काठमाडौं– प्रमुख प्रतिपक्षी दल नेकपा एमालेका अध्यक्ष केपी ओलीले सरकारले कहिले पूर्णता पाउँछ ? भन्दै प्रश्न गरेका छन् । बिहीबार उपत्यका विशेष प्रदेश कमिटीद्वारा आयोजित बृहत भेलालाई सम्बोधन गर्ने क्रममा अध्यक्ष ओलीले एमालेले सरकारको नेतृत्व गर्ने अवस्थामा सरकार विस्तारमा यतिका दिन नलगाउने प्रष्ट पार्दै सरकार कहिले पूर्णता पाउने भनेर प्रश्न गरे । सत्तारुढ गठबन्धनले अढाइ महिनासम्म पनि सरकारलाई पूर्णता दिन नसकेको भन्दै एमालेले हो भने तीन दिनभित्र सरकारलाई पूर्णता दिन सक्ने हैसियत राख्ने बताएका छन् । उनले भने, ‘उस्तै परे उसै दिन पनि पूर्णता दिन सक्छौँ, एमालेमा पदका लागि मरिमेटाइ हुँदैन ।’
अध्यक्ष ओलीले सत्तारुढ गठबन्धनले अढाइ महिनासम्म पनि सरकारलाई पूर्णता दिन नसकेको भन्दै एमालेसँग प्रतिस्पर्धा गर्न सक्ने हुनका लागि पहिला गठबन्धनभित्रै एकता गर्न चुनौती दिएका छन् । पाँच दलीय गठबन्धनमा सहमति जुट्न नसकेकै कारण अहिलेसम्म मन्त्रिपरिषद्ले पूर्णता पाउन नसकेको उनको भनाइ थियो । अध्यक्ष ओलीले सरकारलाई राष्ट्रसंघमा सहभागी हुनुपर्छ भनेर पनि एक दिन अघि मात्र थाहा भएर हतारमा परराष्ट्रमन्त्री नियुक्त गरेको बताएका छन् । यतिका दिनसम्म पनि राष्ट्रसंघको बैठकमा जानुपर्छ भन्ने सरकारले थाहा नपाएको भन्दै उनले भने, ‘हिजो बल्ल थाहा पाएर हतार हतार मन्त्री नियुक्त गरेर पठाएको छ, त्यो पनि कपडाको झोला बोकेर मन्त्री त्यसतर्फ गएका छन् ।’
उनले माधवकुमार नेपाल नेतृत्वको पार्टीमा कतिपय नेताहरू मन्त्री पद पाउनका लागि सामेल भएको बताएका छन् । तर एमालेमा कतिपले मन्त्री पद छाडेर, सांसद पद छाडेर पनि देश र जनताको पक्षमा उभिन्छु भनेर सामेल भएको ओलीले भने । उनले वर्तमान सरकारले सत्ताको दुरूपयोग गरिरहेको बताएका छन् । अध्यक्ष ओलीले सरकारले आफ्नो स्वार्थको लागि सयंन्त्रहरूकै दुरूपयोग गरेको जनाए ।
ओलीको आलोचना
नेकपा (माओवादी केन्द्र) का अध्यक्ष पुष्पकमल दाहाल नेकपा एमाले अध्यक्ष केपी ओलीको आलोचना गरेका छन् । योङ कम्युनिस्ट लिग नेपालको दोस्रो पाँचखाल नगर सम्मेलनलाई बिहीबार सम्बोधन गर्दै दाहालले केपीलाई महान् नेता बन्ने अवसर भए पनि उनकै बुद्धि नपुगेर आफैँ थेचारिएको बताए । नेकपा एमाले र माओवादी केन्द्रबीच एकता भएपछि ओलीलाई नेपालको महान् नेता बन्ने अवसर भए पनि उनको बुद्धि नपुगेको दाहाले तर्क गरेका छन् । उनले भने, ‘मैले केपीजस्तो बुद्धि नभएको नेता अर्को देखेको छैन । दुई पार्टी एक भएपछि उनलाई नेपालको महान् नेता बन्ने अवसर थियो ।’
केपी व्यक्ति नभएर दम्भी, अहंकारी, सामन्ती हिन्दूवादी प्रवृत्ति भएको दाहालले आरोप लगाएका छन् । ओलीले माओवादी र माओवादी नेतृत्वलाई सखाप पार्न प्रतिनिधि सभा विघटन भएको दाहालले बताए । ओलीको उक्त षड्यन्त्रमा विदेशीहरूले साथ दिएको उनले बताए । दाहालले भने, ‘तर हामीले त्यसलाई हरायौँ । नेकपा हुँदा केपीको प्रवृत्ति उजागर गरेर उनलाई पार्टी साधारण सदस्यबाट निकाल्यौँ, पछि पनि उनलाई बालुवाटारबाट बालकोट पु¥यायौँ । हामी विजेता हौँ । केपी हरूवा हो, भगौडा हो ।’
माओवादी युद्धका बेला प्रतिक्रियावादीहरूले आफूहरूलाई घेरा हाल्ने र सखाप पार्ने रणनीति बनाएजस्तै पछिल्लो समय ओलीले त्यस्तै कोसिस गरेको दाहालले बताएका छन् । अहिले पनि खतरा टरिसकेको छैन भन्दै अहिले पनि गठबन्धनलाई टुटाउन षड्यन्त्र भइरहेको उनले बताएका छन् । जस्तोसुकै त्याग गर्नु परे पनि अर्को चुनावसम्म अहिलको गठबन्धनलाई टुट्न नदिने प्रतिवद्धता जनाएको पनि उनले खुलासा गरेका छन् ।
