काठमाडौं– प्रमुख सत्तारूढ दल नेपाली कांग्रेसका प्रभावशाली नेता तथा पूर्वमन्त्री रमेश लेखकले सरकार गठन भएको यत्तिका दिन बितिसक्दा पनि अझैसम्म सरकारलाई पूर्णता दिन नसकेको भनेर जनस्तरबाट आवाज उठ्नु स्वभाविक भएको भन्दै अब एक/दुई दिनभित्रै सरकारले पूर्णता पाउने स्पष्ट पारेका छन् । सोमबार आयोजना गरेको साक्षात्कारमा बोल्दै नेता लेखकले अहिले आफ्नो पार्टीको मात्रै एकमना सरकार नभएको र सरकारमा गठबन्धनको सहभागिता रहेकाले केही राजनीतिक र वैधानिक समस्या समाधान गर्नुपर्ने भएकाले सरकार विस्तारमा ढिलाइ भएको स्पष्ट पारे । तर, अब एक÷दुई दिनभित्रै सरकारले पूर्णता पाइसक्ने उनको दाबी छ ।
उनले भने, ‘आज सरकार बनेको दुई महिनाभन्दा बढी भइसकेको छ, तर अहिलेसम्म मन्त्रिपरिषद् विस्तार भएन ? भनेर जनस्तरबाट आलोचना भइरहेको छ, बास्तवमा सरकारलाई पूर्णता नदिएको भनेर यो आलोचनाको विषय बनेको छ । ढिलो पक्कै पनि भएको हो ।’ उनले सरकार गठन भएको सय दिनसम्म सरकारका बारेमा खासै टिप्पणी नगर्ने प्रचलन रहेको सुनाए । ‘प्रम निर्वाचित भएको सय दिनसम्म टिप्पणी गरिनहाल्ने चलन छ,’ उनले भने। ‘टिप्पणी गर्नु त्यति वाञ्छनीय हुँदैन । यो सरकार गठन भइसकेपछि सरकार कसरी अघि बढिरहेको छ ? भन्नुभन्दा पनि पहिले, यो सरकार मुलुकको विशेष राजनीतिक परिस्थितिमा गठन भएको हो । कांग्रेसले सरकारको नेतृत्व मुलुकको विशेष परिस्थितिमा लिएको छ ।’
उनले गत निर्वाचनमा जनताले नेकपालाई दुई तिहाइ बहुमत दिएर सरकारमा पठाएको र नेपाली कांग्रेसलाई प्रतिपक्षमा बस्ने जिम्मेवारी दिएको स्मरण गराए । तर, पछिल्लो तीन वर्षमा नेकपाले ठीक ढंगले सरकार नचलाएको उनको भनाइ छ । नेता लेखकले वर्तमान सरकारले सबैभन्दा प्राथमिकता दिएर कोभिड–१९ बाट नेपाली जनतालाई खासगरी कोभिडको जोखिमबाट बचाउने प्रण लिएको र सोहीअनुसार काम गरिरहेको सुनाए । उनले भने, ‘कोभिडको जोखिमबाट जनतालाई बचाउने भनेर सरकारले पनि घोषणा गरेको छ ।
यो विषय गठबन्धनको तर्फबाट सार्वजनिक गरिएको न्यूनतम साझा कार्यक्रममा पनि अभिव्यक्त भएको छ । कोभिडको प्रभावले मुलुकमा परेको नकारात्मक प्रभाव, यी सबै नकारात्मक प्रभावालाई न्यूनीकरण गर्ने, मुलुकको अर्थतन्त्रलाई चलायमान गर्ने भनेर प्राथमिक कामको पहिचान गरेको छ ।’ त्यस्तै, उनले तोकिएकै मितिमा पार्टीको १४औँ महाधिवेशनपनि सम्पन्न हुने विश्वास दिलाए । उनले भने, ‘हामी १४औँ महाधिवेशनको पूर्वसन्ध्याामा छौँ । महाधिवेशन प्रक्रिया सुरु भइसकेको छ ।
क्रियाशिल सदस्यताको विवाद छैन । ६९ जिल्लाको क्रियाशिल सदस्यताको काम कुरा सम्पन्न भइसकेको छ । अन्तिम नामावलीसमेत प्रकाशित भइसकेको छ । ८ वटा जिल्लाको क्रियाशिल सदस्यताको गर्नुपर्ने निर्णय भइसकेका छन् । क्रियाशिल सदस्यताको अन्तिम नामावली प्रकाशन हुन्छ र निर्वाचन समितिले पनि यसलाई प्रकाशित गर्छ ।’ दसैँअघि नै ७७ वटै जिल्ला अधिवेशन सम्पन्न हुने उनको भनाइ छ । उनले थपे, ‘कुनै–कुनै जिल्लामा विषम् परिस्थितिबाहेक २१ वटा हिमाली जिल्लामा पनि दसैँभित्रै अधिवेशन गर्ने लक्ष्य छ । दसैँभित्र ७७ वटै जिल्लाको वडा र पालिकाको अधिवेशन भइसक्छन् । अहिले पनि अधिकांशको वडा र पालिका अधिवेशन सम्पन्न भइसकेको छ । महाधिवेशन तयारी अघि बढिसकेको छ । हामी समयमै महाधिवेशन गर्ने अठोटका साथ लागेका छौँ ।’
