काठमाडौं– नेपालको राष्ट्रिय स्वाधिनता, स्वतन्त्रता र सार्भभौमिकतामाथिको प्रहार रोक्न सम्पूर्ण नेपाली एकजुट हुन आवश्यक रहेको पूर्वसुरक्षाकर्मी परिषद्को धारणा रहेको छ । मंगलबार एक कार्यक्रमको आयोजना गर्दै परिषद्ले राष्ट्र र राष्ट्रियताको सुरक्षा गर्न आमनेपालीलाई एकजुट हुन आग्रह गरेको हो ।
नेपालका लागि भारतीय पूर्वराजदूत रञ्जित रेद्वारा लिखित पुस्तक ‘काठमाडौं डिले’ मा ‘रिसेटिङ इन्डिया–नेपाल टाइज’ मा नेपाल र नेपालीको स्वाभिमानमाथि गम्भीर आक्रमण भएको, नेपालको अहित हुने गरी भारतले विगतमा नेपालविरुद्व गरेका अक्षम्य अपराधहरूको भरणपोषण गरेकोसमेत परिषद्को आरोप छ । कार्यक्रममा बोल्दै पूर्वडिआइजी रमेश खरेलले नेपाललाई भुटानी ढाँचामा लैजान भारतले निरन्तर गरिरहेको प्रयास र नेपाली जनताको सार्वभौमसत्तामाथि सधैँ खेलिरहने भारतको मनसाय कायमै रहेको बताए ।
भारतसँग मैत्रीपूर्ण सम्वादबाट समस्याको समाधान खोजिनु पर्नेसमेत उनको भनाइरहेको छ । राष्ट्रियता बचाइराख्न कूटनीतिक निकाय र गृह प्रशासन चनाखो हुनुपर्ने जनाउँदै उनले पूर्वसुरक्षा निकाय मात्रै नभई हरेक नेपालीमा राष्ट्रियता जाग्नुपर्ने बेला आइसकेको उनको धारणा रहेको छ । कहिले पनि कसैको गुलाम नभएको देशको राष्ट्रियतामाथि कसैले सवाल उठाउँछ भने पूर्वसुरक्षाकर्मी कुनै पनि हालतमा चुप लागेर नबस्नेसमेत उनको चेतावनी छ ।
त्यस्तै, कार्यक्रममा बोल्दै पूर्वजर्नेल डा.प्रेमसिह बस्न्यातले विकासका नाममा एमसिसी भित्र्याउन र कोही भुटानी मोडेलको राज्य स्थापना गरी सिक्किमे लेन्डुप बनाउने अभिप्राय रहेको बताए । यस्तो लोन्डुपे प्रवृत्तिविरुद्व एक भई उभिनुपर्नेमा जोड दिए । सार्वभौम स्वतन्त्रता र स्वाधीनतालाई कुल्चने भु्टानी मोडलको राजसंस्था आवश्यक नरहेको उनको भनाइ छ । यदि देश र जनतालाई आवश्यक महसुस भए नेपालीले नै आवश्यकता अनुसारको राजसंस्था स्थापना गर्न सक्षम रहेको उनले बताए ।
सुगौली सन्धिपछि नेपालको सार्वभौमिकता, अखण्डता, राष्ट्रियता, राष्ट्रिय एकता र नागरिक सुरक्षा सबैभन्दा कमजोर दुर्बल भएको, नेपाली जनता निर्णायक नभई विदेशीहरू निर्णायक रहँदै आएको उनको भनाइ छ । तिनै तत्वहरूले नेपाली धर्म संस्कृति, नेपाली भाषा, नेपाली सेना, नेपाल प्रहरी सबैलाई कमजोर बनाउन खोजेकोसमेत उनको दाबी छ । यसैगरी, कार्यक्रममा सामाजिक अगुवा राजेन्द्रकेशरी पाण्डेले नेपाल कहिल्यै कसैको गुलाम नभएको भन्दै राष्ट्रियताको सवालमा प्रश्न उठाउँछ भने पूर्वसुरक्षाकर्मी कुनै हालतमा चुप नबस्ने बताए । उनले भने, ‘यस्ता किसिमका क्रियाकलापका खातिर सदैब खबरदारी गर्दै परिआए राष्ट्रका लागि बलिदानी दिनसमेत तयार छौँ ।’
त्यस्तै, घाइते तथा अपांग संघ तथा भूपूसुरक्षाकर्मी संघका उपाध्यक्ष हिमाल अर्यालले विकासका नाममा एमसिसी भित्र्याउन र कोही भुटानी मोडेलको राज्य स्थापना गरी सिक्किमे लेन्डुप बनाउने अभियानमा आएको हुँदा लेन्डुपे प्रवृत्तिका विरुद्ध कटिबद्ध भई अगाडि बढ्ने चेतावनी दिए । उनले भने, ‘हाम्रो सार्वभौम स्वतन्त्रता र स्वाधिनतालाई कुल्चने भुटानी मोडेलको राजसंस्था हामीलाई आवश्यक छैन । देश र जनतालाई आवश्यक महसुस भए नेपालीहरू नै राजसंस्था स्थापना गर्न सक्षम छौँ ।’ कार्यक्रममा संयोजक केबी रावतले प्रेस विज्ञप्ति पढेर सुनाएका थिए । कार्यक्रमको संचालन हेमशंकर जेडीले गरेका थिए । पूर्वसुरक्षाकर्मीका थुप्रै वक्ताहरूले कार्यक्रममा आफ्नो अभिव्यक्ति दिएका थिए ।
