चितवन– वाग्मती प्रदेशका मुख्यमन्त्री अष्टलक्ष्मी शाक्यले स्वास्थ्य क्षेत्रमा सुधारको आवश्यक देखिएपछि सरकारले स्वास्थ्य मन्त्रालयलाई अलग बनाएको बताएकी छन् । पूर्वी चितवनस्थित बकुल्लहर रत्ननगर अस्पतालमा मंगलबार आयोजित पिसिआर ल्याब र अक्सिजन प्लान्टको उद्घाटन गर्दै उनले यस्तो बताएकी हुन् ।
उनले प्रदेशका १३ जिल्लामा रहेका अस्पतालमा पिसिआर मेसिन र अक्सिजन प्लान्ट सञ्चालन भइरहेको जनाउँदै रत्ननगर अस्पतालमा पनि सो सेवा दिईएको उनले बताइन् । पिसिआर मेसिन र अक्सिजन प्लान्ट दुवै उपकरण प्रदेश सरकारले अस्पताललाई उपलब्ध गराएको थियो । मुख्यमन्त्री शाक्यले प्रदेश सरकारका मातहतमा रहेका अस्पतालाई प्रभावकारी सेवा दिन आग्रह गर्दै संघीय सरकारले प्रादेशिक अस्पताल हस्तान्तरण गर्न ढिला गरेकाले व्यवस्थापकीय पाटोमा समस्या आएको बताइन् । उनले अस्पताललई थप स्रोत साधन सहयोग गरिने जानकारीसमेत दिइन् ।
अस्पताल सञ्चालक समितिका अध्यक्ष गोपाल कर्माचार्यका अध्यक्षतामा सम्पन्न कार्यक्रममा वाग्मती प्रदेशका स्वास्थ्यमन्त्री प्रदीपकुमार कटुवाल, सामाजिक विकासमन्त्री विजय सुवेदी, पूर्वशिक्षा राज्यमन्त्री शेषनाथ अधिकारी, पूर्वकृषि, सहकारी तथा भूमि व्यवस्थामन्त्री दावा दोर्जे लामा, रत्ननगर नगरपालिकाका प्रमुख नारायण वनलगायतको उपस्थिति रहेको थियो ।
सो अवसरमा अस्पतालका मेडिकल सुपरिटेन्डेन्ट डा विश्वबन्धु बगालेले अस्पतालका विषयमा जानकारी गराएका थिए । विसं २०२४ मा हेल्थपोस्टबाट सुरुआत भएको सो अस्पताल अहिले प्रादेशिक ५० शैय्याको स्वीकृत भए पनि ४३ शैय्या मात्रै सञ्चालन गर्नु परेको उनले बताए । अस्पतालमा चिकित्सक, स्वास्थ्यकर्मीसहित १२० कार्यरत रहेको भए पनि दरबन्दी भने २५ जनाको मात्रै रहेको उनले बताए । अहिले सो अस्पतालले मनोरोग बाहेक अन्य रोगको विशेषज्ञ सेवा दिंदै आएको छ ।
