काठमाडौं– नेकपा (माओवादी केन्द्र) का तत्कालीन पोलिटब्यूरो सदस्य प्रकाश रोकायाले पार्टी परित्याग गरेका छन् । बिहीबार पत्रकार सम्मेलन गरेर उनले आफूले माओवादी केन्द्र परित्याग गरेको घोषणा गरेका हुन् । उनले माओवादी केन्द्रले अवलम्बन गरेका नीतिले पार्टीमा रहेर काम गर्न नसकिने निष्कर्ष सुनाउँदै पार्टी परित्याग गरेको जनाए ।
रोकायाले आफू फेरि नेकपा (एमाले) मा फर्कने तयारीमा रहेको पनि स्पष्ट पारे । एमालेमा जानको लागि अहिले नेताहरूसँग अन्तिम छलफल भइरहेको उल्लेख गर्दै रोकायले भने, ‘कम्युनिस्ट आन्दोलन बचाउनको लागि अब एमालेसँग अन्तिम छलफलको क्रममा छु । एमालेले जस्तो किसिमको जिम्मेवारी दिए पनि म त्यो जिम्मेवारी निर्वाह गर्न तयार छु ।’
देश जनता र कम्युनिस्ट आन्दोलनको रक्षा, विकास र हितार्थ सम्पूर्ण क्रान्तिकारी, अग्रगमनका पक्षधरहरूले गम्भीर भएर सोच्ने दिन आएको उनको भनाइ थियो । उनले कम्युनिस्ट आन्दोलन बचाउनको लागि एमालेका अध्यक्ष केपी ओलीसँग छलफल भइरहेको बताए । उनले भने, ‘अब म मात्र नभएर हजारौँ माओवादी कार्यकर्ताहरू नै एमालेमा प्रवेश गर्नेछन् ।’
एमालेमा भएका सबै नेताहरूमा पनि गल्ती÷कमजोरी भएको भन्दै सुधारेर जानुपर्नेमा जोड दिए । माओवादी केन्द्रले लाखौँ कार्यकर्ताको भविष्यमाथि खेलवाड गर्दै करोडौँ जनताको इच्छा र चाहनाविपरीत अगाडि बढिरहेको पनि उनको आरोप थियो । उनले पार्टी नेतृत्वले जे पनि गर्ने अवस्था आएपछि त्यसविरुद्ध उभिन परेको जिकिर गरे । सरकार गिराउने, पार्टी फुटाउने र सम्मानित सर्वोच्च अदालतबाट प्रधानमन्त्री चयन गर्न आदेश जारी गर्ने र गराउने जस्ता शक्ति पृथकीकरणको सिद्धान्तविपरीतका साथै अलोकतान्त्रिक क्रियाकलापविरुद्ध आफू उभिएको उनले स्पष्ट पारे । उनले नेकपा माओवादी केन्द्रका अध्यक्ष पुष्ककमल दाहाललाई वर्गीय सोच र चिन्तनबाट विचलित नेताको रूपमा चित्रण गरे । दाहालले तत्कालीन नेकपाको नेतृत्वको दुई तिहाई बहुमतप्राप्त कम्युनिस्ट सरकारलाई अपदस्त गर्न भूमिका खेलेको पनि उनको आरोप छ । उनले भने, ‘जनताले नरुचाएर प्रतिपक्षमा बसेको नेपाली कांग्रेसलाई सरकारको नेतृत्व गर्न दाहालले पटक–पटक कांग्रेस नेतृत्वसँग आग्रह गर्नुभएको थियो, यसमा मेरो गम्भीर असहमति थियो र छ ।’
उनले आफूले २३ वर्षसम्म नेकपा (एमाले) मा रहेर काम गरेको स्मरण गरे । तर, ०७० सालमा एमाले परित्याग गरेको र ०७१ मा तत्कालिन एकीकृत माओवादीमा प्रवेश गरेको स्मरण गर्दै रोकायाले दाहाल, कृष्णबहादुर महरा, शक्तिबहादुर बस्नेत, महेन्द्रबहादुर शाहीलगायतका नेताहरूसँग छलफल र संवाद गरेर दाहालकै उपस्थितिमा केन्द्रिय कमिटीको बैठक चलिरहेको अवस्थामा समाहित भएको प्रस्ट्याए । उनले ०४७ सालबाट अनेरास्ववियुमा आवद्ध भएर प्रारम्भिक कमिटी, इलाका कमिटी हुँदै ०६३ सालमा अनेरास्ववियुको केन्द्रीय सदस्यमा रहेर काम गरेको सुनाए ।
