काठमाडौं– नेकपा एमालेका अध्यक्ष केपी ओली पार्टी विभाजन गरेर नेकपा एकीकृत समाजवादी गठन गरेका तत्कालीन वरिष्ठ नेता माधवकुमार नेपालप्रति खनिने क्रम रोकिएको छैन । अन्य समयमा विभाजनको पक्षमा लागेका नेता कार्यकर्तालाई पार्टीमा फर्कन आह्वान गर्दै आएका ओलीले बिहीबार नेपाललाई भने एमालेमा नफर्किन चेतावनी दिए । उपाध्यक्ष एवं वाग्मती प्रदेशकी मुख्यमन्त्री अष्टलक्ष्मी शाक्यले नेता नेपालको बाटो गलत भएको भन्दै पार्टी फर्किन आह्वान गरेपछि अध्यक्ष ओलीले भने, ‘माधव नेपाललाई एमालेमा किन फर्काउने ? फेरि पार्टी फुटाउने ?
बिहीबार काठमाडौं जिल्ला कमिटीले आयोजना गरेको कार्यकर्ता भेला तथा प्रशिक्षण कार्यक्रममा अध्यक्ष ओलीले नेता नेपालले घरमा आगो लगाएर खरानी घसेर तीर्थयात्रामा निस्किएको टिप्पणी गरेका छन् । उनले भने, ‘माधव नेपालले घरमा आगो लगाए, निधारमा खरानी घसे अनि तीर्थयात्रामा निस्किएका छन् ।’ उनले देश, जनता र लाखौँ कार्यकर्ताको भविष्यमाथि माधव नेपालले खेलवाड गरेको आरोप लगाए । ‘माधव नेपालले १५ वर्ष पार्टी चलाए, प्रधानमन्त्री बने, अब त जानुपर्ने त कहीँ छैन’, उनले भने, ‘तर, आफ्नो इगोका कारण देश, जनता र कार्यकर्ताको भविष्यमाथि खेलवाड गर्न मिल्छ ?’
माधव नेपालले झुक्याएको र झुक्किएका कार्यकर्तालाई भने अध्यक्ष ओलीले एमालेमा फर्कन आह्वान गरेका छन् । पुष्पकमल दाहालसँग गएका कार्यकर्तालाई पनि उनले एमालेमा फर्कन आग्रह गरेका छन् । उनले माधव नेपालसँग दुई–चार जना पुराना मान्छे गए पनि पार्टीमा धेरै नयाँ मान्छे सामेल भएको बताए । ‘माधव नेपालसँग दुई–चार जना पुराना मान्छे गए होलान् । तर, नयाँ मान्छे कति हो कति एमालेमा सामेल भएका छन्,’ उनले भने । अध्यक्ष ओलीले माधव नेपालको पार्टीलाई झिंगाको संज्ञा पनि दिए । ‘माहुरीको पछि लागेर गएपछि फूलबारीमा पुगिन्छ । एमाले भनेको माहुरी हो,’ उनले भने, ‘झिँगाका पछि लागेपछि फोहोरको डंगुरमा पुगिन्छ । रोग फैलाउनेका पछाडि लाग्नु हुँदैन । भ्रममा नपरेर पार्टीमा फर्किनुस् ।’
माओवादीका साथीहरू एमाले छाड्न नमानेको तर दाहाल गुट लिएर गएको आरोप लगाउँदै उनले भने, ‘नेकपा माओवादी केन्द्रका एकीकृत साथीहरूको ठूलै हिस्सा थियो । प्रचण्डसँगै जान मानेनन्, प्रचण्ड गुटसँग जान मानेनन् । पार्टीमै रह्यो, एकीकृत पार्टीमा यहीँ हुनुहुन्छ,’ उनले भने, ‘तपाईंहरू पार्टीको कार्यकर्ता हो कि, प्रचण्डको घरेलु कार्यकर्ता हो, माओवादी केन्द्रको नाममा रहेका साथीलाई एमालेमा फर्कन म आह्वान गर्छु ।’
कम्युनिस्टको सरकार ढालेर कांग्रेसको नेतृत्वको सरकार बनाएकोप्रति आक्रोश पोख्दै ओलीले भने, ‘मैले केही मन्त्री दिएको थिएँ नि, अहिले हेर्नु त देउवाले प्रचण्ड र माधव नेपाललाई खोइ मन्त्री दिएको ? प्रचण्डको पछि लागेर के हुन्छ । आउनुस् एकीकृत एमालेमा ।’ उनले जनतालाई उत्तेजित बनाउने काम नगर्न सरकारलाई चेतावनीसमेत दिएका छन् ।
