काठमाडौं– मूल प्रवाह अखिल भारत नेपाली एकता समाजले ‘भारत प्रवासमा रहेका नेपाली नागरिकहरूलाई’ नेपालमा हुने महत्वपूर्ण निर्वाचनहरूमा मताधिकार दिने सन्दर्भमा वञ्चित नगरियोस् भन्दै सरकारलाई ज्ञापनपत्र बुझाएको छ । समाजले भारतस्थित रहेको प्रवासीहरूको भारतबाटै मताधिकारको व्यवस्था गर्नुपर्ने भन्दै प्रधानमन्त्री शेरबहादुर देउवालाई भेटेर १२ बुँदे ज्ञापनपत्र बुझाएको हो ।
शनिबार पत्रकार सम्मेलनको आयोजना गरेर समाजले नेपालको परिवर्तनको हरेक आन्दोलनमा आफूहरूको पनि महत्वपूर्ण योगदान रहेको तर सरकारले भने आफूहरूलाई सधैँ उपेक्षा गरेको भन्दै अब हुने हरेक निर्वाचनमा आफूहरूलाई पनि मताधिकार दिने व्यवस्था गरिनुपर्ने बताएको हो ।
सर्वोच्च अदालतले परमादेशको सम्मानसहित हालै सरकालले नीति र कार्यक्रममा प्रवासी नेपालीहरूलाई मताधिकारको व्यवस्था गर्ने विषयलाई समेटेकोमा केही आसा पलाए तापनि भारतमा रहेका प्रवासी नेपालीहरूको बारेमा सरकारले प्रष्ट नीति नलिएकाले आफूहरूले ज्ञापनपत्रमार्फत भारतमा रहेको प्रवासीको हक, अधिकार सुनिश्चित गर्न प्रधानमन्त्री देउवालाई ज्ञापनपत्र बुझाउनुपरेको पनि समाजको भनाइ छ । मूल प्रवाह अखिल भारत नेपाल एकता समाजका अध्यक्ष दुर्गाबहादूर केसीले संघीय संसदअन्तर्गत प्रतिनिधिसभाको समानुपातिक निर्वाचनमा प्रवासीहरूले पनि मतदान गर्न पाउनुपर्ने बताएका छन् । प्रवासीहरूलाई सरकारले ध्यान नदिएको भन्दै उनले गुनासो पोखे ।
त्यसैगरी, कार्यक्रममा राष्ट्रिय जनमोर्चाका केन्द्रीय प्रतिनिधि आनन्द शर्माले मूल प्रवाह अखिल भारत नेपाल एकता समाजले भारतमा रहेका नेपाली प्रवासीहरूले नेपालको सम्पूर्ण आन्दोलनमा साथ दिएको बताएका छन् । समाजले अघि सारेका मागप्रति आफ्नो पार्टीको समर्थन रहेकोसमेत उनले विश्वास दिलाए । भारतमा रहेका नेपाली प्रवासीहरूले पठाएको रेमिटेन्सबाट मुलुक सञ्चालन भइरहेको उनले बताएका छन् । उनीहरूको हकअधिकार सुनिश्चित गरी भारतबाटै समानुपातिकमा मतदान हाल्न पाउनुपर्नेमा उनको जोड थियो । जनमोर्चाका केन्द्रीय सदस्य लालबहादुर थापाले विदेशमा रहेका नेपालीहरूले पठाएको रेमिट्यान्सले देश धानिएको भन्दै उनीहरूको अधिकारलाई पनि सुनिश्चित् गर्नुपर्नेमा जोड दिए । उनले भने, ‘भारतलगायत विभिन्न देशमा रहेका नेपालीहरूको मताधिकार सुनिश्चित् गराउनुपर्छ । आमनिर्वाचनमा सम्बन्धित देशका दूतावासमार्फत उहाँहरूले मत हाल्न पाउनुपर्छ ।’
कार्यक्रममा समाजका महासचिव ठाकुर खनालले मूल प्रवाह अखिल भारत नेपाली एकता समाज ७ नोभेम्बर १९७९ मा गठन भएको बताए । यसले निरंकुश तानाशाहीको विरुद्धमा काल रात्रीमा पनि भारतस्थित रहेको प्रवासीलाई संगठित गर्ने, सचेत गर्ने र नेपालको राजनिीतिलाई एकाकार गर्न मुख्य भूमिका खेलेको संगठन रहेको उनले बताए । ११ बजे ज्ञापन पत्र प्रधानमन्त्री समक्ष बुझाएकोसमेत उनले सुनाएका छन् । भारतस्थित रहेको नेपाली प्रवासीहरूले कष्टकर जीवन बिताउन बाध्य रहेको उनले गुनासो पोखे ।
राज्यले उनीहरूको हक–अधिकारलाई हेलचक्र्याइँ नगर्नसमेत आग्रह गरेका छन् । ०४६ वा ०६३÷६३ मा भएको आन्दोलनलाई भारतमा रहेको नेपाली जनताले महत्वपूर्ण भूमिका निभाएकोसमेत उनले स्मरण गराए । प्रवासीलाई समानुपातिकतर्फका मत भारतबाटै हाल्ने व्यवस्था गर्नुपर्नेमा उनीहरूको जोड थियो । मत हाल्नबाट वञ्चित नगरियोस् भने उनको धारणा थियो । उनले प्रधानमन्त्री देउवालाई बुझाएको १२ बुँदे ज्ञापन पत्र पढेर सुनाए ।
