १ महिला सहित ३ जनाका दरले महाधिवेशन प्रतिनिधि निर्वाचित हुनेछन् । निर्वाचन क्षेत्रमा १२ सय भन्दा बढी सदस्य भए प्रत्येक ८०० मा थप १/१ जना तर हरेक दोस्रो ८०० मा महिला अनिवार्य गर्नुपर्नेछ ।
यस्तै देशभित्रका विशेष जिल्लाअन्तर्गतका १२०० सम्म पार्टी सदस्यबाट कम्तिमा १ महिला सहित ३ जनाका दरले प्रतिनिधि निर्वाचित हुनेछन् भने जिल्ला र विशेष जिल्लाअन्तर्गतका ५०० सम्म दलित सदस्यबाट १ जना महाधिवेशन प्रतिनिधि छनोट हुनेछन् यो संख्यामा थप ५०० सम्म सदस्य भए १ जना महिला अनिवार्य र सो पछि प्रत्येक ५०० मा महिलाको एकतिहाइ हुने गरी १÷१ जनाको दरले प्रतिनिधि निर्वाचित हुनेछन् । भूगोलका प्रदेशअन्तर्गतका मजदुर पार्टी सदस्य मध्येबाट कम्तीमा ३ महिलासहित ७ जनाका दरले महाधिवेशन निर्वाचित निर्वाचित हुनेछन् । भारत, अमेरिका युरोप, एशिया प्यासिफिक, खाडी र ओसियाना प्रत्येकका पार्टी सदस्यहरूबाट कम्तीमा २ महिला सहित ५ जनाका दरले प्रतिनिधि निर्वाचित हुने व्यवस्था गरेको एमालेले जनाएको छ ।
मूल व्यवस्थापन समितिका सदस्य तामाङले महाधिवेशन प्रतिनिधि छान्न पार्टी केन्द्रीय कमिटीले तय गरेको मापदण्ड लागू हुने बताए । ‘कात्तिक २७ गते सम्बन्धित जिल्लाले सबै पार्टी सदस्यहरूलाई एकै ठाउँ वा अलग अलग भेला गराएर निर्वाचन गराउन सक्छन् । त्यसका लागि प्रत्येक संघीय निर्वाचन क्षेत्रको अलग–अलग मतदान केन्द्रको व्यवस्था गरिन्छ’ उनले भने । एमालेले महाधिवेशनमा सहभागी हुने प्रतिनिधिका लागि २७ कात्तिक ०७८ मा स्वदेश तथा प्रवासमा एकैसाथ प्रतिनिधि निर्वाचन गर्नेछ । एउटा पार्टी सदस्यले एउटा निर्वाचन क्षेत्रमा मात्र प्रतिनिधि चुन्ने चुनिने अधिकार प्रयोग गर्न पाउनेछन् । यसरी निर्वाचित प्रतिनिधिको केन्द्रीय संगठन विभागले ३० कात्तिकभित्र प्रमाणित गरेर दर्ता गर्नेछ ।
