गण्डकी– गण्डकी प्रदेशका मुख्यमन्त्री कृष्णचन्द्र नेपाली पोखरेलले संघीयता मजबुत पार्न प्रदेशप्रदेशबीचको सहकार्य आवश्यक भएको बताएका छन् । बुधबार प्रदेश नं २ का मुख्यमन्त्री लालबाबु राउत र गण्डकी प्रदेशका मुख्यमन्त्री कृष्णचन्द्र नेपाली पोखरेलले औपचारिक भेटवार्तामा मुख्यमन्त्री पोखरेलले त्यस्तो धारणा राखेका हुन् ।
भेटवार्तामा मुख्यमन्त्री पोखरेलले संविधानतः मुलुक संघीय लोकतान्त्रिक गणतन्त्रमा गएपछि स्थापित प्रदेश सरकारले जनताको चाहनाबमोजिमको सेवा तथा विकास प्रवाह गर्ने सवालमा धेरै चुनौतीको सामना गर्नुपरेको विचार राखे । उनले अधिकार प्रत्यायोजनमा संघीय सरकारको मानसिकता अझै पनि केन्द्रीकृत रहेकाले प्रदेश प्रदेशबीचको सहकार्य अझ प्रगाढ बनाउन आवश्यक भएको बताए । राजस्वको बाँडफाँटमा केन्द्रले प्रदेशलाई उपलब्ध गराउने गरेको सानो अंशले हाम्रा विकासका आवश्कता पूरा नहुने उल्लेख गर्दै उनले यसको वृद्धिका लागि पहल गर्नुपर्ने बताए । नेपाल सरकारले कर्मचारी समायोजनमा पर्याप्त भूमिका नखेलेको बताउँदै उनले शान्तिसुरक्षा लगायतका मुख्य काममा प्रदेशलाई अधिकार नदिँदा प्रदेश सरकारले चाहेर पनि काम गर्नसक्ने अवस्थामा नरहेको बताए ।
सो भेटवार्ताको क्रममा प्रदेश नं २ का मुख्यमन्त्री लालबाबु राउतले संघीयतालाई मजबुत बनाउन आफूहरूले निकै संघर्ष गरिरहेको बताए । उनले केन्द्र र छ वटा प्रदेशमा कम्युनिष्ट पार्टीकै सरकार रहेका कारण अधिकार हस्तान्तरण गर्न असहज नभएका अवस्थामा पनि प्रदेशका कुरा नसुनिएको बताए । अधिकारकै लडाईंका क्रममा आफूहरू संघ सरकारसँग मुद्दा लडिरहेको उल्लेख गर्दै अधिकार नपाएसम्म संघर्ष जारी रहने बताए ।
मुख्यमन्त्री राउतले भौतिक विकास मात्र नभएर सामाजिक रूपान्तरण हुनुपर्छ भनेर प्रदेश सरकारले महिला जागरण, बालिका सशक्तीकरण, सरसफाइजस्ता अभियान थालेको बताए । विकासका सवालमा प्रदेश नं २ र गण्डकीमा फरक रहेको भन्दै अनुभव आदानप्रदान गर्दै सहकार्य गर्नुपर्नेमा जोड दिए । सांस्कृतिक सहर जनकपुर र पर्यटकीय सहर पोखराबीच हवाई सम्बन्ध कायम गरी भारतीय पर्यटकलाई आकर्षित गर्न सकिने उनको विचार छ ।
