काठमाडौं– निर्वाचन आयोगले सरकारलाई आगामी ५ चैत अगावै स्थानीय तहको निर्वाचन सम्पन्न गर्न औपचारिक सुझाव दिएसँगै मुलुकभर निर्वाचनको चर्चा सुरु भएको छ । राजनीतिक वृत्तमा पनि निर्वाचनको विषयमा छलफल भइरहँदा निर्वाचन आयोगले स्थानीय निर्वाचन लक्षित मतदाता नामावली संकलन गर्ने तयारी गरेको छ । आयोगले आउँदो स्थानीय तहको निर्वाचनलाई लक्षित गरी पालिकास्तरमै टोली खटाएर मतदाता नामावली संकलन विशेष अभियान सञ्चालन गर्ने तयारी गरेको हो ।
स्थानीय तहको निर्वाचनको मिति घोषणा हुनुपूर्व नै मतदाता नामावलीसम्बन्धी काम सम्पन्न गर्नुपर्ने कानुनी व्यवस्थाअनुरूप आयोगले नामावली संकलनको अभियान सञ्चालन गर्न लागेको हो । प्रमुख निर्वाचन आयुक्त दिनेशकुमार थपलियाका अनुसार मुलुकका सबै पालिका केन्द्रमा १ मंसिर वा अर्काे कुनै उपयुक्त समयमा टोली खटाएर मतदाता नामावली संकलन विशेष अभियान अघि बढाइने छ । मिति तय भइनसके पनि मंसिर पहिलो हप्ताको आसपासमा यो अभियान सञ्चालन गर्न लागिएको उनले जानकारी दिए । उनले भने, ‘आउँदो चैतसम्ममा स्थानीय तहको निर्वाचन हुन्छ भन्ने कानुनी व्यवस्थालाई टेकेर आउँदो मंसिर मसान्तमा अभियान सम्पन्न गर्ने उद्धेश्यले मतदाता नामावली संकलन विशेष अभियान सञ्चालन गरिनेछ ।’
जनताको घरदैलो नजिक पुगेर सेवा प्रदान गर्ने क्रममा आयोगले नामावली संकलन गाउँपालिकाको केन्द्रमै दर्ता टोली खटाएर गराउन लागेको हो । मतदाता नामावलीमा नाम दर्ताका लागि १८ वर्ष पुगिसकेका व्यक्तिले पालिका केन्द्रमा आउने टोलीसमक्ष नेपाली नागरिकताको प्रमाणपत्र देखाएर आफ्नो नाम दर्ता गराउन सक्नेछन् । अभियानमा नाम दर्ताका सन्दर्भमा १६ वर्ष उमेर पुगेका व्यक्तिकोसमेत नाम दर्ता र तस्वीर खिच्ने काम हुनेछ । निर्वाचनका लागि मतदाता नामावली सबैभन्दा प्राथमिक विषय मानिएकाले आयोगले विशेष अभियानमार्फत मतदाता नामावली अद्यावधिक गर्न लागेको हो ।
आयोगले रोजगारी, पठानपाठन र व्यवसायका सिलसिलामा स्थायी ठेगानाभन्दा बाहिर रहे बसेका मतदातालाइ छिट्टै नै सवै निर्वाचन कार्यालय, इलाका प्रशासन कार्यालय र जिल्ला प्रशासन कार्यालयमा ३६५ दिन नियमितरूपमा मतदाता नामावली नाम दर्ताका लागि आवश्यक स्थायी बन्दोबस्ती मिलाउन लागेको छ । कार्यस्थलबाटै आफ्नो स्थायी ठेगानामा मतदाता नामावलीमा नाम संकलन गर्न चाहनेलाई सहज तुल्याउने उद्धेश्यले आयोगले मुलुकभरका सबै निर्वाचन कार्यालयबाट बाह्य जिल्लाकोसमेत मतदाता नामावलीमा नाम दर्ता गर्ने अभियान पनि प्रारम्भ गर्न लागेको हो ।
आगामी दिनमा यो अभियानलाई कानुनी बन्दोबस्तभित्र राखेर सधैँ नियमितरूपमै संकलन गर्ने व्यवस्था मिलाइने प्रमुख आयुक्त थपलियाले जानकारी दिएका छन् । विद्यमान निर्वाचन ऐनअनुरूप निर्वाचनको मिति तय भएपछि मतदाता नामावली संकलन गर्न नसकिने प्रावधान छ । मतदाता नामावली संकलन गर्नका निम्ति निर्वाचन आयोगलाई एकाधिकार छ ।
आयोगले नियमितरूपमा जिल्ला प्रशासन कार्यालय, जिल्ला निर्वाचन कार्यालय र इलाका प्रशासन कार्यालय मतदाता नामावली दर्ता गर्दै आएको छ । निर्वाचन आयोगले कुनै पनि मतदाता मतदानमा नछुटुन् भन्ने ध्येयले निर्वाचन अघि निर्वाचनलाई लक्षित गरी नामावली संकलनसम्बन्धी विशेष कार्यक्रम सञ्चालन गरी मतदाता नामावली संकलन गर्दै आएको छ ।
