काठमाडौं– प्रमुख प्रतिपक्षी दल नेकपा (एमाले) का स्थायी कमिटी सदस्य तथा पूर्वउपप्रधानमन्त्री टोपबहादुर रायमाझीले वर्तमान सत्ता गठबन्धनलाई लोभी पापीहरूको गठबन्धनको संज्ञा दिएका छन् । उनले सरकारले दुई महिनासम्म महत्वपूर्ण समय खेर फालेको टिप्पणी गरे । बिहीबार आयोजना गरेको साक्षात्कारमा बोल्दै उनले सत्ता गठबन्धन चुनावमा जानका लागि डराएको पनि बताए । उनले अब कुन पार्टी सही र कुन पार्टी गलत ? भनेर जनताले मूल्यांकन गर्ने बेला आइसकेको भन्दै संविधान र लोकतन्त्र रक्षाका लागि पनि चुनावमा जानुपर्ने बताए । उनले संसद औचित्यविहीन भएकाले तत्काल निर्वाचनमा जानुपर्ने आफूहरूको माग भएको पनि स्पष्ट पारे ।
उनले आफ्नो पार्टीले उठाएका माज पूरा नभएसम्म संसद अवरुद्ध कायमै रहने पनि स्पष्ट पारे । उनले प्रतिनिधिसभाका सभामुख अग्निप्रसाद सापकोटाले संसदीय मर्यादा कायम गर्न नसकेको पनि टिप्पणी गरे । उनले एमसिसीबारे सरकारले आफ्नो पोजिसन क्लियर गरेपछि मात्रै आफूहरूको धारणा आउने बताए । उनले भने, ‘एमसिसीबारे हामीले बोल्नुपर्छ जस्तो लाग्दैन ।’ उनले एमाले र माओवादी केन्द्रबीच हतारमा एकता गरिएको भन्दै गुनासो पोखे । तर, सत्ता स्वार्थमा लागेकाहरू मात्रै नेकपाबाट बाहिरिएको भन्दै अहिले पनि आफूहरू नेकपाकै निरन्तरताको अवस्थामा रहेको सुनाए ।
नेकपा हुँदा सहमतिमै पार्टीको अध्यक्ष, संसदीय दलको नेता र प्रधानमन्त्री केपी ओलीलाई बनाइएको र तीन वर्षसम्म सबै ठीकठाक चलेको पनि स्मरण गराए । संविधानको पालना नहुने अवस्था आएपछि संसद विघटन गरेर नयाँ ताजा जनादेशमा जाने कुरा संविधानको रक्षा भएकाले तत्कालिन प्रधानमन्त्री ओलीले संसद विघटन गरेर चुनावको मिति घोषणा गरेको पनि रायमाझीले स्मरण गराए । उनले भने, ‘ताजा जनादेशमा जाने कुरा त लोकतन्त्रको रक्षा हो ।’
हिजो केपी ओलीले संसदीय दल र केन्द्रीय कमिटीमध्ये एक मात्र ४० प्रतिशत हुने प्रावधानसहित अध्यादेश ल्याउँदा विरोध गर्नेहरूले आज २० प्रतिशतमा झारेर अध्यादेश ल्याएको भन्दै उनले आक्रोश पोखे ।
उनले अहिले पनि मुलुक प्रतिगमनतर्फ जाने देखिएको खतरा औँल्याए । उनले भने, ‘अहिलेको गठबन्धन लोभी पापीहरूको गठबन्धन हो । यो त जसरी पनि सत्तामा पुग्ने मात्रै गठबन्धन हो । जनादेशको खिलाफमा चरम अराजकवादी चिन्तनको आधारमा सरकार चलाउन खोजिएको छ ।’
उनले अहिले मुलुकमा राजनीतिक एजेन्डा नभएको भन्दै अब विकास र समृद्धिको एजेन्डा नै रहेको पनि बताए । उनले आफूहरू एमालेमा गएको भनेर प्रचार गरिएको भन्दै आफूहरू नेकपाकालिन निरन्तरतामै रहेको पनि स्पष्ट पारे । वर्तमान सरकारले अर्को बजेट ल्याएकोमा पनि उनले दुःखेसो पोखे । उनले भने, ‘यसअघि केपी ओली नेतृत्वको सरकारले ल्याएको बजेटले जलन भएर अहिले प्रतिस्थापन विद्येयक ल्याइएको छ, विकासका एजेन्डा काट्न मिल्छ ? साथीहरू नाँग्गिदै गएका छन् । कार्यकर्ता थेग्ने, पोषण गर्ने, यस्तो प्रकारको कार्यकर्तामुखी बजेट ल्याउनुहुन्छ ? देश र जनताको हितमा बजेट ल्याउनुपर्छ । यसले देशको हित गर्दैन ।’ उनले मुलुकमा अब राजनीतिक क्रान्तिका एजेन्डा तत्काल नभएको भन्दै अब विकास र समृद्धिको एजेन्डालाई बोकेर हिँड्नुपर्ने बताए ।
