दमौली– गण्डकी प्रदेशका मुख्यमन्त्री कृष्णचन्द्र नेपाली पोखरेलले धार्मिकस्थलको प्रवद्र्धनका लागि सरकार कतिबद्ध रहेको बताएका छन् । तनहुँको भानु नगरपालिका–१३, चन्द्रावतीस्थित प्राचीन एवं ऐतिहासिक नैनेश्वर महादेव मन्दिर परिसरमा बिहीबारदेखि सुरु भएको महायज्ञको उद्घाटन गर्दै उनले सरकारले धार्मिकस्थल र पर्यटन स्थलको विकासको लागि कटिबद्ध भएको बताएका हुन् । उनले धर्म र पर्यटन एकअर्काको परिपूरक भएको भन्दै धर्मलाई पर्यटनसँग जोडेर अगाडि बढ्नुपर्ने सुझाव दिए ।
धार्मिक महत्व बोकेका ठाउँलाई पर्यटकीय गन्तव्य बनाउने हिसाबले कार्ययोजना बनाउनुपर्ने चर्चा गर्दै मुख्यमन्त्री पोखरेलले नैनेश्वर महादेव मन्दिरको धार्मिक आस्था भएको बताए । उनले पुरातात्विक महत्व पनि भएको तर यसलाई पर्यटनसँग गाँसेर अगाडि बढाउन सके यस ठाउँको विकासका लागि प्रदेश सरकारले पनि सहयोग गर्ने प्रतिबद्धता व्यक्त गरे ।
मुख्यमन्त्री पोखरेलले भने, ‘नैनेश्वर महादेव मन्दिरको धार्मिक आस्था त छँदैछ, पुरातात्विक महत्व पनि छ, तर यसलाई पर्यटनसँग गाँसेर अगाडि बढाउनुपर्छ ।’ उनले यस ठाउँको विकासका लागि प्रदेश सरकारले पनि सहयोग गर्ने प्रतिबद्धता व्यक्त गरे ।
धार्मिक महत्व बोकेका ठाउँलाई पर्यटकीय गन्तव्य बनाउने हिसाबले कार्ययोजना बनाउनुपर्ने चर्चा गर्दै पछिल्लो समय गण्डकी प्रदेश बाढी–पहिरोबाट प्रभावित भएको बताए । उनले बाढी–पहिरोले अवरुद्ध भएका सडक दसैँअगाडि नै खुलाउन सम्बन्धित निकायलाई निर्देशन दिएको बताए ।
सरकार गठन हुँदा कोभिडका साथै बाढी–पहिरोको पनि चुनौति आएको भन्दै उनले विपद्बाट क्षति भएका संरचना पुनर्निर्माणका लागि प्रदेश सरकार गम्भीर रहेको बताए । आगामी बजेटमा छुटेका बहुवर्षीय योजनालाई समावेश गरिने बताउँदै मुख्यमन्त्री पोखरेलले त्यस्ता केही योजना भए प्रक्रियागतरूपमा आउन आग्रह गरे ।
करिब २०० वर्ष पुुरानो उक्त मन्दिर भग्नावशेष बन्दै गएकाले महायज्ञबाट संकलित रकमले मन्दिरको पुनर्निर्माण गर्ने लक्ष्य राखिएको छ ।
नैनेश्वर महादेव मन्दिरको आयोजनामा भौतिक पूर्वाधार निर्माणका लागि रकम संकलन गर्ने उद्देश्यसहित सुरु महायज्ञ २६ असोजसम्म सञ्चालन हुने र महायज्ञबाट करिब रु. एक करोडभन्दा बढी दान संकलनको अपेक्षा गरिएको महायज्ञ मूल समारोहका समितिका सचिव कुवेर खनालले जानकारी दिए ।
