काठमाडौं– प्रधानमन्त्री तथा रक्षामन्त्री शेरबहादुर देउवाले नेपाली सेनाको रणनीतिक तहमा सञ्चालन हुने अन्तक्र्रिया र छलफलले अन्तर्राष्ट्रिय, राष्ट्रिय सुरक्षासम्बन्धी साझा बुझाइ निर्माण गर्ने बताएका छन् ।
दुई दिने ‘प्रथम कमान्ड सेनापति समन्वयात्मक बैठक २०७८’ को उद्घाटन गर्दै प्रधानमन्त्री देउवाले राष्ट्रिय सुरक्षाको महत्वपूर्ण अंगको रूपमा रहेको नेपाली सेनाको यस किसिमका अन्तक्र्रिया र छलफलहरूले अन्तर्राष्ट्रिय, क्षेत्रीय र राष्ट्रिय सुरक्षा वातावरणको विश्लेषण गर्दै सम्बन्धित विषयहरूमा साझा बुझाइ निर्माण गरी ती चुनौतीहरूको सामना गर्न समय–सान्दर्भिक प्रतिकारात्मक उपायहरूको विकास गर्न महत्वपूर्ण भुमिका खेल्ने विश्वास व्यक्त गरे । साथै उनले नेपाली सेनाद्वारा भइरहेका विकास निर्माणका कार्यलगायत सेनाले सञ्चालन गर्न योजना गरेका दीर्घकालीन महत्वका कार्यहरूमा स्रोतको सुनिश्चितता गर्न नेपाल सरकारको हरसम्भव प्रयास रहनेसमेत जानकारी गराए ।
उक्त कार्यक्रममा प्रधान सेनापति, रक्षा सचिव, जंगी अड्डाका पि.एस.ओज. रथी, सबै कमान्डका कमान्ड सेनापतिहरूलगायत विभिन्न महानिर्देशनालय, निर्देशनालय, कार्यालय र विभागका प्रमुखहरू तथा उपत्यकाभित्र रहेका बाहिनी अड्डाका बाहिनीपतिहरूको उपस्थिति रहेको थियो । सो क्रममा प्रधानसेनापति महारथी प्रभुराम शर्माले नेपाली सेना जस्तोसुकै परिस्थितिमा पनि संविधानप्रदत्त जिम्मेवारी निर्वाह गर्न र नेपाल सरकारका विधिसम्मत आदेशहरू अक्षरसः पालना गर्न कटिबद्ध रहेको बताए । उनले प्राप्त जिम्मेवारी पूर्णरूपमा सम्पन्न नभएसम्म कर्तव्यपथमा अडिग रहने विश्वास व्यक्त गरे । उनले देशमा विकसित राष्ट्रिय सुरक्षा र स्थायित्वसँग सरोकार राख्ने सबै प्रकारका गतिविधिहरूका सम्बन्धमा नेपाली सेनाले निरन्तर अध्ययन, अनुगमन र विश्लेषण गर्दै रहेको र त्यसबाट सिर्जना हुन सक्ने सुरक्षा चुनौतिहरूलाई सामना गर्न नेपाली सेना सदैव तयारी अवस्थामा रहेको समेत जानकारी गराए ।
सो अवसरमा रक्षा सचिव बेगेन्द्रराज शर्मा पौड्यालले राष्ट्रिय सुरक्षाको संरक्षण र सम्बद्र्धनका लागि नेपाली सेनाले अघि सारेका सबै योजनाहरू, मूलतः नेपाली सेनाको दीर्घकालिन सोच–२०८७ तथा पुनर्संरचनाका कार्यहरूको सफल कार्यान्वयनमा नेपाली सेनालाई आवश्यक पर्ने बताए । उनले सेनालाई सुझाव वा सहयोग एवं सहजीकरणका लागि मन्त्रालय सदैव प्रतिबद्ध रहेकोसमेत जनाए ।
सोही कार्यक्रमका दौरान प्रधानमन्त्री तथा रक्षामन्त्रीको समुपस्थितीमा नेपाली सेना र रक्षा मन्त्रालयको तर्फबाट प्रधान सेनापति र रक्षा सचिवबीच कार्य सम्पादन सम्झौतासमेत भएको थियो ।
यस समन्वयात्मक बैठकको दौरान नेपाली सेनाका महानिर्देशनालय, निर्देशनालय, कार्यालय र विभागका प्रमुखहरू तथा कमान्ड सेनापतिहरूले आ–आफ्नो जिम्मेवारी क्षेत्रको वर्तमान वस्तुस्थिति, कार्य मीक्षा एवं सुझावहरू सहितको प्रस्तुतीकरण गर्ने कार्यक्रम रहेको छ । यस किसिमको समन्वयात्मक बैठक र आपसी अन्तक्र्रियापश्चात् प्राप्त हुने राय सुझावहरूले आगामी दिनहरूमा नेपाली सेनाको महत्वपूर्ण नीति तथा योजना निर्माणमा ठोस योगदान पु¥याउने विश्वास नेपाली सेनाले लिएको छ ।
