जनकपुरधाम– नेकपा माओवादी केन्द्रका अध्यक्ष पुष्पकमल दाहालले मधेसी जनताको साथ पाए मधेसमै आएर चुनाव लड्ने र प्रधानमन्त्री बनेर संविधान संशोधन गर्ने बताएका छन् । सर्लाहीको मलंगवामा शनिबार आयोजित शिक्षक संगठनको एकता कार्यक्रममा अध्यक्ष दाहालले जनता समाजवादी पार्टीसँग एकताको प्रस्ताव पनि गरेका छन् ।
कार्यक्रममा आफूसँगै उपस्थित जनता समाजवादी पार्टीका नेता महेन्द्र राय यादवलाई सम्बोधन गर्दै उनले भने, ‘म महेन्द्रजीलाई पनि भन्छु पार्टी एकता गरौँ, ढुक्कै । क्षेत्रीय पार्टी बनाएर किन बस्ने ?’ दाहालले भने, ‘गठबन्धन त हामीले गरेकै छाँ । अब पार्टी एकता गरौँ । ढिलो नगरौँ, तपाईंहरूलाई चाहिने अधिकार र सम्मान हामी दिन्छौँ ।’ उनले मधेसी जनताको पक्षमा सधैँ माओवादी रहेको भन्दै उनले आगामी निर्वाचनमा मधेसमै आएर चुनाव लड्ने बताए । मधेस माओवादीमय नहुँदासम्म मधेसी जनताको वास्तविक अधिकार प्राप्त नहुने र विकास पनि नहुने उनको भनाइ थियो ।
नेपालमा गणतन्त्र माओवादीकै कारणले आएको बताउँदै उनले मधेसलाई सम्मान दिने, पहिचान दिने र मधेसीलाई राष्ट्रको सर्वोच्च निकायमा नेतृत्वमा पु¥याउने पहल माओवादीले गरेको बताए । अध्यक्ष दाहालले जुन बेला मधेसमा अधिकारको लडाइँ चलिरहेको थियो त्यो लडाइँको बेलामा आफ्नो ध्यान मधेसमै रहेको बताए । उनले मधेसी, उत्पीडितलाई अधिकार प्राप्त नभएसम्म यो राष्ट्र स्वतन्त्र पनि हुन नसक्ने भन्दै त्यसका लागि सबभन्दा पहिला मधेसी राष्ट्रिय मुक्ति मोर्चा बनाएर सामन्त, दलाल, भ्रष्टको विरुद्ध आन्दोलन छेडिएको स्मरण गराए ।
‘मधेसमा यति ठूलो बलिदान नभएको भए अहिले देशमा संघीय गणतन्त्र, समानुपातिक समावेशी हुँदैनथ्यो,’ उनले भने । अध्यक्ष दाहालले भने, ‘जुन पार्टी र नेतृत्वले मधेस र मधेसी जनताको अधिकार र आत्मसमानका लागि लड्यो, जुन पार्टीले मधेसका व्यक्तिलाई राष्ट्रको सबभन्दा ठूलो राष्ट्रपतिको पदसम्म पु¥यायो त्यो पार्टी विदेशीको दलाल, मधेसविरोधी भनियो । त्योभन्दा बढी दुःखको कुरा के हुन सक्छ ।’
‘संविधानविरोधी, संघीयताविरोधी केपी ओलीलाई आफूलाई मधेसको मसिहा भन्ने महन्थ ठाकुर, राजेन्द्र महतो उसैलाई साथ दिएर उसको सरकारमा सहभागी भएको हो कि होइन,’ दाहालले अगाडि भने, ‘यो कुरा तपाईं हामी बिर्सन सक्छौँ । को मधेसको मित्र हो, को शत्रु हो । मधेसविरोधी केपी ओलीलाई साथ दिने ।’ उनले देशमा ठूलो बलिदानपछि आएको संघीय लोकतान्त्रिक गणतन्त्र अहिले पनि कार्यान्वयन हुन नसकेको बताए । उनले संघीयताविरोधी, संविधानविरोधीहरू, समावेशी समानुपातिकका विरोधीले अहिले पनि यो संविधान लागू नहोस्, संविधान परिमार्जन भएर लागू नहोस्, त्यसलाई रोक्न अनेकौँ षड्यन्त्र गरिरहेको आरोप लगाए ।
