काठमाडौं– नयाँ राजनीतिक परिस्थितिमा पार्टीको नीति र विधि तय गर्न ऐतिहासिक मानिएको नेकपा एमालेको प्रथम विधान महाधिवेशन शुक्रबारदेखि सुरु हुँदैछ । तीन दिनसम्म ललितपुरको गोदावरीस्थित सनराइज सम्मेलन केन्द्रमा आयोजना हुने महाधिवेशनको सम्पूर्ण तयारी पूरा भएको छ । अन्तरविरोध र अस्थिरताका कारण सरकारको नेतृत्वबाट बाहिरिएर प्रमुख प्रतिपक्षी भएको संसद्को ठूलो दल एमालेले करिब छ हजार प्रतिनिधिलाई सहभागी गराएर विधान महाधिवेशन गर्न लागेको हो ।
आगामी मंसिरको दोस्रो साता नेतृत्व चयनका लागि पार्टीको १०औँ राष्ट्रिय महाधिवेशन तय गरेको एमालेको विधान महाधिवेशनलाई समसामयिक राजनीतिक दलहरूमध्ये मौलिक विशेषताको भेला मानिएको छ । एमालेको गत ०७१ असारमा नवौँ महाधिवेशन भएको थियो । यसअघि छुट्टै विधान महाधिवेशन हुने प्रचलन थिएन । विधानको विषयमा र नेतृत्व चयनको विषय एकसाथ गर्दा प्रतिनिधिको ध्यान नेतृत्व चयनतर्फ मात्र जाने भन्दै एमालेले पहिलो पटक विधान र नेतृत्व चयनका लागि फरक–फरक महाधिवेशन तय गरेको हो ।
महाधिवेशनको उद्घाटन शुक्रबार पार्टी अध्यक्ष एवं पूर्वप्रधानमन्त्री केपी ओलीले गर्ने कार्यक्रम रहेको विधान महाधिवेशन मूल व्यवस्थापन समितिले जनाएको छ । समितिका संयोजक रामबहादुर थापाले बिहीबार राजधानीमा आयोजना गरेको पत्रकार सम्मेलनमा त्यसबारे जानकारी दिइएको हो ।
उद्घाटन सत्रपछि महाधिवेशनको बन्दसत्रमा केन्द्रीय कमिटीको तर्फबाट अध्यक्ष ओलीले राजनीतिक प्रतिवेदन, महासचिव ईश्वर पोखरेलले संगठनात्मक प्रस्ताव र उपमहासचिव एवं संगठन विभाग प्रमुख विष्णुप्रसाद पौडेलले विधान संशोधन प्रस्ताव प्रस्तुत गर्ने कार्यक्रम तय गरिएको थापाले जानकारी दिए । महाधिवेशनको दोस्रो दिन शनिबार समूह छलफल र समूह नेताबाट सुझावको प्रस्तुति गरिनेछ । तेस्रो दिन आइतबार दस्तावेज प्रस्तोताबाट समूह छलफलबाट आएका सुझाव एवं उठेका विषयलाई स्पष्ट पार्दै सारसंक्षेपीकरण गर्ने कार्यतालिका बनाइएको छ ।
महाधिवेशनको व्यवस्थापनलाई चुस्तदुरुस्त गर्न पार्टी केन्द्रीय कमिटीको बैठकबाट स्थायी कमिटी सदस्य थापा संयोजक, शेरबहादुर तामाङ सचिव र केन्द्रीय सदस्य कृष्णगोपाल श्रेष्ठ, खिमलाल भट्टराई, महेश बस्नेत, विनोद श्रेष्ठ, सुजिता शाक्य, सुशीला नेपाल र पासाङ शेर्पा सदस्य रहेको मूल व्यवस्थापन समिति गठन गरिएको थियो ।
विधान महाधिवेशनमा पार्टीका केन्द्रीय कमिटीका पदाधिकारी एवं सदस्य, केन्द्रीय निकायका पदाधिकारी एवं सदस्य, केन्द्रीय विभागबाट चुनिएका प्रतिनिधि, प्रदेश कमिटीका सबै, जिल्ला कमिटीबाट चुनिएका सबै प्रतिनिधि, पार्टी सदस्य रहेका संघ र प्रदेशका सांसद, पार्टीका तर्फबाट निर्वाचित जिल्ला समन्वय समितिका प्रमुख र उपप्रमुख, पार्टी सदस्य रहेका स्थानीय पालिकाका प्रमुख र उपप्रमुख, जनसंगठन र पेशागत संगठनबाट चुनिएका प्रतिनिधि, भारतलगायत प्रवासका संघ संगठनबाट चुनिएका प्रतिनिधि र पार्टी केन्द्रबाट विधानबमोजिम मनोनीत सदस्य प्रतिनिधि रहनेछन् ।
हलमा नअटेकालाई टेन्टमा राखिने
व्यवस्थापन समितिले दिएको जानकारीअनुसार सम्मेलन केन्द्रको हलमा प्रतिनिधिहरूको सिट प्लानिङ गरिएको छ । पदाधिकारी एवं स्थायी कमिटी सदस्यहरू मञ्चमा हुनेछन् भने मूल हलमा ३ हजार प्रतिनिधि रहनेछन् । दायाँ–बायाँको हलमा एक÷एक हजार प्रतिनिधि बस्नेछन् भने दुवै हलको प्यासेजको माथिल्लो खाली भागमा टेन्ट टाँगेर एकएक हजार क्षमताका हल बनाइएको छ । सबै गरेर ७ हजार मानिसका लागि बस्ने व्यवस्था मिलाइएको व्यवस्थापन समितिका संयोजक थापाले बताए ।
सहभागीहरूलाई बिहानको खाना र दिउँसोको खाजा महाधिवेशन स्थलमा नै व्यवस्था गरिएको छ । हरेक दिन बिहान ९ देखि ११ बजेसम्म खाना खाने समय छुट्याइएको छ भने खाजा प्याकेटमा दिइनेछ । साँझको खाना भनेको बास बसेकै स्थानमा वा आफ्नै व्यवस्थापनमा खानुपर्नेछ । आवासका लागि प्रदेश तथा जिल्ला सम्पर्क मञ्चहरूको सहयोगमा प्रदेश कमिटीहरूले नै व्यवस्था गर्ने प्रबन्ध मिलाइको व्यवस्थापन समितिले जनाएको छ ।
