विराटनगर– प्रदेश १ का मुख्यमन्त्री भीम आचार्यले विश्वासको मत लिने प्रयोजनका लागि सोमबार राखिएको प्रदेशसभा बैठक स्थगित गरिएको छ । प्रमुख प्रतिपक्षी दल नेपाली कांग्रेसभित्रको आन्तरिक समस्याका कारण प्रदेशसभा बैठक १५ कात्तिकसम्मका लागि स्थगित गरिएको हो । सत्तारुढ दल नेकपा एमाले विभाजित भएपछि एक महिनाभित्र विश्वासको मत लिनुपर्ने संवैधानिक प्रावधानअनुसार आइतबार प्रदेशसभाको बैठक डाकिएको थियो । तर, बैठक सुरु हुने बेलामा अकस्मात कांग्रेसले बैठक सार्न माग गर्दै सभामुख प्रदीप भण्डारीलाई निवेदन दिएका थिए ।
कांग्रेसले पार्टी सभापति तथा प्रधानमन्त्री शेरबहादुर देउवाको भ्रमणका कारण नेताहरू व्यस्त हुनुपरेकाले बैठक सार्न सभामुखलाई आग्रह गरेको थियो । त्यसपछि सत्तारुढ दल एमालेले पनि महाधिवेशन र पार्टीको केन्द्रीय कमिटी बैठक भएको भन्दै १५ कात्तिकसम्म प्रदेशसभा बैठक स्थगित गर्न सभामुखलाई आग्रह गरेपछि बैठक एकसाता पर सारिएको हो । बैठक सरेसँगै अल्पमतमा परिसकेको आचार्य नेतृत्वको प्रदेश सरकारको आयु एकसाता लम्बिएको छ ।
कांग्रेसमा कलह
हाल कांग्रेस सभापति तथा प्रधानमन्त्री देउवा बाढी पहिरोको कारण प्रभावित क्षेत्रको अवलोकनका लागि प्रदेश १ को भ्रमणमा छन् । कांग्रेसले सभामुखलाई बुझाएको पत्रमा पनि नेताहरू प्रधानमन्त्रीको भ्रमणका कारण व्यस्त हुने भएकाले बैठक सार्न आग्रह गरिएको छ । यद्यपि खास कारण त्यो नभएको स्रोतको दाबी छ । प्रदेशसभा बैठक सुरु हुनैलाग्दा कांग्रेसका केही प्रदेशसभा सदस्यहरूले ङ्खलोर क्रस गर्ने सूचना पाएपछि कांग्रेसले हतारमा बैठक सार्न माग गरेको थियो ।
९२ सदस्यीय प्रदेशसभामा एमालेको सभामुखसहित ४१, कांग्रेसको २१, नेकपा माओवादी केन्द्रको १५, नेकपा एकीकृत समाजवादीको १०, जनता समाजवादीको ३ तथा राप्रपा र संघीय लोकतान्त्रिक राष्ट्रिय मञ्चको १÷१ जना प्रदेशसभा सदस्य छन् । संघीय सरकारमा रहेका पाँच दलीय गठबन्धनबीच प्रदेश १ मा सरकारको नेतृत्व एकीकृत समाजवादीलाई दिने सहमति भएको थियो । सोहीअनुसार आचार्यले विश्वासको मत नपाउने र एकीकृत समाजवादीका राजेन्द्र राई मुख्यमन्त्री बन्ने लगभग पक्कापक्की जस्तै थियो । तर, कांग्रेस र जसपाका करिब ९ जना प्रदेशसभा सदस्ले ङ्खलोर क्रस गरेर आचार्यलाई विश्वासको मत दिने तयारी भएको सूचना पाएपछि कांग्रेसले बैठक सारेको हो ।
यद्यपि कांग्रेसले आङ्खनै नेतृत्वमा सरकार बनाउन चाहेको कुरा पनि प्रष्ट छ । कांग्रेसका प्रदेश संसदीय दलका नेता राजीव कोइरालाले आलोपालो मुख्यमन्त्री बन्ने सहमति वाग्मतीमा भएको भन्दै प्रदेश १ मा पनि सोही अनुसार हुनुपर्ने बताउँदै आएका छन् । प्रधानमन्त्री देउवाले प्रदेश १ को मुख्यमन्त्री एकीकृत समाजवादीलाई दिने सहमति गरेपछि कांग्रेस वरिष्ठ नेता रामचन्द्र पौडेल समूह असन्तुष्ट छ ।
प्रदेश १ का कांग्रेस संसदीय दलका नेता कोइराला पौडेल समूहमा पनि डा.शेखर कोइराला निकट हुन् । मुख्यमन्त्रीको दाबेदारसमेत रहेका उनी कम्तीमा आलोपालोको सहमति होस् भन्ने चाहन्छन् । वाग्मतीमा एउटा र प्रदेश १ मा अर्काे नियम लागू नहुने भन्दै उनले मुख्यमन्त्रीमा आलोपालो हुनुपर्ने भन्दै नेतृत्वको ध्यानाकर्षण गराउँदै आएका छन् ।
