महेन्द्रनगर– न्याय, कानुन तथा संसदीय मामिलामन्त्री दिलेन्द्रप्रसाद बडूले मुलुकको सफलता र संविधानको रक्षाका लागि आफुहरू सरकारमा आएको बताएका छन् । नेपाली कांग्रेस कञ्चनपुर शाखाले शनिबार आयोजना गरेको कार्यकर्ता भेटघाट कार्यक्रममा आफुहरूकासामु चुनौतीहरू पनि धेरै रहेको बताए । मुलुकको सफलता र संविधानको रक्षाका लागि आफुहरूले सो चुनौती स्वीकार गरेर सरकारमा आएको बताए । उनले भने, ‘नेपाली कांग्रेसलाई मुलुक हाँक्ने जिम्मेवारी आएको छ ।’
उनले बाढी, पहिरो र डुबानबाट मुलुकले ठूलो क्षति व्यहोर्नु परेको बताउँदै प्रधानमन्त्रीले राहत र पुनर्निर्माणका लागि विशेष चासो दिएको बताए । मन्त्री बडूले भने, ‘योजनाबद्ध ढंगले राहत र पुनस्र्थापनामा सरकार लाग्छ ।’ उनले पुनर्निर्माणभन्दा पनि तत्काल राहत पाउनुपर्ने वर्ग किसान भएको उल्लेख गरे । उनले भने, ‘पुनर्निर्माणभन्दा पनि तत्काल राहत पाउनुपर्ने वर्ग किसान हो,’ उनले बाढी र पहिराबाट भएको क्षतिका कारण पुनर्निर्माणमा ढिलाइ भए पनि राहत प्याकेज तत्काल ल्याइने उल्लेख गरे ।
उनले ‘देशभरको क्षतिको अवस्था हेर्दा वैदेशिक सहायता जुटाएर पनि जनताको पीडामा मल्हम लगाउँछौँ ।’ नेपाली कांग्रेसका केन्द्रीय सदस्य एवं पूर्वमन्त्री रमेश लेखकले बाढी र पहिराको सबैभन्दा बढी मारमा सुदूरपश्चिम प्रदेश रहेको बताए । उनले आफुहरूले प्रधानमन्त्रीज्यूको टोलीसित बाढी र पहिरो पीडित क्षेत्रको स्थलगत अनुगमन गर्दा निकै दर्दनाक अवस्था आएको बताए । नेता लेखकले भने, ‘तत्काल सरकारले राहतको व्यवस्था गर्नुपर्छ ।’
किसानलाई राहत र घरबारविहीन भएकालाई छाक टार्ने व्यवस्था मिलाउनुपर्नेमा सरकारसँग माग गरे । उनले प्रधानमन्त्रीले क्षति आफैँ हेरेर गएकोले पनि तत्काल राहत ल्याउन सरकारले पहल गर्ने बताए । उनले भने, ‘यहाँ भएको क्षति प्रधानमन्त्रीले आफैँ हेरेर जानुभएको छ । तत्काल राहत ल्याउन सरकारले पहल गर्नेछ ।’
