वीरगन्ज– राष्ट्रिय एकता अभियानले शनिबार वीरगन्जमा प्रदेश नं. २ का मुख्यमन्त्री लालबाबु राउत गद्दीको विरुद्ध विरोध प्रदर्शन गर्दै पुतला दहन गरेको छ । मदरशा शिक्षा विधेयक ल्याएर प्रदेश २ लाई तालिबान बनाउन खोजेको आरोप लगाउँदै अभियानले मुख्यमन्त्री राउतको गृह जिल्ला वीरगन्जमा उनको तस्बिर अंकित पोस्टर जलाएर विरोध गरिएको हो ।
विरोध जुलुसमा सहभागीहरूले मदरशा विधेयक खारेज गर, प्रदेश २ लाई तालिबान बनाउन पाइँदैन, नेपाललाई हिन्दू राष्ट्र कायम गरलगायत नारा लगाएका थिए । वीरगन्जको माईस्थान मन्दिर अगाडिबाट निकालिएको विरोध जुलुस वीरगन्ज नगरपरिक्रममा गरी घण्टाघर चोकमा पुगी कोण सभामा परिणत भएको थियो । कोणसभालाई सम्बोधन गर्दै राष्ट्रिय एकता अभियानका अध्यक्ष विनय यादवले पाकिस्तानको इसारामा नेपालमा मदरशा शिक्षा विधेयक ल्याएर प्रदेश २ लाई तालिबान बनाउन खोजेको आरोप लगाए । पाकिस्तानका प्रधानमन्त्री इमरान खानको दूत भएर आई.एस.आई.को एजेन्टको रूपमा मुख्यमन्त्री गद्दी काम गर्दै आएको र पाकिस्तानकै इसारामा प्रदेश २ मा मदरशा शिक्षा विधेयक ल्याएर तालिबान बनाउन खोजेको आरोप लगाए ।
उनले भने, ‘नेपालमा सामुदायिक विद्यालय छन्, विद्यालयहरूमा कुनै जातपात सोधेर शिक्षा प्रदान गरिँदैन, शिक्षामा कुनै प्रकारको विभेद् छैन तर पनि मदरशा शिक्षा विधेयक ल्याउनुको अर्थ के हो ?।’ नेपाललाई इस्लामीकरणतर्फ धकेल्न योजना अनुरूप शिक्षा विधेयक ल्याइएको उनको आरोप छ । मुख्यमन्त्री गद्दीले शिक्षा विधेयक खारेज नगरे प्रदेश २ मा मुख्यमन्त्रीविरुद्ध आन्दोलनको आँधीबेरी ल्याउने र मुख्यमन्त्रीलाई उखाडेर फाल्ने चेतावनीसमेत उनले दिए ।
अध्यक्ष यादवले मुख्यमन्त्री गद्दीले इस्लामीकरण गर्नकै लागि प्रदेश २ मा मदरशा, मस्जिद थप विस्तार गर्न १८ करोडभन्दा बढी रकम खर्च गरिसकेका छन् तर यहाँ रहेका हिन्दूहरूको मठ मन्दिरमा ३ करोड मात्र खर्च गरी विभेद् ल्याएको आरोपसमेत लगाए । अभियानका जिल्ला अध्यक्ष श्यामकिशोर तिवारीको अध्यक्षतामा भएको विरोध कार्यक्रममा राष्ट्रिय विद्यार्थी परिषद्का अध्यक्ष विवेक कुशवाहा, हिन्दू अगुवा पुरुषोत्तम दुवे, डा. अनिल झा, ब्राह्णसमाजका पूर्वअध्यक्ष देवनाथ उपाध्यायलगायत हिन्दूवादी नेताहरूको सहभागिता रहेको थियो ।
