काठमाडौं– संघीय सरकारमा सत्ता साझेदारी गरिरहेका दुई दल नेपाली कांग्रेस र नेकपा एकीकृत समाजवादीबीच वाग्मती प्रदेशमा सरकारको नेतृत्वमा आलोपालो गर्ने सहमति भएको छ । यसअघि सत्ता साझेदार दलहरूबीच वाग्मती प्रदेश सरकारको नेतृत्व एकीकृत समाजवादीलाई दिने सहमति बनेको थियो । उक्त पार्टीले संसदीय दलका नेता राजेन्द्र पाण्डेलाई मुख्यमन्त्री बनाउने तयारी गरे पनि कांग्रेस वाग्मती प्रदेश संसदीय दलका नेता ईन्द्रबहादुर बानियाँले पनि मुख्यमन्त्रीमा दाबी गरे पनि समस्या उत्पन्न भएको थियो ।
बिहीबार मुख्यमन्त्री अष्टलक्ष्मी शाक्यले विश्वासको मत लिनुअघि विपक्षी गठबन्धन दलहरूबीच भएको छलफलमा प्रदेश सरकारको नेतृत्व आलोपालो गर्ने सहमति बनेको हो । बिहीबार प्रदेशसभाको विपक्षी गठबन्धनमा रहेका नेकपा माओवादी केन्द्र, नेपाली कांग्रेस, नेकपा एकीकृत समाजवादी र जनता समाजवादी दलको बैठकले प्रदेशसभाको कार्यकालको आधा–आधा समय सरकारको नेतृत्व गर्ने सहमति भएको कांग्रेस वाग्मती प्रदेश संसदीय दलकी प्रमुख सचेतक राधा घलेले जानकारी दिइन् । उनका अनुसार सुरुआतमा प्रदेशसभाको आधा कार्यकाल एकीकृत समाजवादी पार्टीका पाण्डेलाई मुख्यमन्त्रीमा समर्थन गर्ने र बाँकी आधा कार्यकाल कांग्रेसका बानियाँ मुख्यमन्त्री हुने सहमति भएको बताइन् ।
एकीकृत समाजवादीका नेताहरूले भने मुख्यमन्त्री पद आधा–आधा कार्यकाल बाडफाँट गर्ने सहमतिबारे अनभिज्ञता प्रकट गरेका छन् । एकीकृत समाजवादी पार्टीका प्रदेशसभा सदस्य लक्ष्मण लम्सालले आलोपालाको सहमति नभएको जिकिर गरे । बिहीबार गठबन्धनका दलहरूबीच ३ बुँदे सहमति भएको र त्यसमा बजेट, मन्त्रिपरिषद गठन र राजनीतिक नियुक्ति सहमतिका आधारमा गर्ने उल्लेख गरिएको उनले बताए । ‘३ बुँदे सहमति भएको हो, अरु कुरा थाहा छैन’ लम्सालले भने ।
मतदान १० कात्तिकमा
वाग्मती प्रदेशकी मुख्यमन्त्री अष्टलक्ष्मी शाक्य नेतृत्वको सरकारको आयु १० कात्तिकसम्म लम्ब्याइएको छ । बिहीबार प्रदेशसभा बैठकमा मुख्यमन्त्री शाक्यले विश्वासको मत मागेकी थिइन् । तर, विश्वासको मतका लागि छलफल भए पनि मतदान नभई १० कात्तिकसम्म प्रदेशसभा बैठक स्थगित गरिएको हो । प्रदेशसभाका सभामुख सानुकुमार श्रेष्ठले प्रदेशसभाको अर्को बैठक १० कात्तिकमा बस्ने गरी बिहीबारको बैठक स्थगित गरेका छन् ।
