काठमाडौं– प्रधानमन्त्री शेरबहादुर देउवा र आफूबीच कुनै असमझदारी नभएको गृहमन्त्री बालकृष्ण खाणले बताएका छ्न् । पछिल्लो समय प्रहरीमा सरुवा तथा बढुवाका क्रममा भएका निर्णयलाई लिएर प्रधानमन्त्री र गृहमन्त्रीबीच सम्बन्ध बिग्रिएको भन्ने समाचार बाहिर आएपछि शनिबार गृह मन्त्रालयमा पत्रकारहरूसँग कुरा गर्दै उनले प्रधानमन्त्रीबाट जे निर्देशन हुन्छ, आफहरूले त्यहि गरिरहेकाले प्रधानमन्त्री र आफूबीच असमझदारी नभएको बताए ।
मन्त्री खाणले आफ्नो, सोच र दृष्टिकोणअनुसार सहज रूपमै गृह मन्त्रालय चलाउने चाहना रहेको बताएका छन् । अहिले प्रहरीमा दरबन्दी थपको प्रक्रियाबारे पनि सार्थक बहस चलिरहेको उनले बताए । शान्ति सुरक्षा कायम राख्न प्रधानमन्त्रीको निर्देशन रहेको भन्दै त्यसका लागि चुनौतीसमेत मूल्यांकन गरेर एआइजी–डिआइजीको दरबन्दी थप गर्ने विषयमा सार्थक बहस भइरहेको मन्त्री खाणले बताएका छन् । उनले कार्यक्षमताको मापदण्ड बनाएर सरूवा–बढुवाको टुंगो लगाइने बताए ।
प्रहरीहरूमा नियमबमोजिम नै सरूवा–बढुवा हुने भन्दै आफूले असल मनसायले नै काम गर्न खोजेको दाबी गरेका छन् । उनले कार्यसम्पादन मूल्यांकनको समय रहेको र नयाँ वर्षको अंक नदिइकन बढुवा अघि बढाउन नसकिने भएकाले कतिपय विभाग तथा कार्यालयमा दरबन्दी रिक्त भएको बताए ।
मन्त्री खाणले प्रहरीमा लेखापालहरूको सरूवाका विषय पनि मापदण्ड बनाएरै टुंग्याउन खोजेको बताएका छन् । प्रहरीमा सबैभन्दा बढी विवादित शाखाका रूपमा चिनिने लेखा शाखामा सबैको आँखा गड्दा मन्त्री र आइजिपीलाई बढुवामा विघ्न÷ बाधा उत्पन्न भएको प्रहरी स्रोत नै बताउँछ । तर, गृहमन्त्रीले भने यो कुरालाई लुकाउन खोजेकोजस्तो देखिन्थ्यो । मन्त्री खाणले पदभार ग्रहण गरेपछि पहिलोपटक पत्रकारहरूसँग सामूहिक छलफल गरेका हुन् । छलफलका क्रममा सूचना–आदानप्रदानमा गृहप्रशासन अनुदार रहेको भन्दै पत्रकारले गुनासो राखेका थिए ।
यसैबीच, गृहमन्त्री खाणले अघिल्लो सरकारसँग तीन बुँदे सहमति गरेको विप्लव समूहसँग छलफल भइरहेको बताएका छन् । उनले विप्लव समूहको मुद्दा फिर्ता तथा बन्दीलाई मुक्त गर्ने विषयमा कुराकानी भइरहेको बताए । कानुन मन्त्रालय र महान्यायाधीवक्ता कार्यालयहरूले मुद्दा फिर्ता र बन्दीलाई मुक्त गर्ने विषयमा छलफल गरिरहेको बताउँदै विप्लव समूहका बन्दीभन्दा धेरै मुद्दा रहेकाले समस्या उत्पन्न भएको बताए । उनका अनुसार एउटै मानिसका पाँच–सात वटा मुद्दा छन् ।
सबै राजनीतिक पार्टीका नेतासँग यसबारे कुराकानी छलफल र संवाद चलिरहेको र विप्लवले प्रधानमन्त्रीसँग आफैँ पनि कुरा गरेको खाणले बताएका छन् । सो समूहका प्रवक्ता खड्गबहादुर विश्वकर्मासँग आफूले निवासमै तीनपटक बैठक गरेको, मन्त्रालयमा पनि कुराकानी गरेको भएको उनले बताए । सरकारले मुलुकमा शान्ति चाहेको बताउँदै सबै राजनीतिक दल संवाद र वार्तामा आएर राष्ट्रिय राजनीतिको मूलधारमा आउन्, संवैधानिक प्रक्रियामा आउन्, संविधानको अपनत्व ग्रहण गरून् भन्ने चाहना रहेको बताए ।
