दमौली– नेपाली कांग्रेसका वरिष्ठ नेता रामचन्द्र पौडेलले वरिष्ठ नेता पौडेलले कांग्रेसमा देखा परेको नयाँ जागरणले नेपालको राजनीति, लोकतान्त्रिक मान्यता र परिवर्तनलाई संस्थागत गर्न सहयोग पुग्ने विश्वास व्यक्त गरेका छन् । नेपाली कांग्रेस भिमाद नगर समितिले विहिबार आयोजना गरेको शुभकामना आदानप्रदान कार्यक्रममा वरिष्ठ नेता पौडेलले सुदूरपश्चिमदेखि पूर्वसम्म, हिमालदेखि तराईसम्म कांग्रेसमा नयाँ जागरण देखा परेको बताए । उनले यसले नेपालको राजनीति, लोकतान्त्रिक मान्यता र परिवर्तनलाई संस्थागत गर्न सहयोग पुग्ने बताए । उनले कांग्रेस सुधारको बाटोमा अगाडि बढ्न खोजेको आभाष हुन थालेको पनि बताए ।
वरिष्ठ नेता पौडेलले भने, ‘कांग्रेसको १४औँ महाधिवेशनअन्तर्गत देशभर महाअभियान चलिरहेको छ, कांग्रेसमा लहर आएको छ, यसले नेपालमा लोकतन्त्रको भविष्य सुनिश्चित छ भन्ने आभाष हुन थालेको छ ।’ उनले तल्लो तहबाटै कांग्रेसमा आकर्षण बढेको उल्लेख गर्दै कांग्रेसलाई सुधार र सिद्धान्तको बाटोमा अगाडि बढाउने संकल्प देखा परेको बताए ।
उनले दुई तिहाई मत प्राप्त कम्युनिष्ट पार्टी विभाजित भए पनि कांग्रेस त्यत्तिकै ढुक्क हुने अवस्था नरहेको बताए । उनले आफैमा सजग र प्रतिबद्ध भएर अगाडि बढ्नुपर्ने सुझाव दिए । ‘कांग्रेसको प्रमुख विपक्षी कम्युनिष्ट पार्टी हो’, उनले भने, ‘अरु फुटे भनेर हामी रमाउने होइन, हामीले आफ्नो संगठन बलियो बनाउनुपर्छ ।’ वरिष्ठ नेता पौडेलले यो वा त्यो भनेर कित्ता छुट्याउन नहुनेमा जोड दिँदै कित्ताले नै गर्दा कांग्रेस आजको यो अवस्थामा आएको बताए ।
तनहुँका दशवटै पालिकाबाट विजयी भएर आएका सबै नेता तथा कार्यकर्तामा आफ्नो अनुहार देखेको भन्दै भने, ‘कांग्रेसलाई लोकतान्त्रिकरण र रूपान्तरण गर्ने उत्साह लिएर निर्वाचित भएर आएका सबैमा मैले मेरो अनुहार देखेको छु,’ नेपाली कांग्रेस तनहुँका सभापति बैकुण्ठ न्यौपानेले राजनीतिलाई व्यवस्थित गर्ने अभियानमा लाग्नुपर्नेमा जोड दिए । नेपाली कांग्रेस तनहुँका कार्यवाहक सभापति जितप्रकाश आलेले १४औंँ महाधिवेशनमा सही नेतृत्व छनोट गर्न आग्रह गरे । विचार र प्रेरणाको स्रोत बिपी कोइरालापछि रामचन्द्र पौडेल भएको दाबी गर्दै कार्यकर्ताले नेता छान्दा मूल्यांकन गर्नुपर्ने उनको भनाई थियो ।
