मंगलबारे– प्रधानमन्त्री शेरबहादुर देउवाले पार्टीको महाधिवेशन तोकिएकै मितिमा हुने बताएका छन् । पाँचथरको फाल्गुनन्द गाउँपालिकाको जलसिङ माविमा आयोजित कार्यक्रममा उनले यस्तो बताएका हुन् ।
इलाम र पाँचथरको बाढीपहिरो प्रभावित क्षेत्रको निरीक्षणमा आएका प्रधानमन्त्री देउवाले कांग्रेस कार्यकर्तालाई छुट्टै सम्बोधन गर्दै उनले महाधिवेशन तोकिएकै मितिमा हुनेमा ढुक्क हुन आग्रह गरे । उनले महाधिवेशन जस्तो कार्यक्रममा गर्दा दुई चार दिन यताउता हुनु सामान्य भएको भन्दै महाधिवेशन तोकिएकै मितिमा हुने बताए । प्रधानमन्त्री देउवाले सहमतिमा नै नेतृत्व चयनको प्रयत्न गर्न कार्यकर्तालाई निर्देशनसमेत दिए । उनले सकेसम्म सहमतिमा नै नेतृत्व चयन गर्न आग्रह गर्दैसहमति नभए प्रतिष्पर्धा हुने बताए ।
बाढीपहिरो प्रभावित क्षेत्रको निरीक्षणका लागि सञ्चार तथा सूचना तथा प्रविधिमन्त्री ज्ञानेन्द्रबहादुर कार्की, ऊर्जा तथा जलस्रोतमन्त्री पम्फा भुसाललगायतसंग आएका उनले बाढीपहिरो पीडितका लागि थप राहतको व्यवस्था गर्ने बताए । उनले चाँडै मन्त्रिपरिषद्को बैठक राखेर राहतसम्बन्धी थप निर्णय लिने पनि जानकारी गराए ।
उनले सरकारले यसअघि नै मृतकका परिवारलाई दुई लाख राहत उपलब्ध गराउने निर्णय गरिसकेको जानकारी गराउँदै सरकारले थप राहतको व्यवस्था गर्ने घोषणा गरेका थिए । उनले आफुहरूले सो क्षेत्रको स्थलगतरूपमा नै अध्ययन गरेकाले क्षति नोक्सानीको सरकारले मूल्यांकन गरेर क्याबिनेट बसेर निर्णय गर्ने जनाए । उनले भने, ‘पहिराले घर बनाउने ठाउँ नहुनेलाई जग्गा जमिन दिएर भए पनि घर बनाइदिने र घर भत्किएकालाई घर बनाउन मद्दत गर्छौं ।’
प्रधानमन्त्री देउवाले बेमौसममा परेको पानीले मेचीदेखि महाकालीसम्म ठूलो क्षति पु¥याएको जनाउँदै सरकार पीडितको साथमा रहेको बताए । उनी पहिरोपीडितको साथमा रहेको भन्दै त्यही भएर निरिक्षणमा आएको बताए । उनले बाढीपहिराबाट प्रभावित क्षेत्रका नागरिकलाई एकै ठाउँमा बसोबास गर्ने व्यवस्था मिलाउने वा नयाँ सहर बनाउने विषयमा समेत सोचिरहेको बताए ।
