काठमाडौं– संयुक्त राष्ट्रिय जनआन्दोलन मोर्चा–२०७८ ले मंगलबार काठमाडौंको माईतीघरमा विरोध प्रदर्शन तथा आन्दोलन गर्ने भएको छ । पछिल्लो समय ‘न्यायालयभित्रको बेथिति, विसंगति, नेपाल बार एशोसिएशनले सुरु गरेको आन्दोलन’ लगायतका विषयका विरुद्धमा मोर्चाले मंगलबार काठमाडौंमा बृहत्त आन्दोलन गर्न लागेको जनाएको हो ।
सोमबार पत्रकार सम्मेलन गर्दै जनतालाई न्याय पाउने अधिकारबाट बञ्चित गरिनुहुँदैन भन्दै बारको आन्दोलन र न्यायाधीशहरूले गरेको बेञ्च बहिष्कारको विरुद्धमा भोलि प्रदर्शन गर्न लागिएको र उक्त प्रदर्शनमा सहभागी हुनको लागि पनि जनसमूदायलाई अपिल गरेको छ । मोर्चाले अहिलेको सन्दर्भमा नेपालका राजनीतिक दलहरू नै असफल भएको पनि निश्कर्ष निकालेको छ । सरकार चलाउन असफल भए हात हठाउन र देश चलाउन आफूहरू सक्षम रहेको पनि मोर्चाको भनाई छ ।
कार्यक्रममा मोर्चाका सह–अध्यक्ष तथा बरिष्ठ अधिवक्ता विष्णु भट्टराईले अदालतमा भ्रष्टाचार छ भने भनेर न्यायाधीश हरिकृष्ण कार्की नेतृत्वको समितिले नै प्रतिवेदन सार्वजनिक गरिसकेकोले अब नेपालको न्यायालय कुन अवस्थामा रहेको छ ? भन्ने कुरा प्रष्ट भएको बताए । उनले भने, ‘न्यायापालिकामा भ्रष्टाचार छ भनेर प्रतिवेदन आएपछि न्यायाधीशहरू भ्रष्ट रहेछन भन्ने कुरा प्रमाणित भएन र ? अनि अदालतमा विधिको शासन, स्वतन्त्र र स्वच्छता कहाँ पाईन्छ ?’
उनले न्यायाधीशहरूले इजलास बहिष्कार गर्नु गलत भएको पनि टिप्पणी गरे । उनले देशको संकट, भ्रष्टाचारको विरुद्धमा आफूहरू प्रतिकारको रूपमा सशक्त जनआन्दोलन तय गरेको भन्दै त्यसमा सहभागी हुन सबै न्यायप्रेमी जनतालाई अपिल गरेका छन् । त्यस्तै, कार्यक्रममा मोर्चाका राष्ट्रिय अध्यक्ष शेखरजंग रायमाझीले आफूहरूले दलगत स्वार्थमा लागेका न्यायाधीशहरूको राजीनामा माग्ने बताए ।
अभियन्ता शोभराम थापाले अहिले न्यायालयमा पार्टीको जस्तो अवस्था देखिएको भन्दै चिन्ता व्यक्त गरे । उनले भने,‘हाम्रो न्यायालयमा पार्टीको अवस्था देखियो । पार्टीबाट सिफारिश भएर आएकाहरू न्यायाधीशहरू भएकोले पनि यो अवस्था देखियो । यो देश र जनताको लागि दुर्भाग्यपूर्ण छ ।’ अहिले न्यायालयमा कहीँ नभएको जात्रा भएको पनि उनको आरोप थियो । मोर्चाका वरिष्ठ उपाध्यक्ष दिनेश कँडेलले पनि मुलुक अनिर्णयको बन्दी बनिरहेको भन्दै आफूहरू मुलुकलाई अनिर्णयको बन्दी हुन नदिनको लागि संघर्षका कार्यक्रम अघि सारेको बताए । उनले न्यायाधीशहरूले बेन्च बहिष्कार गर्नु गलत भएको टिप्पणी गरे । उनले भने,‘अधिकांश मानिसहरू न्यायको लागि भौतारिएका छन्, तर न्यायाधीशहरू इजलास बहिष्कार गरेर बसेका छन् ।’ उनले अहिले कसैले पनि देश चलाउन नसक्ने हो भने जनताले देश चलाउने बताए ।
त्यस्तै, विक्रम बमले बार एशोसिएशनले आन्दोलन फिर्ता गर्नुपर्ने धारणा राखे । उनले वर्तमान संविधान २०७२ बाट नै अहिले मुलुकमा समस्या सुरु भएको टिप्पणी गरे । उनले प्रधानमन्त्री शेरबहादुर देउवालाई देशमा यस्तो अवस्था हुँदापनि बोल्न नसक्ने हो भने राजीनामा दिन भनेका छन् । पत्रकार सम्मेलन भने संयुक्त राष्ट्रिय जनआन्दोलन मोर्चा–२०७८ का बरिष्ठ उपाध्यक्ष श्रीराम कँडेलले सञ्चालन गरेका थिए ।
