काठमाडौं– नेकपा (एकीकृत समाजवादी) का महासचिव डा. वेदुराम भुसालले सरकार गठनमा ढिलाइ हुनुमा अझैं मन्त्रालय बाँडफाँडमा सहमति नहुनु प्रमुख कारण रहेको बताएका छन् । शनिबार आयोजित साक्षात्कारमा बोल्दै महासचिव भुसालले यस्तो बताएका हुन् । उनले भने, ‘सरकार विस्तार छिट्टै हुन्छ । प्रधानमन्त्री शेरबहादुर देउवाले हाम्रो पार्टीका अध्यक्ष माधव नेपालसँग भेटेर सल्लाह गर्छु भन्नुभएको छ । सरकारले छिट्टै पूर्णता पाउनेछ । त्यसपछि सरकारले गर्नुपर्ने काम अघि बढ्नेछन् ।’ उनले सरकारले कहिलेसम्म पूर्णता पाउँछ भनेर ठ्याक्कै भविष्यवाणी गरेर भन्न नसकिने पनि बताए ।
भुसालले अहिले ‘अर्ली इलेक्सन’ गर्ने कुरा असम्भव रहेको पनि टिप्पणी गरे । उनले भने, ‘अहिले अर्ली–इलेक्सन गर्ने सम्भव कुरा होइन । प्रधानमन्त्रीले अहिले नै प्रतिनिधिसभा विघटन गर्न पाउनुहुन्न । उहाँले गर्नुभयो भने त्यो पनि असंवैधानिक हुन्छ । सर्वदलीय बैठकमा उहाँले यो कुरा हुँदैन भन्नुभएको छ । यो बाहिर चलाइएको हल्ला हो । अर्ली–इलेक्सन, अहिले त्यो बाटो जाने स्थिति छैन । जाने मनस्थिति भएको पनि मैले देँख्दिन ।’ त्यस्तै, उनले प्रमुख प्रतिपक्षी दल नेकपा (एमाले) ले संसद् चल्न नदिनुलाई लोकतन्त्र र संविधानमाथिको हमला भएको टिप्पणी गरेका छन् । उनले भने, ‘त्यो गतिवधिले एमाले नाँग्गिएको छ ।’
उनले एमालेले आगामी निर्वाचनमा एक्लैले बहुमत ल्याउँछु भन्नु हावादारी कल्पनामात्रै भएको पनि टिप्पणी गरे । उनले भने,‘यो त केपी ओलीले हिजो रेल, पानीजहाज ल्याउँछु भनेजस्तै हावादारी कल्पनामात्रै होे ।’ भुसालले अहिले नेपालको राजनीति अत्यन्तै तरल अवस्थामा रहेको सुनाए । उनले उनले एमाले अध्यक्ष केपी ओलीबाट प्रतिनिधिसभालाई विघटन गरेर लोकतन्त्रलाई समाप्त पार्न खोजिएको थियो भन्ने पनि टिप्पणी गरे । अहिले एमालेले सदन अवरुद्ध गर्नुपनि त्यसकै निरन्तरता भएको उनको आरोप छ । उनले भने,‘अदालतमा विचाराधिन मुद्दामाथि संसद्मा छलफल हुन सक्दैन् । एमालेले जुन विषय उठाएर सदन अवरुद्ध गरिरहेको छ, त्यो गैरसंवैधानिक छ । एमालेले निरन्तर रूपमा त्यही विषय उठाएको छ ।
कानूनी हिसाबले पनि सभामुखको निर्णयउपर, सदनमा विरोध गरेर सदन अवरुद्ध गर्न पाईँदैन् । कानूनी उपचार खोज्न सकिन्छ, तर त्यहीँभित्र विरोध गर्ने अधिकार हुँदैन् । यो खालको व्यवहारले राजनीतिलाई अस्थिर बनाईहने र लोकतन्त्रलाई धराप बनाउने काम भयो ।’ उनले एमालेको प्रथम विधान महाधिवेशनलाई अध्यक्ष केपी शर्मा ओलीको प्रशंसामा गीत गाउने कुम्भमेलाको संज्ञा दिए । उनले भने,‘सरकारमा रहँदा भ्रष्टाचार गरेर कमाएको करोडौं रकम पैसा खर्च गर्ने, र त्यहाँ मोजमजा गर्ने थलो बनाईएको छ ।’
उनले जनताको बहुदलीय जनवादलाई मार्गदर्शन मान्छु भन्ने एमालेमा अहिले प्रथम विधान महाधिवेशनमा फरक विचार पनि राख्न नदिईएको टिप्पणी गरे । उनले भने,‘विचारको विविधितालाई अगिंकार गर्ने काम भएन । ओलीको प्रतिवेदनमा न्यायालयमाथि विषवमन गरिएको छ । स्वतन्त्र न्यायालायमाथि धावा बोल्ने काम गरिएको छ । कानूनी राज्यको सिद्धान्त पालना गर्ने कुरा पनि एमालेमा छैन् । पार्टीलाई विधानअनुसार चलाउने कुरा पनि देखिँदैन् । अहिलेको भेला भन्नुहोस, वा मेला यो ओलीको प्रशंसामा गीत गाएर समाप्त हुन्छ ।’
