काठमाडौं– प्रमुख सत्तारुढ दल नेपाली कांग्रेसको १४औँ महाधिवेशनको कार्यतालिका पटक–पटक सरिसकेको छ । अन्तिमपटक आगामी ९ देखि १३ मंसिरसम्म काठमाडौंमा हुने भनिएमा उक्त मितिमा पनि महाधिवेशन नहुने निश्चितजस्तै छ । पछिल्लोपटक तोकिएको महाधिवेशनको मिति पनि प्रभावित हुने भएपछि अब कांग्रेसको महाधिवेशन कहिले हुन्छ भन्ने चासो बढिरहेको छ । क्रियाशील सदस्यता विवादका केही जिल्लामा अझै पनि मिल्न नसकेकाले तोकिएको मितिमा महाधिवेशन नहुने देखिएको हो ।
कांग्रेसको महाधिवेशन पछिल्लोपटक तोएिका मितिमा पनि नहुने भएपछि प्रधानमन्त्री एवं कांग्रेस सभापति शेरबहादुर देउवाले मंगलबार पार्टीको निर्वाचन समितिसँग छलफल गरेका छन् । छलफलमा कांग्रेसको महाधिवेशन कार्यतालिका फेरि संशोधनबारे छलफल भएको थियो । निर्वाचन समितिले सभापति देउवासँगै वरिष्ठ नेता रामचन्द्र पौडेलसहितका पदाधिकारीसँग गरेको छलफलमा तोकिएको समयमा महाधिवेशन गर्न नसकिने निष्कर्ष सुनाउँदै नयाँ कार्यतालिका तोक्न सुझाव दिएको छ ।
निर्वाचन समितिका सदस्य वरिष्ठ अधिवक्ता गोपालकृष्ण घिमिरेले मंसिर ९ देखि १३ गतेको अवधिमा महाधिवेशन गर्न नसकिने बताएका छन् । निर्वाचन समितिले पार्टीले निर्वाचन कार्यतालिकाअनुसार काम नगरेको गुनासो गरेको थियो । सभापति देउवाले मंसिरभित्रै महाधिवेशन सम्पन्न हुने गरी निर्वाचन कार्यतालिका बनाउन निर्वाचन समितिलाई निर्देशन दिएका सहमहामन्त्री डा. प्रकाशशरण महतले जानकारी दिए । ‘पार्टी सभापतिले स्पष्ट रूपमा निर्वाचन समितिलाई सम्पूर्ण अधिकार छ । तपाईंहरूले यो प्रक्रियालाई चाँडोभन्दा चाँडो अगाडि बढाउनुहोस् । र मंसिरभित्र महाधिवेशन गरी सक्नुपर्छ ।
त्यसकारण यो तलदेखि केन्द्रीय महाधिवेशन जुन छ, यो मंसिरभित्र हुनुपर्छ । र त्यही अनुरूप तपाईंहरूले कार्यतालिका लागि होमवर्क गर्नुस् भनेर सभापतिले स्पष्ट निर्देशन दिनुभएको छ’ डा. महतले भने ।
निर्वाचन समितिका सदस्य घिमिरेले पार्टीले सहयोग गरेमा मंसिरभित्रै महाधिवेशन गर्न सकिने भन्दै आफूहरूले दुई दिनमा नयाँ कार्यतालिका ल्याउने बताए । छलफलका क्रममा वरिठ नेता पौडेलले मंसिर ९ देखि १३ गतेकै मितिमा महाधिवेशन गर्नुपर्ने बताएका थिए । तर, निर्वाचन समितिले सो समितिमा महाधिवेशन गर्न नसकिने बताएको छ । कतिपय जिल्लामा वडा अधिवेशन पनि नभएको अवस्थामा अबको एक महिनाको अवधिमा सबै महाधिवेशन गर्न नसकिने निर्वाचन समितिले बताएको छ ।
त्यसपछि पौडेलले महाधिवेशन मंसिरभित्र सम्पन्न गर्ने गरी केन्द्रीय समितिबाट निर्णय गराउन सभापति देउवालाई आग्रह गरेका छन् । ‘महाधिवेशनको कार्यतालिकामा केही सानोतिनो हेरफेर गर्नुप¥यो भने कार्य समितिले बनाएको कार्यतालिका हो । र त्यसलाई हेरफेर गर्न पनि केन्द्रीय कार्य समिति बैठक बोलाउनुपर्छ । त्यसलाई फर्मल बनाउन पनि केन्द्रीय कार्य समितिको बैठक बोलाइयोस् भनेर मैले माग गरेको छु’ वरिष्ठ नेता पौडेलले भने ।
कांग्रेसले पछिल्लोपटक संशोधन गरेको कार्यतालिका अनुसार अधिवेशन हुन बाँकी २० जिल्लामा ५ असोजमा वडा अधिवेशन हुनु पर्ने थियो । तर, अझै केही जिल्लामा क्रियाशील सदस्यता विवाद समाधान हुन नसकेकाले वडा अधिवेशन हुन बाँकी छ । त्यस्तै, ९ असोजमा हुने भनिएको पालिका अधिवेशन पनि ति जिल्लामा बाँकी छ । १२ असोजमा हुने भनिएको प्रदेशसभा क्षेत्रीय अधिवेशन, प्रतिनिधिसभा क्षेत्रीय अधिवेशन प्रभावित भएको छ । १५ असोजमा हुने भनिएको एक मात्रै प्रतिनिधिसभा निर्वाचन क्षेत्र भएको जिल्लाको जिल्ला अधिवेशन, १८ असोज हुने भनिएको एकभन्दा बढी प्रतिनिधिसभा निर्वाचन क्षेत्र भएको जिल्ला अविधेशन प्रभावित भइसकेको छ । १० देखि १२ कात्तिकसम्म हुने भनिएको प्रदेश अधिवेशन प्रभावित हुने निश्चित भइसकेको छ भने, ९–१३ मंसिरसम्म काठमाडौंमा गर्ने भनिएको केन्द्रीय महाधिवेशनको समयतालिका पनि अनिश्चित बनेको छ ।
